أخيراً، وبعد انتظار طويل، أعلنت بلاي ستيشن السعودية عن فتح الطلب المسبق (preorder) للبلاي ستيشن 4 في السعودية! الطلب المسبق يبدأ من اليوم في الرياض، وباقي أنحاء المملكة خلال نهاية الأسبوع!
أماكن الطلب المسبق بتكون في الأماكن هذي:
- معارض عالم سوني الموجودة في أنحاء المملكة.
- عالم بلاي ستيشن في الرياض
أما بالنسبة للسعر، فسعر البلاي ستيشن 4 راح يكون 1799 ريال، لازم تدفع قيمة السعر كاملة، مافيه عربون! وبامكانك تشتري معه الأشياء هذي (تضاف الى سعر البلاي ستيشن 4 طبعاً):
- يد تحكم اضافية (DualShock 4) بسعر 259 ريال
- كاميرا بلاي ستيشن 4 بسعر 259 ريال
- لعبة ناك (Knack) بسعر 259 ريال
- لعبة كيلزون/ شادوا فول (KillZone: Shadow Fall) بسعر 299 ريال
أما بالنسبة لطريقة الحجز، فكل اللي تحتاج تسويه انك تروح لأحد المحلات المذكورة، وتدفع المبلغ كامل، واذا جا يوم اطلاق البلاي ستيشن الرسمي، واللي بيكون في 14-12-2013، الموافق 11-2-1435 هـ، تروح المحل تستلمها. اذا سويت الطلب المسبق وخلصت، بيعطونك ايصال فيه رقم، هذا الايصال لازم تحافظ عليه وتجيبه معك في يوم اطلاق البلاي ستيشن 4، ولا راح تستلم الجهاز الا بهذا الايصال!
أما بالنسبة لحزم الاطلاق، فما راح يكون لها طلب مسبق. وهذي تفاصيلها:
- حزمة KillZone: Shadow Fall بسعر 2299 ريال، وتحتوي على بلاي ستيشن 4 وملحقاته، ويد تحكّم اضافية، وكاميرا بلاي ستيشن، بالاضافة الى كيلزون شادو فول طبعاً.
- حزمة Assassin’s Creed IV: Black Flag بسعر 1999 ريال، وتحتوي على بلاي ستيشن 4 وملحقاته، ولعبة أساسنز كريد 4.
من الأشياء اللي تستاهل الذكر، الكميات محدودة جداً، لذلك اللي يبغى لازم يحجز بدري!
أما بالنسبة للأحداث اللي بتصير في ذاك اليوم والأيام والأشهر اللي بعده فما أحد يعرف وشي، لكن يقولون كثير من اللاعبين راح يختفون من العالم الحقيقي، وبتقوم حرب شعواء بين اللاعبين وأهاليهم، والفائز كالعادة ولا أحد، بما ان البلاي ستيشن 4 المسكين راح ينشال منك ويروح للسجن الأزلي – غرفة امك.
