“اكره ديستني”، “مخيسة، مملة”، “تكرار يطفش”، “جوائزها عشوائية وغير عادلة”، “انواع الابطال قليلة (الكلاسات) و مافي فرق كبير بينهم”. كل هذه الاسباب وغيرها كثير سمعناها وقلناها عن ديستني و كيف ان اللعبة رفعت ضغطنا وخلتنا نتركها. لكن، بعطيكم اليوم اسباب عشان تعطوها فرصة ثانية او اذا مااشتريتوها للان راح اخليكم تعيدوا التفكير انكم تشتروها.
لعبة تعاونية من اعلى طراز
مافي احد يحب يعيش لحاله حتى لو انه عنده كل الاشياء الي تخليه مبسوط و سعيد، لو انه لحاله بيسويها ماراح يكون مبسوط او راح ينبسط بالبداية بس بعدين يحس بنقصويكون وده يشارك تجربته مع احد… ديستني بتعطيك شعور مشاركة التجربة بافضل صورة ممكنة. تقدر تشارك لعبك و وتهايط بدروعك على اخويانك، وتلعب مع اخويانك اصعب المهمات و تفوزوها و تحسون انكم سويتوا انجاز خرافي. و طبعا كل لاعب راح يساعد الثاني بطريقة مميزة، انا العب بكلاس هنتر و اخوياني واحد تايتن و الثاني ورالوك، الهنتر عنده خاصية الاختفاء لو مثلا اثنين ماتوا اقدر اختفي واروح اصحيهم بدون اي مشاكل.
التايتن عنده الحركة السوبر تحط لك كرة حامية لك ولاصحابك تدخلوها ومافي اي وحش يقدر يمسكم… هذا غير ان نفس التايتن يقدر يطور هذي الحركة و يزود قوة الرصاص لنفسه و لاخويانه اذا دخلوا وسط الكرة وخرجوا منها.
اما الوارلوك فعنده ميزة خرافية جدا وهي ان باستطاعته ان يقوم من الموت بدون مايحتاج لاحد عشان يصحيه…هذي الحركة بتفزع جدا اذا كل الفريق مات..بدل ماتعيدوا المهمة يصحي نفسه و يعطي الفريق فرصة ثانية انهم ينهوا المهمة من اول مرة.
ب3 انواع مختلفة تدخلوا مع بعض وتكملوا بعض وتحس بمتعة مو طبيعية طبعا. اول مااخذت اللعبة كان الفريندز (الاصدقاء) عندي قليل. بدأت اضيف الي العب معاهم او القاهم في التاور..وصار عندي قائمة من اللاعبين لديستني رهيبة جدا…ادخل اي وقت القى ناس اونلاين و العب معاهم المهمات الي لسه ماخلصتها. اتعرفت على ناس مميزين جدا من اللعب و كونا ذكريات جدا جميلة وممتعة.
تحدي ومتعة
كلنا نحب الالعاب الي فيها تحدي… ونكره الالعاب السهلة جدا…ديستني بتعطيك التحدي الي تحتاجه و في نفس الوقت تحدي مناسب لامكانياتك، عكس العاب سولز مثل دارك سولز وغيرها الي بتعطيك تحدي شبه تعجيزي ويكرهك باللعبة. ديستني بتعطيك تحدي رهيب وادرينالين يخليك تبا تنهي المهمة بأي طريقة. وهذا الشي بحد ذاته ممتع، غير المتعة الي في اسلوب اللعب نفسه (قيم بلاي) اللي ابدعوا فيه بنجي (Bungie) بصورة خيالية، لعب ممتع و سهل وسلس، و يتغير من فيرست بيرسون لثيرد بيرسون مع تحدي و تطويرات ممتازه، كل هذا بيخرج لك لعبة جميلة جدا وممتعة.
بعد ماتوصل لفل 20 (اللي سهل بالمناسبة ووممكن خلال يومين لعب تجيبه) راح تنفتح لك مهمات يومية و اسبوعية، هذي المهمات هي التحدي الي اتكلم عنه. خصوصا المهمة الاسبوعية الي اسمها نايتفول (Nightfall) هذي المهمة بتحطك تحت ضغط و حماس رهيب… المهمة بتحط لك بعض الخصائص اللي تتغير اسبوعيا و بتاثر على اللعب مباشرة…مثلا في خاصية تقولك ان اذا وحش ضربك بيده قوته راح تكون دبل عليك… وهذا الشي بيخليك تلعب وعينك مفتحة و 6 من 6 وتنتبه على اي وحش حولك.
في خاصية تدبل قوة نوع معين من الاسلحة وتكون لك وعليك بنفس الوقت..لك لو معاك نفس النوع المدبل و عليك لو الوحوش الي ضدك نوع سلاحهم هو الي يكون المدبل.
و اسوأ خاصية تكون ثابتة في كل مهمات النايتفول هي ان لو الفريق كله مات راح تخرجوا من المهمة تلقائيا و ترجعوا للقائمة الرئيسية تبع اللعبة…هذا الشي بيخلي الفريق كله مصحصح و يخلينا نفكر كيف نسوي خطة اننا نخلي واحد من فريقنا مايموت بأي طريقة المهم انه مايموت حتا لو انه ماقتل احد المهم انه يكون عايش ويفزع لنا لو متنا كلنا. و طبعا جوائز النايتفول تكون اما اسلحة اسطورية او اقوا من اسطورية (اكزوتك) او اذا حظك سيئ راح يعطوك قطع تساعدك في تطوير الاسلحة.
هذي المميزات وغيرها تعطي شعور ثاني للعبة و تخليك تبا تلعبها وتثبت لنفسك انك جيمر محترف و تقدر تفوز، وتكون محترف فعلا لو قدرت تخلص النايتفول لحالك بدون اي مساعدات (ماقدرت اسويها صراحة 🙂 )
ادمان
الادمان عنصر مهم في الالعاب….في ادمان فيفا…ادمان كود و بتل….بس ادمان ديستني اخذني لبعد ثاني… اهم اسباب ادمان ديستني هو توزيعهم العشوائي للجوائز…لو كل واحد فينا اخذ الجوائز الي يتمناها من اول مرة راح تكون اللعبة مغبرة من كثر مااترمت….لكن توزيعهم المخيس يخلينا ندمنها و نلعب كل يوم مأملين اننا راح نحصل على افضل الجوائز…و غير اسباب ثانية للادمان مثل انك تبا تخلص التحدي وتثبت لنفسك انك قوي…او اذا تبا تطور سلاح وتحتاج قطع معينة تجلس تدور عليها…او او او. اللعبة ادمنتها لدرجة اني سحبت على باقي الالعاب، اشتريت قراند و يونيتي و كلهم انسحب عليهم بسبب هذي الديستني. وطبعا ماننسا مثل ماهو واضح في الصورة ان نفس موقع سعودي جيمر اعطوها اكثر لعبة ادمانية لهذي السنة.
مهمات ريد (Raid)
الريد وماادراك ماالريد، والله مااكذب لو اللعبة بس فيها مهمات الريد الموجودة حاليا تستاهل 40 دولار اقل شي وممكن لو ب60 اشتريها عادي، شي اسطوري والله….كل المهمات تسمح لك ب3 يدخلوا معاك الا الريد يسمح لك ب6…ومااكذب ان بالنسبة للاعب الطبيعي تحتاجوا 6 لاعبين طبيعين عشان تخلصوا هذي المهمات، انا اول مرة بحياتي العب مهمات تحتاج مشاركة و تحتاج عمل جماعي بهذا الشكل، كل لاعب مؤثر ويسهل عليك الفوز وبالنسبة لبعض الفرق يكون ركن من اركان الفوز، صراحة بنجي ابدعوا في هذي المهمات وهي التحدي الاكبر بالنسبة لي، تجمعوا 6 لاعبين و تدخلوا وتتفقوا على طريقة معينة للفوز، طبعا تقدروا تفوزوا باكثر من طريقة لكن كل فريق يلعب بالطريقة الي تناسبه وهذا الشي الرهيب، تحس بان كل فريق له تجربة مختلفة و اسلوب لعب مختلف، اذا نبا نفكر كيف قدروا يصمموا مهمات متقنة بهذا الشكل (حتى لو فيها اخطاء لكن تظل متقنة) راح نكتفي بالتحية لفريق بنجي.
من ضمن الاسباب الي راح اذكرها تحت هي بعض الاحصائيات الرهيبة…لكن في احصائية من مخي يريت ديستني يحسبوها..الاحصائية هي كم مرة اتذكرت جملة “اخر مرة” في مهمات الريد، من التعب احيانا الرئيس مانقدر نهزمه و نقول خلاص نجرب اخر مرة، ويقتلنا و نلعب ثاني ونقول خلاص منجد اخر مرة، ويمكن نستمر 10 محاولات وكل مرة نقول اخر مرة الى نفوزها او نيأس ونقول نكمل بكرة. اعتقد لو بنتوقع كم مرة اتذكرت هذي الجملة راح تكون اكثر من عدد المرات الي الناس فازوا الريد فيها!
اسلحة رهيبة
من الاشياء الممتعة باللعبة هي الاسلحة…مشهور قالها في احد حلقات البودكاست، قال:”تحس بالطلقة الي تطلقها من كل سلاح” منجد جملة حقيقية 100%، كل سلاح يفرق عن الباقين و كل سلاح له ميزات وتطويرات خاصة فيه…في سلاح سنايبر معروف جدا في اللعبة اسمه ايس بريكر (Ice Breaker) هذا الاسنايبر اكزوتك وميزته ان يعبي ذخيرته من حاله! ماتحتاج تعشق او اي شي، بس تحطه و هو يعبي من حاله ويقولك شوت ياشنب! هذا بس مثال لرهابة الاسلحة الي باللعبة.
ضد النوب
اللعبة تحارب النوب! عكس كثير من الالعاب المشهورة الي بس همهم اطلاق اللعبة وبعد كذه حريقة باللاعبين او حريقة باسلوب اللعب الخاص باللاعبين. هذي اللعبة تحارب النوب بكل الطرق، مهمات الريد مثلا…اول مانزلت المهمة الاولى كان فيه طريقة ان اللاعبين يقدرو يطيحوا الرئيس من مكان معين و مايحتاجوا يقتلوه..اسمترت فترة الحركة ذي وبعد كذه نزلوا بنجي تحديث عدلوا فيه هذي المشكلة، حتا الريد الجديد كان فيه قليتش خلا الرئيس يصير جدا سهل استمر ل 3 اسابيع تقريبا وقبل امس سووا تحديث والغوه، كمان الاسلحة الضعيفة يقووها شوي، والاسلحة القوية جدا ضعفوها شوي عشان يصير في موازنة…كل هذي الاشياء وغيرها تخليني ارفع القبعة لبنجي ولاهتمامهم باللاعبين و باللعبة بشكل جبار.
ودك تتعلم انقليزي؟
بما ان اللعبة تعاوينة من الدرجة الاولى مثل ماوضحت قبل، للعبة بتساعدك بشكل رهيب اذا بتتعلم انقليزي..كل الي عليك انك تدخل التاور او المنتديات الاجنبية او برنامج ديستني الي على الجوال و تبحث عن اجانب وتضيفهم…ضيفهم و جيب مايك و ادخل معاهم وخبص لغة الى ان تتقن اللغة ويصير فهمك للغتهم سريع وسهل. صراحة فادني شخصيا و فاد غيري ايضا وتجربة حلوة كانت.
الاضافة
اذا بتتكلم عن الاضافة الجديدة وهل تشتريها ام لا..انصحكم تشتروها، مااختلف ان المحتوى قصير لكن عمره طويل، الريد بيتحدث كل اسبوع وبيعطيك جوائز، وعندك 3 مهمات جديدة و فيها افكار حلوة، غير مهمة الاسترايك الجديدة الي فيه تحدي واعجبني جدا اكثر من مهمات الاسترايك القديمة. هذي المهمات الجديدة احيان يحطوها في المهمات اليومية والاسبوعية وماتقدر تلعبها الا لو معاك الاضافة، اذا عندك صديق و تبوا تشتروها انتوا الاثنين تقدروا تشتروها بحساب واحد وتشاركوها بينكم، يعني نص بالنص. الي مايعرف للحركة هذي يكتب في الكومنت وراح اساعدكم ان شاء الله.
تكامل اللعبة مع برامج التواصل الاجتماعية
كثير من الالعاب حاولت تضم الاجهزة الذكية مع الالعاب وتخليها اشياء مكملة لها لكن شخصيا مااعرف لعبة نجحت في تطبيقها بشكل ممتاز مثل ديستني..برنامجهم سلس نوعا ما و اسهل من برنامج باتلفيلد الي جربته شخصيا.. بالاضافة انهم يشاركوا بتويتر ويعطووا معلومات مهمة عن التحديثات، غير المقالات الي ينزولها على موقعهم واللي بتكون نفسها في برنامجهم الي على الجوال، هذا الشي يخليك متواصل مع اللعبة طول الوقت وعارف كل التحديثات الجديدة والمهمة، وصار مجتمع ديستني اقرب مع بعض و ينشروا الاخبار بينهم اكثر ويخليهم يجربوا الحلول في المهمات الجديدة مع بعض اكثر و اكثر وينشروا الحل الافضل في البرنامج وفي اليوتيوب وفي مواقع التواصل.
احصائيات
قبل شهر تقريبا في احد مقالات موقع ديستني..اعلنوا عن عدد اللاعبين الي لعبوا اللعبة، 12 مليون و 800 الف شخص تقريبا واللي زاد الان وممكن وصل ل 13 مليون لاعب!، 22 مليون شخصية تم انشائها، و مجموع 872 مليون ساعة تم استهلاكها في محاربة الوحوش في اللعبة! والله ارقام مهولة….والسؤال الي يطرح نفسه…هل انت من ضمن هذه الاحصائيات؟ اذا لسه مادخلت ضمنها ترا المجال لسه قدامك و لسه ماراحت عليك الفرصة انك تستغل لعبة السنة بالنسبة لي.
حلول
في نوعين من اللاعبين الي اوجه لهم هذي الحلول:
1- اذا لعبت اللعبة وكرهتها بسبب الجوائز الغير عادلة:
الحل بسيط..سؤال واحد اساله نفسك…ودك تلعب للمتعة و الوناسة و تقضي وقت حلو مع اصحابك في اللعب ولا بتلعب عشان تجمع قطع وتلفل باسرع وقت؟ اوكي كلنا بنلفل لكن لا يكون هو الهدف الرئيسي بالنسبة لك، كلنا نبا نستمتع وديستني بتعطينا هذي المتعة على طبق من ذهب وهذا شي بنظري كافي حتا لو ماجاتني القطع الي احتاجها.
2- اذا انت لسه مالعبت ديستني و تقول ان الناس سبقوني وخلصوها:
بقولك العبها و ترا التلفيل سريع…حتجيب لفلات اصحابك في فترة بسيطة واذا حظك حلو ممكن تجيك القطع الي تحتاجها وتعديهم. اللعبة ممتعة جدا وتستاهل تلعبها. شوف لك اي خوي لسه مالعبها او بيسوي شخصية جديدة و يبا يعيد تختيم اللعبة والعب معاه واستمتعوا. نصيحتي بس انك كل يوم تخلص مهمات الباونتيز (Bounties) عشان تساعدك لما توصل لفل معين فيها انك تشتري الدروع الاسطورية و تلفل بسرعة.
في النهاية هي وجهات نظر. لكن لاحظت كثير ناس استعجلوا وحكموا على اللعبة قبل مايعطوها حقها. جرب اعطيها فرصة ثانية وصدقني باذن الله راح تستمتع فيها.
شاركنا رايك واعطينا رايك عن اللعبة…هل ادمنتها مثلي ولا كرهتها؟
