يزيد السويري
كثرت أجهزة الواقع الإفتراضي وإمتلئ السوق بالشركات المنافسة في نفس المجال. اليوم شركة Avegant بعد نجاح حملتها على موقع Kickstarter السنة الماضية أعلنت أن جهازها Glyph بينزل في خريف هالسنة بسعر 599 دولار.
الجهاز عبارة عن سماعة وفي نفس الوقت نظارة واقع إفتراضي بتصميم جميل وأنيق تقدر تستخدمه كسماعة رأس فقط أو الإثنين في نفس الوقت. اللي يميز الجهاز هو أنه في سماعات جاهزة وما تحتاج تلبس سماعة إضافية عشان تسمع صوت الألعاب أو الأفلام اللي تتفرجها. الجهاز فيه مستشعر حركة الرأس يعني ما تحتاج كاميرا أو جهاز إضافي عشان يتتبع حركة رأسك. وأيضا فيه ميزة عزل الصوت في السماعة المدمجة في الجهاز.
روعة الجهاز تستمر في عدد الأجهزة اللي يدعمها سواء كانت أجهزة جوال أو أجهزة كومبيوتر أو حتى أجهزة ألعاب منزلية. الجهاز يعتبر غالي مقارنة بأسعار منافسيه زي Oculus Rift اللي وصل سعره حاليا إلى 350 دولار و جهاز سامسونق Gear VR بسعر 200 دولار فقط.
الجهاز صراحة رهيب خصوصا تصميمه جميل جدا صحيح أنه يدعم أكثر من جهاز وفيه مواصفات حلوة إلا أنه سعره غالي صراحة بيكلفك حولي 2270 ريال. وش رأيكم شباب بالجهاز هل تشوفونه يستاهل سعره وناوين تشترونه أو لا؟ شاركونا أرائكم في التعليقات.
بارعة
احمد خالد
