في تصريح مثير للنقاش، تكّلم محلل الألعاب المعروف مايكل باكتر عن خدمة بلاي ستيشن ناو، خدمة سوني الجديدة والطموحة، اللي تعطيك امكانية لعب ألعاب أجهزة بلاي ستيشن السابقة عن طريق Streaming أو الانترنت، باشتراك شهري بيتم الاعلان عنه في المستقبل.
يقول مايكل باكتر:” خدمة بلاي ستيشن ناو نكته، مستحيل تلقى شركة نشر ألعاب بتعطي سوني وتدعم فيها خدمتهم الجديدة وتحط فيها ألعابها اللي مالها سنتين نازله السوق. القرار هذا ما راح يخلّي ألعابهم تنباع، لانها بهذي الطريقة بتكون متوفّرة للناس عن طريق الايجار. مستحيل تنجح خدمة بلاي ستيشن ناو”.
كلام قاسي جداً، ولا؟ ما أظن كلام يخلو من اندفاع واستعجال، وعلى ان الكثير متخوّف من هذي الخدمات اللي متطلباتها لا زالت كبيرة، مثل الانترنت السريع، الا ان ما فيه أحد في العالم يقدر يضمن نجاح الخدمة. خدمة مثل هذي بتحتاج وقت طويل جداً الين ما توصل لباقي دول العالم، غالب الظن انها راح تبدأ في أمريكا واليابان وأوروبا، وراح تبقى لفترة طويلة الين ما توصل لباقي الدول. هذا في حال نجحت طبعاً.
مشروع بلاي ستيشن ناو مشروع طموح جداً، سوني اشترت خدمة Gaikai بمبلغ هائل في خطوة فاجأت الجميع، وهذي هي تشتغل بكل ما عندها على المشروع الطموح، مشروع تشغيل الألعاب ولعبها عن طريق الانترنت.
أخيراً، مايكل باكتر من أكثر الناس اللي تثير جدل في عالم الألعاب، تصريحاته وتوقعاته غالباً تثير النقاش بين اللاعبين وهذا واحد من أهمّها.
تصريحين أذكرها لمياكل باكتر ما أنساها، أولها توقعه “لفشل ذريع للعبة بوردرلاندز بسبب نزولها مع Call of Duty: Modern Warfare 2” وطلع توقعه خاطئ واعترف فيه، وتوقّعه للنجاح الكبير لخدمة بلاي ستيشن بلس، في الوقت اللي الكل كان يقول عليها خدمة فاشلة وقت طلوعها، وطلع توقّعه صحيح!
وش رايك في تصريح باكتر وتشاؤمه على بلاي ستيشن ناو؟ وهل تتوقع النجاح لهذي الخدمة؟
