في خبر سار لعشّاق سوني، وباقي اللاعبين بشكل عام، أعلنت سوني قبل شوي انها مبيعات جهازها البلاي ستيشن 4 تعدّت 2 مليون وحدة!
باعت سوني في أمريكا مليون جهاز في أول يوم من الاطلاق، والآن بعد ما أطلقت الجهاز في 32 دولة حول العالم، وصلت مبيعات البلاي ستيشن 4 الى 2 مليون وحدة.
لا شك ان سوني فرحانة مرة بهذا الخبر السعيد، وخصوصاً بعد النحس اللي كان يلاحقها في كل جهاز بلاي ستيشن تطلقه، وهو ان بدايته لازم، لازم، لازم تكون سيئة! هذا أوّل جهاز بلاي ستيشن لسوني ينجح من البداية!
فيه اعتراف بسيط شخصي من ناحيتي، وهو اني كنت دائماً أقول للناس ان سوني مستحيل تنجح من البداية مع أي جهاز بلاي ستيشن، لكن يبدو ان سوني تغلبت على نحسها وعلى توقعاتي اللي كنت واثق منها جداً.
الخبر هذا لا بد انه يكون مفرح، خصوصاً وان حتى مايكروسوفت باعت مبيعات ممتازة مع جهازها الاكس بوكس ون. هذا كله في النهاية يصب في مصلحة اللاعب اللي في الأخير راح يدخل المحل ويتمخطر ويتدلع ويختار وينتقي أي جهاز يبغى، وأي لعبة يبغى، لان كل الشركتين ناجحة وكلها راح تكمل دعمها الهائل لجهازها عشان يواصل نجاحه.
وش رايك انت في الخبر؟ وش تحتاج سوني عشان تواصل نجاحها؟ شاركنا رأيك في التعليقات!
