محمد الشريف
في مقابلة مع آندرو هاوس (Andrew House)، رئيس قسم سوني للترفيه، تناقش عن موضوع يبدو انه راح يسبب مشكلة لسوني، وهو عدم اهتمام الناس بشراء الحزمة حقة بلايستيشن 4 واللي تحتوي على الكاميرا.
سألوه في المقابلة عن هالموضوع، وقال: ” بكل تأكيد، الناس اللي تشتري الأجهزة أول ما تنزل ما يكون لهم اهتمام كبير في التفاعل مع الكاميرا، وانهم غالباً يبغون بس يلعبون عن طريق يد التحكم العادية”.
برضو تكلم عن استعداد سوني لمستقبل الكاميرا بشكل متفائل، وانها مستعدة لبيع الكاميرا مع كل بلايستيشن 4 ينباع بحيث تصير شي أساسي مع الجهاز. لكن ماحد يدري وش بيصير في المستقبل، خصوصاً مع الاستقبال الضعيف للكاميرا في بداية الجهاز.
حتى عندنا في السعودية، أمس أعلنت سوني عن تاريخ وسعر اطلاق بلايستيشن 4، وسألت سؤال على السريع في مجتمعنا في جوجل بلس، وكانت أغلب الاجابات انهم غير مهتمين بالحزمة اللي فيها الكاميرا.
المشكلة ان سوني لها تجربة حديثة سيئة مع الاكسسوارات، مثل وحدة تحكم PS Move اللي حاولوا ينافسون فيها Xbox Kinect لكنها فشلت. نفس الشي مع PS Eye الكاميرا حقة بلاي ستيشن، اذكر اشتريتها لكن استخدامها الوحيد واليتيم كان تشغيل المايك وأسولف فيها أونلاين في حال عدم توفر سماعة الراس.
شخصياً، ناوي أشتري الحزمة اللي فيها الكاميرا. غالب الظن اني ما راح أستخدم الكاميرا كثير، ولا أتوقع اني راح ألعب الألعاب اللي تطبق تقنيات الجهاز مثل برنامج Play Room، لكن عندي روابط مالها تفسير مع اكسسوارات سوني. ريموت بلاي ستيشن 3 اشتريته في 2008 ولا زلت أستخدمه الى الآن اذا كنت أتصفح القوائم الرئيسية في البلاي ستيشن 3، مثل الفيديوات واعدادات النظام وحتى متجر بلاي ستيشن.
وش رايك في تصريح سوني عن كاميرا بلايستيشن 4؟ هل تتوقع انها اشارة لموت التقنية الواعدة؟ شاركنا برأيك في التعليقات!
احمد خالد
بارعة