أحمد قربان
مقالتي اليوم تناقش اهم اسباب ضعف المطورين العرب وليش مهم اننا نطور العاب بنفسنا، وراح نقدم حلول لاسباب الضعف ممكن اي شخص بيصمم لعبة يستفيد منها.
احصائية مهمة جدا تقول انه الالعاب يدخل منها سنويا 95 مليار دولار! وللاسف ما عندنا سنت واحد من هذه الاحصائية، فيه احصائية ثانية تقول: “يبلغ مستخدموا الإنترنت في المملكة العربية السعودية الذين يقضون وقتهم على الألعاب 40% وذلك حسب إحصائيات العام ٢٠١٠ لهيئة الاتصالات السعودية”، من الاحصائيات نلاحظ انه اقبالنا على الالعاب بيزيد بشكل مهول وانه ميزانية الالعاب ميزانية جدا مانتسهين بها، أجل ليه مانصمم العاب بنفسنا؟ تساؤل مهم جدا، ايش اسباب الضعف في الانتاج من المصمم العربي؟ بعد بحث في النت و اخذ وجهات النظر توصلت الى عدت نقاط وهي:
ضعف كتاب السيناريو بشكل عام
للاسف المخيلة عند العرب شبه معدومة ونادرا نلقى قصص او روايات فيها مخيلة و احداث غريبة جدا او غير متوقعة، وكما نعلم انه اساس اي لعبة في العالم هو المخيلة او بالانقليزي اسمها “creativity” ولنا في لعبة لتل بيق بلانيت (little big planet) مثال. الشعب السعودي خاصة عنده كفاءات وفيه ناس طموحين لكن للاسف ماجربو هذا المجال، انا شخصيا واثق فيهم و اتمنى انهم يبتعدو عن الخوف من الخسائر والميل للتجربة والخروج عن المالوف.
ضعف الخبرة في مجال تصنيع وبرمجة الالعاب بشكل كبير جدا
مجال الالعاب عند العرب بالضبط اشبه بمجال السيارات، نحب الشراء ولكن مانعرف كيف تمت صناعة البضاعة. ماعندنا اي خبرة عن الالعاب وبرمجتها وتصينعها والاجانب سبقونا بسنييييين في هذا المجال، في نظري الحل الامثل هو فعل طريقة اسمها الهندسة العكسية، وهي عبارة عن اخذ لعبة جاهزة و نبدا في تفصيلها الى اجزاء صغيرة و ملاحظة طريقة تصميمها بالتفصيل، ثم البدء في تصميم لعبة مشابهة لها بنفس الاسلوب عن طريق تجميع الاجزاء مرة اخرى.
في مجال السيارات كانت اليابان تتبع هذه الطريقة، طبعا في البداية راح تكون الجودة سيئة لكن بعد التجارب ممكن نكون مثل اليابان الان في عالم السيارات ولكن نحن في عالم الالعاب. بعد اليابان اتبع نفس الطريقة الصين، ايام كنت صغير كنا نبعد عن المنتج الصيني، الان معظم حياتنا ومشترياتنا صناعة صينية وبجودة مقبولة جدا. اتمنى اننا نحاول نستفيد من الغرب حتى لو استعرنا بمصمم غربي في البداية لتعليمنا الاساسيات ثم الانطلاق بتصميمنا الخاص.
نظرة المجتمع لمصمم الالعاب
للاسف مجتمعنا نظرته لهاوي الالعاب نظرة دونية جدا. يحسسوك انك بتسوي مصيبة وغيرك جالس في القهوة بيضيع عمره على قارورة فوقها قسطير وفحم ومافي اي احد يستهزئ بيه او يقوله تراك بتضيع عمرك. الالعاب نعرف انها مفيدة لنا بطريقة او باخرى ومو هذا نقاشنا، نقاشنا انه المجتمع ممكن يحبطك او مايعطيك الدفعة للبدا بمشروعك الصغير.
حاول اذا احبطوك المحبطين تاخذهم دافع لك لتصميم اللعبة و وابهارهم بها، دائما الشي الجديد و الغريب في البداية راح يضحكو عليه بعدها يسكتوا وينظرو اليك من بعيد و بعدها يجربوه وفي الاخير يمدحوه. ممكن هذه النقطة (نظرة المجتمع) تاثر في المصمم من ناحية واحدة وهي ابتعاد المستثمر عنه.
عدم ضمان الربح
تكملة للنقطة الماضية، اذا بحثت عن مستثمر يساعدك راح تلقاهم يتهربو منك لانه النجاح في هذا المجال جدا غير مضمون، في العاب تصميمها غالي جدا مثل لعبة جراند ثيفت أوتو (GTA) اللي قالوا مصصمينها انها كلفتهم اكثر من انتاج افلام في هوليود! و في العاب بسيطة ولاتحتاج الى ميزانية عالية، الالعاب البسيطة غالبا تكون للجوالات وتكون من نوع الفك او التركيب او الالغاز واسمها (puzzle) هذه الالعاب غالبا ميزانيتها محدودة ويمكن الحصول عليها.
اللي بحاول اوصله انه تصميم الالعاب يحتاج فكرة فقط، بعد الفكرة تحتاج انك تشوف ميزانية لعبتك هل هي في متناول اليد ولا لازم مستثمر يدعمك، اذا احتجت مستثمر اهم شي بين الطرفين هو ثقة من المستثمر و اداء رهيب من المصمم. اذا اتحققت هذه الشرطين ممكن نرا لعبة قوية ان شاء الله. بالنسبة للمستثمرين، صحيح قليل راح يأيد فكرتك لكن الجميع ملاحظ انه بدأ المستثمرين يتوجهو للشباب وينظرو لهم بنظرة مختلفة شوي، ان شاء الله نلقى مستثمرين قريبا عندهم ايمان بالشباب و بامكانياتهم.
الطموح لتكوين لعبة اسطورية من اول محاولة
مشكلة اي شخص بشكل عام انه يبغا يكون الافضل في اي مجال، ويبغا يكون الافضل باقل مجهود واسرع وقت، وهذا الشي صعب جدا في عالم تصميم الالعاب خصوصا من شخص مبتدئ جدا في هذا المجال. بعض المصممين يريد ان تكون اللعبة خالية من الاخطاء و هذا يؤدي الى تاخير الاصدار و يؤدي الى دخول المصمم في دوامة التعديل والتاخير. كل البشر يخطؤو وافضل العاب العالم فيها اخطاء. كلنا نعرف عن مشاكل بتلفيد 4 (Battlefield 4) في اجهزة الجيل الجديد، ومعظم الالعاب يكون فيها اخطاء سواء تقنية او غيرها.
اذا انت من اول تجربة تبغى لعبتك خالية من الاخطاء فهذا شي مستحيل. اذا تبغا تكون مثل افضل الالعاب الموجودة في السوق كجودة فهذا شي صعب جدا ويحتاج وقت ومجهود و راح يكون فيه اخطاء مثل افضل الالعاب. في نظري الافضل انك تبدا بشي بسيط حتى لو فيه اخطاء انشره وبيعه، ومن ثم اجمع ردود اللاعبين وحدد اخطائك و عدلها بتحديث واحد. اهم شي انك ماتأخر اللعبة، انشر و طور دائما.
الحاجة لفريق عمل ثقة و اداءه مميز
من الحاجات المؤثرة ايضا هي الحاجة لفريق عمل. لانه اللعبة تصميمها يتكون من منظومة من المصممين، شخص مسؤول عن الرسم و شخص عن الاخراج وشخص عن القصة و و و ….، متى ماتواجد الفريق المميز ان شاء الله إنهم يستطيعو ان يصممو لعبة جميلة وبامكانها تدخل السوق بمنافسة محترمة.
ايش استنتجنا؟
نقدر نصمم العاب ونقدر نكون من افضل المصممين…..نحتاج خطة وصبر و فريق عمل ومستثمر، منظومة صعبة لكن غير مستحيلة، نحتاج ايضا اماكن او معاهد متخصصة لتعليم برمجة الالعاب خصوصا عندنا في السعودية، نحتاج اننا نبعد عن المحبطين و نستمتع بالتصميم حتى لو مانجحت اللعبة، نكون فخورين انه انجزنا لعبة و عرفنا الاساسيات. أبعد كل الافكار السلبية وابدا في التصميم من اليوم، وان شاء الله خلال فترة معينة لعبتك راح تكون جاهزة للنشر.
عندك اسباب غير اللي ذكرتها؟ اقتراحات لمصممين الالعاب؟ اقتراحات للمستثمرين؟ اتفضل وشاركنا
محمد ليلة