يبدو ان سوني تعلمت درس كبير من البلاي ستيشن 3، اللي كان تصنيعه يكلف ما يعادل حوالي 3000 ريال بينما كانت تبيعه سوني بـ2250 ريال! من المعلومات اللي تستاهل الذكر، ان البلاي ستيشن 3 يعتبر ثاني أغلى جهاز في تاريخ ألعاب الفيديو- بعد جهاز أتاري -، ولكن تعلمت سوني مع البلاي ستيشن 4 ان هذا ماهو بالضرورة شي جيّد.
اليوم موقع AllThingsD كشف عن تفاصيل قطع البلاي ستيشن 4، وقال ان كل جهاز بلاي ستيشن 4 ينباع فعلياً يكلّف سوني حوالي 1430 ريال، بينما تبيع سوني الجهاز الواحد بحوالي 1500 ريال! الربح هذا يعتبر قليل جداً طبعاً، وطبيعي ان سوني ما راح تستفيد من هذا الربح البسيط شي كبير.
هذي بالنسبة لتكاليف التصنيع، فيه تكاليف ثانية هائلة الناس غالباً تنساها مثل تكاليف البحوث والتطوير اللي سوّتها سوني على الجهاز أثناء تطويرها عليه، برضو فيه تكاليف الدعايات، وهذي شيئين تكلف الشركات ملايين الدولارات!
من الأشياء اللي تستاهل الذكر في التقرير المذكور، ان الجهاز يحتوي على معالج AMD حجمه كبير بشكل غير عادي. يقول صاحب التقرير ان قطعة المعالج هي أكبر بثلاث مرات من أكبر معالج شافه! يمكن البعض تلقائياً يحسب ان هذا شي رهيب، لكن ذكر صاحب التقرير ان كبر حجم المعالج ما يعني بالضرورة ان هذا شي جيّد.
فيه عندنا غير كذا تكاليف تصنيع يد التحكم، وهي حوالي 65 ريال. برضو لا ننسى تكاليف الأسلاك اللي تجي مع الجهاز مثل سلك HDMI، وكل شي له تكاليفه طبعاً.
بشكل عام، تقدر تقول ان سوني ما تربح ربح يذكر من الأجهزة اللي تبيعها. واضح ان سوني محافظة على توجّهها اللي تعودنا عليه، وهو انها تكسب عن طريق الألعاب والاكسسوارات اللي تنباع لحالها، وهذي استراتيجية تتبعها سوني، عكس بعض الشركات المنافسة مثل ننتيندو اللي تربح من كل جهاز تبيعه، من أول يوم تبيع فيه الجهاز!
بعد تجربتي للجهاز، أيقنت ان الجهاز مصنوع صناعة رائعة. قطع الجهاز فيها فخامة واضحة، بالاضافة الى ان تصميم الجهاز ابداعي من الدرجة الأولى. توقعت ان تكاليف الجهاز بتكون أعلى بكثير من هذي التكاليف!
أعتقد ان سوني تمشي في الطريق الصحيح، تكاليف الجهاز ماهي مخيفة مثل أيام البلاي ستيشن 3. غير كذا، البلاي ستيشن 4 الكل يمدحه كجهاز. أبدعت سوني -وهذا شي ماهو مستغرب- من ناحية القطع (hardware) وغالب الناس تمدحها على هذا الشي!
وش رايك في موضوع تكاليف صنع سوني للبلاي ستيشن 4؟ هل توقعت ان تكاليفه بتكون قريبة من سعر البيع؟ شاركنا برأيك في التعليقات!
