مقالات

العاب نزلت بالجيل الماضي حافظت على مستوى أسلوب التخفي

MGSPW_091203_opn_13

من المعروف ان لكل لعبه لها أسلوب مميز خاص فيها، مثل لعبة سوبر ماريو (super mario) تميزت بأسلوب المناقز (Platform) المناقز من سنة 1985 لحد الان، وتعتبر من افضل العاب المناقز اذا ما كانت افضلهم، وألعاب مثل كول اوف ديوتي (call of duty) تميزت بأسلوب منظور الشخص الأول (FPS) وتعتبر من الالعاب اللي مارست هالأسلوب في العابها على مر السنين بطريقه ممتازة، وكل هالالعاب وغيرها الكثير اللي لها أسلوب مخصص في طريقة اللعب، لكن من بينهم كلهم فيه أسلوب نادر ومخصص للعبه بشكل كامل، وهو اسلوب التخفي، الغريب بالموضوع هنا ان الالعاب اللي تعتمد بشكل كامل على هالأسلوب قليلة مقارنة بالالعاب الثانيه، السبب هنا يرجع للمطور نفسه، ممكن لأن هالأسلوب المعين من الالعاب ما يجذب الكثيرين، أو ممكن انه يحتاج نظرة تطويرية تختلف عن باقي الالعاب، وممكن السبب يكون ان من الصعب تطوير لعبة تخفي بشكل كامل، لأن العاب التخفي تعتمد على شغلتين قوية بدونها ممكن تكون كارثة لهالصنف من الالعاب، وهي:

  • الذكاء الاصطناعي
  •  تصميم المراحل

هالعاملين برأيي اهم شيء في ألعاب التخفي، القصه ماهي شي مهم لهالنوع من الالعاب، وراح اذكر العاب نجحت بأسلوب التخفي رغم قصتها ما كانت بالمستوى المطلوب، مقالنا اليوم عن العاب نزلت بالجيل الماضي (PS3) (X360) وحافظت على مستوى التخفي اللي تعودنا عليه بالأجيال السابقة، وساعدت على انعاش هالنوع من الالعاب بوقتنا الحالي، اتركك مع القائمه عشان تقراها وكأنك تتخفى بلعبه من الالعاب اللي تحت.

Metal Gear Solid 4: Guns of the Patriots

mgs4photo

سلسلة ميتل جير سوليد، اقل شيء ممكن اقوله عن هالسلسلة العريقة ان لولا الله ثم هاللعبة كانت العاب التخفي مالها وجود بالوقت الحالي! سلسلة ترجع جذورها لسنين قديمه وبالأخص سنة 1987، من الالعاب اللي طورت وأحترفت وأقدرأقول انشأت أسلوب التخفي بعالم الالعاب، افضل من اي لعبه ثانيه، لكن الجزء اللي بنتكلم عنه اليوم من السلسلة هو الرابع واللي نزل حصري لجهاز (PS3) بسنة (2008). الجزء هذا وصّل متعة التخفي لدرجة عالية من ناحية الذكاء الاصطناعي للاعداء أو تصميم المراحل او ادوات التخفي الخاصه ببطل اللعبه سنيك، كانت موزونة وتعطي جرعة قوية بمتعة اللعب بشكل عام، غير انها من الالعاب النادرة اللي قدرت تقدم لعبة تخفي فاخرة مع قصة اقل ما يقال عنها ممتازة، غير قتال الزعماء الملحمي والصعب بنفس الوقت، تنوع الاعداء باللعبه كان جدا ممتاز ولا ينمل منه، الجزء الرابع من هالسلسله كان يقاس عليه قوة الجيل بوقته، وكان يعتبر فخر سواء لشركة سوني (sony) او لملاك اجهزة البلايستيشن 3 كحصريه لهم، غير تقاييم اللعبه اللي اقل ما يقال عنها اسطورية، كل هذا النجاح وغيره الكثير بلعبة كان هدفها الاساسي هو التخفي.

Deus Ex: Human Revolution

deusexpic

رغم ان هالسلسله ما نزل منها الا جزئين رئيسين، لكن اقدر اقول ان نجاح هالجزئين والعوامل اللي قدمتها لعالم الالعاب من سنة (2000) الى حد الان تعتبر انجاز بحد ذاته، الجزء الاول نزل بعام 2000 لاجهزة الحاسب الشخصي وبعام (2002) نزلت لجهاز البلايستيشن 2 (PS2). لكن نقاشنا اليوم عن الجزء الثاني بأسم الثوره الانسانيه (Human Revolution) واللي نزل بعام (2011)، بعد انتظار تعدى 10 سنين للجزء الثاني من السلسله، اقدر اقول انه ما خيّب امل أي عاشق للسلسله وأي عاشق للتخفي بشكل خاص، قصة اللعبه تتكلم بشكل عام عن منظمة الـ (إلوميناتي)، الجزء الثاني من السلسله كان مخصص بالدرجه الاولى كلعبة تخفي، والتخفي باللعبه كان جدا ممتع ومرن، تتحكم ببطل اللعبه بمنظور الشخص الاول، وكان هذا شيء يميز السلسله بطريقة التخفي الخاصة بها، ايضا الذكاء الاصطناعي للاعداء كان ممتاز، سواء البشر او الآليين باللعبه، وتصميم المراحل اقل ما يقال عنه ممتاز، غير عامل التهكير باللعبه يعطيك تحدي باللعب الى درجة حتى تطوير الشخصيه كان موزون وبصعوبه تقدر تطور شخصيتك، والمهام الجانبية ما تقل متعه عن المهام الاساسية، القصه كانت جيدة بنهاية اشوفها ما تليق الا للعبه من هالطراز الفاخر بعالم الالعاب، حصلت على تقاييم جدا عاليه ومبيعات ممتازة، اللعبه على اسمها كانت ثورهـ بتصميمها المميز واسلوب اللعب بشكل عام.

Dishonored

dishonoredpic

اللعبه الوحيده بالقائمه هذي ماهي مشتقه من جزء قبل، نزلت بعام (2012) على الاجهزه المنزلية والحاسب الشخصي، الاعلان الاول للعبه كان جدا ممتاز ولا غبار عليه وكان مبين ان اللعبه لها القدره انها تكون شيء قوي بعالم الالعاب ككل والتخفي بشكل خاص، والمطورين للعبه يحملون اسماء قوية بتطوير الالعاب وناشر معروف وهو (Bethesda) من اهم العابه سلسلة (Elder Scrolls)، اللعبه قدمت اساليب جديدة بعالم التخفي ومتنوعة، منها انك تتلبس بشخصية العدو او تتلبس بفأرلمدة محدوده او انك تنتقل من مكان لمكان بسرعه بتقنية الـ “Teleport” او انك تبطئ الزمن لفتره محدودة وغيرها الكثير. تتحكم ببطل اللعبه بمنظور الشخص الاول مثل لعبة (Deus Ex)، واللي يميز ديس اونرد عن باقي العاب التخفي هي قدرات البطل، متنوعة بشكل كبير وتضيف متعه للعبه، والافضل من هذا كله انها موزونة وكل قدره لها نقطة ضعف، تصميم المراحل باللعبه جدا عبقري ويعطيك صعوبة ممتازة عشان توصل للمنطقه اللي تحتاجها، رغم ان قصة اللعبه كانت ضعيفة بالنسبه لي، لكن اسلوب التخفي فيها وقدرات البطل وتصميم المراحل والصعوبه الموزونة في اللعبه كافية انها تكون واحدة من افضل العاب التخفي.

Splinter Cell: Blacklist

splintercellblacklistphoto

سلسلة التخفي من شركة يوبيسوفت (Ubisoft) سبلنتر سيل من العاب التخفي اللي تعتبر قديمة نسبيا ولها اجزاء كثيرة مقارنة باللسته اللي قلناها تو. اغلب اجزاء السلسلة كانت ممتازة من ناحية الذكاء الاصطناعي القوي للاعداء والادوات اللي يستخدمها البطل، اللعبه ضعفت شعبيتها مع جزء (Splinter Cell Conviction) وممكن يكون السبب هي التغييرات الكثيرة اللي صارت للعبة قبل نزولها، او زيادة اسلوب الاكشن فيها، وممكن الحصريه ضرتها، لكن الاكيد بالموضوع ان الجزء الاخير وهو (BlackList) رجع السلسله لمكانها الطبيعي، الجزء هذا كان قفزة ممتازة للسلسلة وكانت بحاجة له، اسلوب التخفي فيها كان جدا سلس ومرن وهذا شيء جدا ممتاز للعبة تخفي كاملة، الادوات اللي تقدر تستخدمها باللعبة جدا كثيرة وتعطي متعة ثانية باللعب، غير ميزة انك تصوب على اكثر من عدو وتطلق عليهم بنفس الوقت تلقائيا، تصميم المراحل كان ممتاز وأنتشار الاعداء بالمرحلة كان متكتك، اللعبه فيها لمسات بسيطة تعطي نتيجة ممتازة بألعاب التخفي، مثل اذا جيت تقتل شخص من وراه تقتله بطريقة سريعة وتكمل اللعب، وهذا شيء يضيف مرونة باللعب، غير انك تقدر تدخل بفتحات التهوية وتتعلق بالمواصير اللي باللعبه، نقدر نقول انها خاتمة ممتازة لألعاب التخفي بالجيل السابق.

أخيراً

هنا تنتهي مقالتنا عن العاب ابدعت وانعشت اسلوب التخفي في فترة صارت العاب التخفي شبه نادرة، بالأجيال السابقة مثل جيل الـ (PS2) و (Original Xbox) و (GameCube) كانت فيه العاب تخفي اسطورية، منها ثنائية ميتل جير سوليد 2 و3، الجزء الثالث من ثيف (Thief) على الاكس بوكس الاول والريميك الحصري لجهاز الجيم كيوب (GameCube) من الجزء الاول من سلسلة ميتل جير سوليد على البلايستيشن الاول، غير ثنائية هيتمان (hitman).

وش رايك بألعاب التخفي ككل؟ ووش هي الالعاب اللي استمتعت بالتخفي فيها؟ نبي نشوف ردك بالتعليقات

الوسوم
اظهر المزيد

محمد الدوسري

هاردكور جيمر من ايام الـ16Bit .. أغلب انواع الالعاب تعجبني .. وألعب بجميع الاجهزهـ المنزليه والمحموله والـPC بدون اي تفضيل .. سلاسل كثير تعجبني ولكن جميعهم بخلف سلسلة The Legend of Zelda .
إغلاق