مقابلات

مقابلتنا مع رئيس Konami أوروبا في معرض يوم اللاعبين 2014

mohammedinterviewingkonamirep

في يوم اللاعبين 2014، سوينا مقابلة مع رئيس شركة كونامي أوروبا، السيد شينجي هيرانو.

سألناه في المقابلة عن أشهر ألعاب كونامي الحالية، وهي PES 2015، Metal Gear Solid V: The Phantom Pain، و P.T Silent Hills.

كيف بنشوف تأثير محرك Fox Engine على لعبة PES 2015 هذي السنة؟

لعبة بيس هذي السنة بتكون أفضل من السنوات اللي راحت، والشكر موصول لمحرك فوكس اللي قدرنا نستغله بشكل أكبر هذي المرة مع الأجهزة الجديدة.

وش تقصد بالضبط باستغلال المحرك بشكل أكبر؟

طريقة اللعب بتكون أفضل، بتكون سلسة أكثر.

لعبت ديمو اللعبة، لاحظت ان اللعبة تحسّن مستواها بشكل كبير. المناولات صارت أفضل.

ايه، ركزنا هذي المرة على تحسين المناولات، بالاضافة الى أشياء ثانية كثير.

لاحظت أيضاً في الديمو ان الذكاء الاصطناعي للحراس كان أفضل، بالاضافة الى ان الذكاء الاصطناعي تطوّر وصار أفضل من زمان.

من زمان كان من السهل انك تفوز اذا كنت تلعب ضد الكمبيوتر، أما الآن فطوّرنا الذكاء الاصطناعي بحيث صار من الصعب انك تفوز على الكمبيوتر.

هل نقدر نقول ان الديمو يمثل النسخة الكاملة من اللعبة من ناحية التجربة؟

الديمو يعرض لك شي بسيط من اللعبة. اللعبة الكاملة بتكون أفضل بكثير من الديمو.

بالنسبة لميتال جير، انتقلت اللعبة في هذا الجزء (ذا فانتوم بين) من لعبة خطيّة الى لعبة عالم مفتوح. وش السبب في هذا التغير الجذري؟

السبب في هذا التغيير ان ألعاب العالم المفتوح الآن صارت شي مطلوب من قبل اللاعبين، وحنا واثقين كل الثقة في ان كوجيما بيسوّي لعبة عالم مفتوح ممتازة.

ميتال جير سوليد 4 احتوت على الكثير من المشاهد لدرجة ان البعض اشتكى منها وقال انها طويلة. هل المشاهد بتكون طويلة في ذا فانتوم بين؟

(يضحك) سؤالك بيخليني أضطر أتكلم عن أشياء سرية ما أقدر أفصح عنها.

اللي أبغى أسأله، هل وقت اللعب بيكون طويل ولالا؟

ايه طبعاً، اللعبة عالم مفتوح وبيكون فيه أشياء كثير تسويها.

mohammedandkonamirepafterinterview

ننتقل للعبة سايلنت هيلز الجديدة. وش كان سبب تكوين P.T والكشف عنها بهذي الطريقة؟

حنا قدمنا اللعبة بشكل جديد ومختلف تماماً عن كل الألعاب. هذي أول لعبة في العالم يتم الكشف عنها بهذي الطريقة، وحنا فخورين بنجاح طريقة الكشف.

هل سايلنت هيلز بتكون منظور شخص أول أو منظور شخص ثالث؟

(يضحك) ما أقدر أتكلم عن هذا الشي الآن.

بالنسبة لفريق التطوير. من صاحب فكرة جمع Guillermo Del Toro (مخرج أفلام)  وكوجيما في لعبة وحدة؟ من اللي جا على باله يسوي شي زي كذا؟

كوجيما هو صاحب الفكرة. هو اللي طلب هذا المشروع والآن يشتغلون فيه.

طيب، بما ان كوجيما بيشتغل على اللعبة. هل هذا معناته ان فريق كوجيما (Kojima Productions) بيشتغلون على اللعبة؟ ولا بس كوجيما بينما باقي فريق التطوير من برا؟

اللي بيشتغل على اللعبة فريق من كونامي نفسها، ماهو بالضرورة كوجيما برودكشنز، لكن اللي بيشتغلون عليها مطورين من كونامي.

هل بيشارك في التطوير أحد من مطوّري سايلنت هيل القديمين (Team Silent) اللي اشتغلوا على الأجزاء الأربعة الأولى؟

لا.

هل فيه تاريخ محدد لنزول اللعبة؟

حالياً مافيه، كوجيما مشغول بميتال جير سوليد 5. لكن ثق تماماً ان سايلنت هيلز بتكون مرعبة.

وش رأيك في المقابلة والمعلومات اللي حصلنا عليها؟

الوسوم
اظهر المزيد

محمد الشريف

كاتب ومدير تحرير موقع سعودي جيمر. أعشق ألعاب الفيديو من يومي صغير (ايه كلنا كذا)، أحب ألعاب التخفّي والرعب، وأعشق سلسلة Metal Gear ولعبة Silent Hill وICO.
إغلاق