كول أوف دوتي الجديدة (Call of Duty: Ghosts) وصلت عندنا الرياض وباقي أنحاء الخليج العربي، وعلى ان وصول أضخم ألعاب السنة خبر جيد، الا ان فيه مشكلة كبيرة نعاني منها، وهي مشكلة السعر المبالغ فيه.
هذي المشكلة ما تصير مع كول أوف دوتي بس، لكنها تصير مع الألعاب المعروفة واللي ينتظرها الناس. لكن المشكلة هذي واضحة كل الوضوح في كول أوف دوتي بما انها أكثر لعبة (بالاضافة الى فيفا) يبالغون في سعرها، والأدهى والأمر من هذا كله ان رفع المبلغ ماله أي مبرّر. اللعبة تنباع برا المنطقة مثلها مثل أي لعبة ثانية غيرها (من 60 الى 70 دولار، حوالي 230 ريال).
عشان كذا، في مقالة اليوم بنحاول نشدّد على الحل لهذي المشكلة ولو ان الحل يعرفه كثير من اللاعبين، لكن طالما ان الأسعار لا زالت غالية بالنسبة للألعاب اللي ينتظرونها الناس، فهذا معناته ان الحل هذا ما استخدمه الا عدد قليل.
أما بالنسبة للحل، فالكثير من اللاعبين يعرفه، وهو شراء اللعبة عن طريق متجر البلاي ستيشن الرسمي (PlayStation Store) أو متجر الاكس بوكس (Xbox Live Marketplace) وبسعرها الرسمي. ناخذ كول أوف دوتي كمثال، كل اللي تحتاجه هو تنتظر الى بكرة (5 نوفمبر) وتشتريها من هناك. واللي ما يعرف كيف طريقة الشراء، بنشرح الخطوات لكن قبلها بنشرح خطوات شحن حساب البلاي ستيشن أو الاكس بوكس الخاص فيك بشكل مختصر.
أولاً، تقدر تشتري بطاقات الشحن من عالم بلاي ستيشن أو فروع سوني الموجودة في كل مكان (بطاقات البلاي ستيشن فقط)، أو حتى من أي محل ألعاب فيديو موجود. فيه بطاقتين متوفرة، بطاقة قيمتها 20 دولار (سعرها الرسمي 75 ريال)، والبطاقة الثانية 50 دولار (سعرها الرسمي 189 ريال). لا تنسى تراعي موضوع دولة البطاقة، اذا كان حسابك سعودي فلازم تشتري بطاقة خاصة بالمتجر السعودي.
أما بالنسبة لطريقة الشحن، فكل اللي تحتاج تسويه انك تسجل دخول للشبكة من جهازك، سواءً كان بلاي ستيشن 3 او اكبس بوكس 360، بعدين تدخل للمتجر، انزل الى آخر القائمة وتلقى كلمة Redeem Codes. أضغطها وبيطلع لك فراغات، حط الكود في الفراغات وفعّله وراح تنضاف لك القيمة حقة البطاقة. طريقة الشحن نفس طريقة شحن بطاقات الجوّال بالتمام.
أما بالنسبة لطريقة شراء اللعبة، فهذي هي
- سجل دخولك الى شبكة البلاي ستيشن أو الاكس بوكس لايف ماركت، على حسب جهازك.
- ادخل المتجر، PlayStation Store للبلاي ستيشن وXbox Live Marketplace للاكس بوكس 360ز
- اختر كلمة Search وابحث عن Call of Duty: Ghosts.
- اضف اللعبة الى قائمة الشراء عن طريق الضغط على Add to Cart.
- اختر Proceed to Checkout عشان تدفع مبلغ اللعبة.
- اذا دفعت المبلغ، راح يطلع لك اسم اللعبة وجنبها علامة سهم، اضغط السهم عشان يبدأ التحميل، وانتهينا!
ما أتوقع فيه أسهل من كذا. ولا؟ هذي الطريقة تقدر تتبعها مع كل الألعاب.
يا ليت كلنا نوقف مع بعضنا ضد الاستغلال السيء هذا، لو ان فيه سبب أو تبرير واضح لرفع السعر كان هانت علينا، لكن ما يهون علينا ان اللعبة يتضاعف سعرها مرتين وثلاث مرات بدون سبب!
