مخرج ذا لاست اوف اس (The Last Of Us) نيل دركمان (Neil Druckmann) من معاناته مع عملية نقل لعبته من بلاي ستيشن 3 الى بلاي ستيشن 4 صار يتمنى ان في زر تضغطه يحولك اللعبة لبلاي تسيشن 4 مباشرة، يقول ان تحويل اللعبة للبي اس 4 كان مثل الجحيم! وان عملية التحويل مو عملية بسيطة و سهلة للمطورين.
يقول نيل: ” احنا كنا متوقعين ان العملية راح تكون صعبة ومعقدة من بداية التطوير و انها راح تكون زي الجحيم، وهي بالفعل كانت جحيم.” كمل نيل:” بمجرد مانشوف الصورة على الشاشة نلاحظ المشاكل، كل الاخطاء حتى البسيطة مثل كسر في الظل او في الاضاءة واحيانا اللعبة تعلق كل 30 ثانية، هذا كله بياخذ وقت طويل. احنا لما سوينا النسخة على البي اس 3، سويناها على اقصى امكانيات الجهاز و استخدمنا كل امكانياته. احنا عندنا افضل المهندسين في مجال الصناعة و بنحاول بكل جهدنا اننا نحول اللي سويناه في جهاز الي اس 3 الاحادي، الى جهاز قوي مثل البي اس 4، احنا نبغى نستخدم اقصى امكانيات الجهاز مثل ماسوينا مع بي اس 3″.
اضاف نيل:” الموضوع مااقدر اوصفه، وبمجرد مانخلص من التطوير ونجهز اللعبة، لازم نرجع ونختبر كل الاجزاء اللي سويناها مع بعض ونشوف اذا في اي شي جبنا العيد فيه مثل خراب فيزيائية اللعب او تغيير في الاضاءة بشكل مفاجئ و يعطي اللعب شكل غريب مختلف، هذي الاشياء اذا صارت مايعتبر اننا اتطورنا، لاننا ماسوينا شي مختلف. احنا مؤمنين اننا راح نتحسن.”
نيل كمل حديثه عن صعوبه ضغط اللعبة مع كل هذي الامكانيات و المواصفات:” بالنسبة لنا عنق الزجاجة هو: هل نقدر نحط الاشياء هذي كلها في قرص؟ لما نجي نعرض اللعبة على يوتيوب، الموقع بيضغط المقطع و ينزل الفريمات الى 30 فريم بالثانية، التريلر اللي نشرناه كان غير مضغوط وخليناه 60 هرتز عشان الناس يقدرو ينزلوه بجودته الكاملة، هذا المقطع البسيط اخذ مساحة جبارة!، احيانا صعب تلاحظ الفرق بين الاطارات، لكن لما تلعب على شاشة كبيرة وعالية الحودة…اللعبة راح تشتغل بشكل رايق و رهيب، بعد ماتجربها راح تحس بصعوبة انك ترجع تلعبها على جودة اقل، للاسف في النهاية مانقدر نظهر الشغل و التعب والجهد اللي بذلناه لتشغيل اللعبة بالجودة هذي.”
اخر شي صرح نيل انهم شغالين في نفس الوقت على لعبتين جديدة، مانعرف هي انشارتد ولعبة ثانية او لعبتين جديدة كليا.
الله يستر الاخبار كثرة عن الصعوبات و المشاكل، حاس نهايتها تاجيل للعبة، نشوف اش اخرتها معاهم و هل فعلا راح نشوف شي خورافي ولا لا.
اش رايكم تعتقدوا راح تتاجل؟ وهل منجد تشوفوا ان راح يصير شي خورافي و اللعبة راح تختلف ولا تعتقدوا ان الشغل كله تلفيق؟ شاركونا
