محمد الشريف
صرّح رئيس سوني كاز هيراي (Kaz Hirai) في اجتماع لسوني ان بلاي ستيشن 4 احتمال ان أرباحه راح تتجاوز الأرباح اللي كسبتها سوني من الجهاز الأكثر مبيعاً في التاريخ، بلاي ستيشن 2.
في الاجتماع، واحد من الجمل اللي قالها كاز: “من المحتمل ان بلاي ستيشن 4 بيكون مربح أكثر من بلاي ستيشن 2”.
على ان سوني لا زالت تخسر مليارات الدولارات سنوياً، وعلى انها أعلنت عن ان الخساير ما راح توقف قريب، الا ان المستقبل فيه لمحة أمل كبيرة لسوني. تتوقع سوني انها تشحن 17 مليون جهاز بلاي ستيشن 3 وبلاي ستيشن 4 خلال السنة المالية الحالية.
هذي المؤشرات كلها تؤيد تصريح قاله قبل فترة واحد من مسؤولين سوني، وهو ان سوني ما عندها نيّة انها تخسر مع بلاي ستيشن 4 مثل ما كانت تخسر مع بلاي ستيشن 3، واللي خسرهم خساير كبيرة خصوصاً في بداية مشواره.
يقول ماسورو كاتو: “على عكس بلاي ستيشن 3، ما عندنا خطة ذاكرين فيها اننا بنخسر مع اطلاق بلاي ستيشن 4 مثل ما كنا نخسر مع بداية بلاي ستيشن 3”.
اللي ما يعرف، بلاي ستيشن 3 كان يكلف سوني الكثير في بدايته، بحيث كانوا يبيعونه بسعر 600 دولار (من أغلى الأجهزة في التاريخ) ومع ذلك كانوا يخسرون على كل جهاز ينباع 250 دولار. ايه، قيمة بلاي ستيشن 3 في بدايته كانت 850 دولار. تقدر تتخيل قد ايش سوني كانت تخسر عليه؟ شي كبير.
مع البداية الجبّارة لبلاي ستيشن 4، واللي قدر يصير أسرع جهاز منزلي مبيعاً في العالم، أتوقع المستقبل مشرق بالنسبة له. ومع دعم سوني الكامل للجهاز، أتوقع ان كلام كاز هيراي بيصير حقيقة، ولو انه صعب شوي انك تتوقع مثل هذا التوقع الكبير.
وش رأيك أنت، هل تتوقع ان بلاي ستيشن 4 يسويها ويتجاوز بلاي ستيشن 2 من ناحية الأرباح لسوني؟
احمد خالد
