اللي سمع الحلقة 196 أكيد سمعني اتكلم عن نفس هذا الموضوع، بس حبّيت أوضّح وجهة نظري هنا بشكل أوضح وعلى شكل نقاط، وأيضاً أعرف وجهة نظرك في الموضوع كمتابع.
نبدأ بالأسباب:
1. الارقام تختلف معانيها بين النقّاد
من يوم ما اعتمدت المواقع العالمية تقييم الأرقام وإلى الآن ومافيه طريقة موحّدة لاختيار الارقام في التقييم. شخصياً أشوف 10 من 10 معناها ان اللعبة قدّمت لي تجربة استثنائية نادراً ما القاها في عالم الألعاب، حتى لو هاللعبة فيها عيوب. غيري ممكن ما يعطي اللعبة 10 من 10 الا اذا كانت خاليه تماماً من العيوب، حتى لو ما كانت تقدّم شي جديد.
حتى في خصم الدرجات من التقييم الموضوع غير واضح. وش العيب اللي يخليك تخصم درجة من التقييم؟ وش العيب اللي يخليك تخصم نص درجة؟ وش العيب اللي يخليك تخصم 0.3 من التقييم؟ لو تفكّر بالتقييم بالأرقام بتكتشف أن الموضوع كله عشوائي وكل ناقد يحط لنفسه قوانين خاصة فيه ماشيه على مزاجه.
2. الارقام تختلف معانيها عند الناس
بما ان الناقد ينظر للرقم اللي اختاره بنظره خاصة فيه، فمستحيل ان الناس يعرفون طريقة تفكيرة (الا اذا كانوا متابعينه من زمان). يمكن الناقد يشوف ان أي لعبة تقييمها فوق 7.5 هي لعبة ممتازة تستاهل انك تشتريها، بينما القاريء يشوف ان أي لعبة تقييمها فوق 8 فقط هي اللي تستاهل تعطيها وجه.
والاختلاف ماهو بين القاريء والناقد بس، حتى بين القرّاء أنفسهم! كل واحد له معايير معيّنة لاختيار الرقم المناسب لتقييم اللعبة. لو تدخل موقع أمازون مثلاً تبي تشتري شي، بينلحس مخّك من طريقة تقييم بعض الناس للمنتجات. تلقى واحد معطي المنتج 3 من 5 مع انه قاعد يمدح المنتج في كل تقييمه، بس خصم درجتين لأنه ما ناسب احتياجاته الشخصيه. طيب انا وش دخلني؟ جالس اقرا التقييمات عشان أعرف اذا المنتج كويس ولا لا، مو اذا مناسب للي اشتروه أو لا، لكن بسبب اختلاف نظرتنا لطريقة التقييم واختيار الدرجة المناسبه صار الموضوع غير واضح.
يوتيوب سابقاً كان يخلّي الناس يقيّمون المقاطع باستخدام الخمس نجوم بعد، لكن لاحظوا في احصائيات الموقع ان الناس كانوا غالباً يستخدمون اما تقييم الخمس نجوم أو النجمة الوحدة. الناس عاطفيين عادة في تقييماتهم، عشان كذا اذا قريت تقييم لعبة عندنا لابد تلقى لك واحد في التعليقات يقول “حرام المفروض تاخذ أسطورية!” أو “اما ممتازة! هذي أبو كلب!”، بدون تقييم حقيقي لتجاربهم. وهذا اللي خلا اليوتيوب يعتمد نظام اللايك والديسلاك (تصويت مع أو ضد، واذا انت محايد لا تصوّت)، عشان على الأقل المشاهدين بنظرة وحدة يعرفون وش وضع المقطع بالضبط بدون لخبطة.
3. الارقام تدخّلك في مقارنات عقيمة ما تفيد أحد
تخيّل اني اقيّم لعبة X بدرجة 8.5، ومحمد الشريف يقيّم لعبة Y بـ9. هل الناس بيقولون اللعبتين ممتازة؟ لا طبعاً، بيقولون لعبة Y أفضل من لعبة X، عشان النص درجة هذي اللي خصمتها أنا لأي سبب كان، هذا وهي نص درجة بس! تخيّل لو كان الفرق درجة كاملة أو درجتين. مصيبة! بتدخل معنا ومع غيرك في مقارنات بين التقييمات ما راح تفيدك ولا تفيد أحد. خلاص اللعبة كويسة وش عليك هي 8.5 ولا 9؟ الأكيد ان جودتها عاليه وبس.
4. مجرّد ان مواقع عالمية تستخدمها لا يعني انها صح
شركة آبل يوم جت تدخل في سوق الجوالات، هل قالت خلونا نقلد نوكيا والشركات الكبيرة المسيطرة على السوق لأن أكيد انها تسوي شي صح بما ان مبيعاتها ضخمه؟ لا. كان توجّههم مختلف تماماً. شافوا وش المشاكل الموجودة في الجوالات الموجودة وقتها، وحلوها وقدموا الجوالات بشكل أفضل. بعد فترة قصيرة أثبتت آبل نجاحها في سوق هي جديدة عليه أصلاً وتعتبر ولا شي فيه، ثم صارت هي الرائدة فيه وكل الباقين يقلدونها ويعتبرون ان اللي سوته أبل هو المعيار اللي لازم السوق يتبعه. (طبعاً الحين وضعها مختلف مع المنافسين اللي عندها، لكن اتكلم عن فترة سابقة).
صحيح المواقع العالمية تعتمد الأرقام للتقييم، لكن مافيه معيار واضح للتقييمات يسهّل للمستخدم أنه يفهم معنى “الرقم” حق أي تقييم يقراه مهما كان الموقع ومهما كان الناقد. مافيه معيار عالمي واضح ومتفق عليه يقول للناقد متى يختار كل رقم في التقييم حقه. مافيه الا “هاه شباب بنعتمد الارقام اوكي؟ يالله كل واحد يشوف شغله”. نظام مفقّع فعلياً وما تقدر تعتمده كمعيار موحّد للتقييم.
طبعاً ممكن يجي واحد يقول “يعني بتقنعني مواقع كبيرة زي IGN أمريكا و GameSpot قاعدين يسوون شي غلط؟”. ليش لا؟ مب اللي قرروا يستخدمون الارقام للتقييم أوادم زيّنا زيّهم؟ أجل عادي ممكن يتخذون قرارات غلط، وياما هالمواقع جابت العيد بأمور ثانية. شخصياً أشوف التقييم بالأرقام غير مفيد بغض النظر عن الموقع اللي يستخدمه.
5. الناس برا الانترنت ما يقيّمون الاشياء بأرقام
اسأل خويّك وش رأيه بلعبة معيّنة. وش بيقول لك؟ “رأيي انها 9.5″؟ غالباً أول شي بتسمعه كلمات مثل “ياخي رهيبة” أو “اللعبة ممتازة” أو “بنت كلب لا تفوتك” أو “ما عليها”. الناس يحبّون يعبّرون عن رأيهم بالكلام مو بالأرقام. لأننا في النهاية أوادم مو كمبيوترات. حتى لو قال لك خويّك أنه يعطي اللعبة 8.5 غالباً راح تسأله اسئلة أكثر عشان تفهم وجهة نظرة، الا اذا كنت فاهم له كويّس وتعرف كيف يختار أرقامه بالعادة.
وهذا الشي هو اللي خلانا نستوحي نظام التقييم اللي نستخدمه في موقعنا. غالباً اذا جلسنا نسولف عن لعبة فما راح تطلع آرائنا النهائية عن كلمات مثل “أبو كلب” أو “تمشي الحال” أو “ممتازة” أو كلمات ثانية تشابهها في المعنى .. الا اذا واحد فينا خق عليها مره ممكن يستخدم كلمة مثل “خرافية” أو “أسطورية” أو أي كلمة ثانية توصف مستوى الخقة العظيم اللي يعيشه.
تذكّر الهدف الأساسي من متابعة التقييمات
التقييمات موجودة عشان تعرف اذا اللعبة مناسبة لك أو لا، مو عشان تجادل وتقول ليش اللعبة فلانية تقييمها كذا أو ليش تقولون ان هذي أحسن من هذي. أهم شي تعرف هل اللعبة تناسبك ولا لا؟ ولا تكفي بقراءة تقييم شخص أو موقع واحد، شف أكثر من موقع وأكثر من رأي، تابع أكثر من فيديو، وبالنهاية اتخذ قرارك بنفسك.
فهذا كان باختصار رأيي في الموضوع، والسبب اللي خلا فريقنا يتوجّه لتقييمات أفضل وأبسط من وجهة نظرنا.
وش رأيك انت بالموضوع؟ شاركنا برأيك في التعليقات!
