الرئيسية / أخبار / مقابلات / سوّينا مقابلة مع مخترع لعبة Bloodborne، وجبنا اجابات رهيبه على أسئلتكم

سوّينا مقابلة مع مخترع لعبة Bloodborne، وجبنا اجابات رهيبه على أسئلتكم

bloodborne5

قبل كم يوم ارسلتني سوني إلى مدينة طوكيو لمقابلة مخرج اللعبة الخرافية Bloodborne بالاضافة لمنتج اللعبة، وطبعاً تجربة آخر اصدار من اللعبة قبل نزولها.

رحت لمكتب الشركة في طوكيو، وللأسف ما قدرت اغطي شي كثير خارج حدود المقابلات. التصوير كان غالباً غير مسموح، بالاضافة الى ان المكتب نفسه كان ميّت مافيه اشياء كثيرة مثيرة للاهتمام. تحس كأنك داخل شركة مقاولات مو شركة تطوير ألعاب.

fromsoftwareoffice

قبل ما يجي دوري في المقابلات، سألت متابعيني في تويتر عن الاسئلة اللي يقترحون اسألها، وصراحة طلعت بأسئلة رهيبة واجابات أرهب، اخليكم مع المقابلات.

مع مخرج اللعبة Hidetaka Miyazaki (هايدتاكا ميازاكي)

mashhorwithmyazaki

س: هل القصة بتكون أعمق من اللي شفناها في سلسلة دارك سولز؟ وهل بنشوف نهايات متعددة حسب اختيارات اللاعب في اللعبة؟

ج: عالم اللعبة عالم غامض، وحبينا نترك أشياء كثيرة فيه لتفسير اللاعب. هل فيه نهايات متعدّدة؟ ما اقدر أعلق على هذا الشيء للأسف.
رأيي في جوابه: أعتقد انه هذا مجرد وصف آخر ل”القصة بتصير سطحية زي باقي سلسلة دارك سولز”. بالنسبة لي ماهي مشكلة، لكن اذا تهتم بالقصة فما اعتقد ان اللعبة بتكون مناسبة لك.

س: هل راح يتغير مستوى الصعوبة في اللعبة في الطور التعاوني؟ تزيد صعوبة الاعداء مثلاً؟

ج: الزعماء راح يكونون أقوى في حال كان معك صديق يساعدك، لكن ما اقدر اعلق حالياً على موضوع الاعداء العاديين.

س: ليش ركزتوا بشكل كبير على شخصية معيّنة لترويج اللعبة؟ نفس الشخصية اللي لابسه كوت ومعها سيف ومسدس استمرينا نشوفها لفترة طويلة.

ج: لان اللعبة راح نطلقها تحت مسمى جديد، فحبينا نترك انطباع قوي يتذكرونه اللاعبين.

س: وش الاشياء اللي ألهتمك في تصميم عالم اللعبة؟

ج: كتب الأدب اجمالاً. اقرا كتب الأدب بكثرة، واستفيد كثير من القصص والعوالم الموجودة فيها.

س: هل راح يكون فيه ارشادات اضافية للاعبين تسهّل لهم معرفة وش لازم يسوون؟ او بتصير زي باقي سلسلة دارك سولز اللي ما تاخذ الا ارشادات بسيطة جداً؟

ج: بتكون نفس الشي. نفضّل ان اللاعبين يتساعدون ويسولفون كثير عن اللعبة عشان يقدرون يتجاوزون مراحلها. ما نبي نعطيهم كل شيء جاهز لان ما راح يكون فيه متعة.

س: بما ان القتال صاير سريع في Bloodborne، هل تقدر تخلي الشخصية تشيل سيفين؟

ج: لا. بتضطر تشيل سيف (او سلاح قريب المدى) بالاضافة لسلاح بعيد المدى. الللعبة ما تصممت بحيث تسمح انك تشيل سيفين مع بعض.

بالمناسبة أغلب اجاباته كانت طويلة، لكن الترجمة اللي تجيني قصيرة جداً بالمقارنة. في البداية توقعت ان المترجم جالس “يفلتر” بعض المعلومات، لكن بعد ما سألتهم عن الموضوع قالوا ان ميازاكي اسلوبه عجيب بالكلام وممكن يوصف الاشياء باسلوب مطوّل وبكلمات غير دراجة. يعني بالعربي يتفلسف.

مع منتج اللعبة Masaaki Yamagiwa (ماساكي ياماقيوا)

mashhoorwithbloodborneproducer

س: كيف ناوين تخلين اللعبة مرضية لعشّاق سلسلة “سولز”، وبنفس الوقت تجذب اللاعبين الجدد؟ لان اللاعبين الجدد ممكن ما تجذبهم الصعوبة الكبيرة في سلسلة سولز.

ج: بصراحة ما عمرنا فكرنا فيها بهالطريقة. كل همنا اننا نسوي شي جديد و “طازج” بالنسبة للاعبين. ما راح نحاول نسوي اي شي عشان نجذب جمهور جديد او نحافظ على الجمهور الحالي.

س: كيف شعورك وانت تشوف الناس يعاملون اللعبة كجزء جديد من سلسلة سولز، بدال ما تكون لعبة جديدة ومستقلة مثل ما ذكرتوا انتوا ومثل ما تسوقون لها؟

ج: بغض النظر عن كيف يشوفونها الناس، اكثر شي يهمني انهم يستمتعون فيها.

س: مين صاحب فكرة اللعبة؟ هل سوني كلمتكم وطلبت انكم تسوونها بما انها حصرية، او انها فكرة موجودة مسبقاً؟

ج: ميازاكي (مخرج اللعبة) كانت عنده الفكرة من زمان. يجمّع افكار كثير عنده، وفكرة هاللعبة كانت وحده منهم. بعد ما تواصلوا معنا سوني بخصوص اننا نتعاون معهم، قرننا ننفذ هالفكرة اللي عندنا.

س: وش استراتيجية المحتوى الاضافي لهاللعبة؟ هل راح تكون اشياء سطحية او اضافات معتبرة للعبة؟

ج: مافيه خطط واضحه حالياً، لكن الأكيد انها ما راح تكون مجرد ملابس او اسلحة. نفضّل اننا نسوي اضافات تكبّر عالم اللعبة او تضيف مراحل اضافية.

—-

هذا كان بالنسبة لمقابلتي مع المخرج والمنتج، حاولت اختصرها قدر الامكان عشان اعطيك الزبدة. بعض الاسئلة اللي وصلتني للأسف ما كنت اقدر استخدمها في المقابلة لضيق الوقت، ولأني عارف انه مستحيل يجاوب عليها بدون اعلان رسمي (زي هل بتنزل على البي سي).

شاهد أيضاً

كل ما تحتاج معرفته حول معرض #يوم_اللاعبين العاشر – Gamers’ Day 10th (محدّث)

في كل عام تقوم بلايستيشن السعودية بإنشاء معرض يوم اللاعبين والذي يقام في الرياض. معرض يوم اللاعبين هو فعالية ﺑﻜﻞ ﻣﺎ ﻫﻮ ﺟﺪﻳﺪ ﻓﻲ ﻋﺎﻟﻢ الألعاب الإلكترونية.

  • Iwill

    القصه سطحيه 😀
    وصف دايخ :/

    اعتقد الشباب ما قصرو ووضحو كيف طريقة سرد قصة السولز وكيف تحصل عليها
    شخصياً جلست فتره طويله وانا اقرا عن القصه والنظريات
    وشايف العمق اللي فيها

  • zsz46

    تصدق انا قبل كذا شفت له صورة و حسبت انه دب
    استغربت لما شفت صورتك معاه بس ممكن نحفان

  • zsz46

    تمنيت لو انكم جبتم الفلسفه حقت ميزاكي و كتبتوها على الأقل في موضوع ثاني لأن الموضوع يهمني جدا
    لأن فلسفته بنسبه لكم مجرد كلام و زيادة
    لاكن بنسبه لي و لعشاق اللعبة بيفرق كثير في كلامه

  • zsz46

    ايش قصدك بأن القصه ماهي عميقة في Souls
    اوك اللعبة الثانيه ممكن لأني ما حبيتها
    بس الأوله القصه جدا عميقه
    و الأسئلة الي مالها اجوبه كثيره جدا
    و الشرير ماهو واضح من الطيب
    بالعكس تماما قصة اللعبة الأوله خورافيه و عميقه جدا و القصه نفسها فيها قصص ثانيه داخلين مع بعض
    مثل فرسان جوين و مانوس الي في الـDLC
    و قصه ارتوريوس و كلبه و انت
    و اجمالا قصة المختار (انت) في اللعبة و علاقته في الشخصيات

  • البابكري

    جواب السؤال الثالث يخليك تفكر شوية… يمكن يلمح انه اللعبة بتنزل للاكس بوكس و البيسي بس باسم مختلف > نفس ما صار للعبة ديمون سولز

  • Ali Salih

    شوقتني اكثر للعبة

  • ايسزلق

    سطحية سطحية يا ظالم ابي اعرف انت تلعب و انت مغمض عيونك ولا ايش شكلك انت بس راعي فيفا الله يهديك

  • Bandar Abu Shamah

    مع اني لست من عشاق سولز، بس احتمال اقتحم بلدبورن <<< يا خطير انت

    • djxlegend

      عطها فرصه
      انا قبل كنت اكرهه شي اسمه دارك سولز
      بعد ماجربتها وعطيتها فرصه حبيتها جدا

  • djxlegend

    بالنسبه للقصه انا اوافق الشباب تحت بالردود
    واضح جدا انك يامشهور كنت تسلك اثناء لعبك لدارك سولز 2 هههههههـ !
    القصه كانت من اعمق واغمض القصص الي مرت علي
    اسلوب دارك سولز يعتمد على الاستكشاف البحت حتى بالقصه
    لازم تفهم كلام الـ nps وتشوف وصف الاسلحه وسبب وجود الزعماء الغامض!
    واشكالهم وتصرفاتهم

    لما فهمت قصه دارك سولز 2 ولله بغيت ابكي من روعتها بذات انها من النوع الغامض وهذا الي شدني اكثر باللعبه

  • الف

    شكلك رايح بدون واسطه

  • Falcon

    تحياتي مشهور
    سمعت انك عملت مقابلة مع هارادا مخرج تكن
    متى راح تنزلو المقابلة ؟

  • عبدالرحمن

    ليا اكثر من 64 ساعة العب في شخصيتي الاساسية في دارك سولز 2 ولسا ماختمت من اللعبة الا اكثر من النص بشوي

  • Silver_Ghost99

    عز الله ما جبت علم …. ، لو انك جلست بالسعودية احسن لك

    كل ما سسألته عن شيء قال عفواً لا استطيع التعليق

    لا يا شيخ

  • ƨ§ζяεαм_¤ḟ_ĐêаṰħ

    مشكلتك يامشهور إنك دايم تدرعم وتتكلم بدون ماتفكر تحكم على الشيء من المظهر وطبعاً دارك سولز إنت الي تصنع السيناريو الخاص بك وتربط الاحداث بنفسك مشكلة والله ولازم تلقى لك حل على الاقل قلت بنسبة لك مب تعمم

    • djxlegend

      هذي مشكله مشهور تفكيره درعمه ويبي كل شي بسرعه وانتقاداته غريبه احيانا

  • hotDemon

    ههههههههههههههههههههههههههههههههههه قصة دارك سولز سحطية ؟؟؟؟!!!!
    قصة دارك سولز عميقة وغامضة وجميلة جداً
    مو غريبة ايضاً على موقع قال ان قصة اساسنز كريد سحطية رغم عمقها الكبير جداً
    قصة عبقرية فعلاً
    لكن استغرب من انكم جالسين تظللون الناس بأفكاركم الخاطئة عن شي مافهمتوه بسبب تعقيدة وعمقة على الشخص العادي
    ودائما انتو كذا في موقعكم ترون الأشياء بنظره سحطية وليست عميقة !!

    • سحطيه ! سطحية

    • أبو حبش

      نعم هذا صحيح ان موقع سعودي جيمر يهدف الی تضليل امتنا الاسلامية بالافكار السحطية وهذا شيء لا نرضاه لأنفسنا ولا لأبناء امتنا يجب تدمير هذا الموقع قبل ان ينتشر وينشر معه افكاره السحطية الدهامة

  • TANGASH

    بالنسبة ل BLOODBORNE فانا متحمس لها بشكل مو طبيعي لانها حسب الكلام بتعتمد على الهجوم اكثر من الدفاع وانا احب الاجواء الجوثيك وفكرة القبو اللي يتغير كل ما تزوره ممتاز ة تخلي اللعبة دائما فيها تجديد
    +
    سؤال حسب تجربة اللعبة هل شفتها اصهب من سلسلة الدارك سولز؟؟؟؟؟؟؟؟؟؟؟؟؟؟؟؟

    • ايسزلق

      اقطع يدي لو ختمتها هههههههههه

      • TANGASH

        خسارة يدك اخوي بالقطع
        ليش تريد تقطعها؟؟؟؟؟؟؟؟

        • ايسزلق

          بس مقهور ما عندي سوني فور عندي xo للاسف

        • المجهول

          صح خسارة تقطع يدك اقطع راسك
          امزح

  • TANGASH

    مشكور جدا على المقابلة ميازاكي اسطورة بالنسبة لي ديمون سولز وبعدها دارك 1-2 متعة والقصة مو سطحية بالعكس بس عميقة عالم السولز عالم تصنعه بخيالك عكس اغلب الالعاب اللي تقدم كل شيئ بوضوح وسهولة اللي يريد يعرف عن اسرار اللور الخاص باللعبة يشوف قناة VAATIVIDYA قناة خرافية تشرح لك كل شيئ ةحتى اشياء ما تكون على بال اي شخص

  • عبدالرحمن السناني

    ما اعرف ليش بعض لعيبة السولز يسلكون لقصة اللعبة لحد يفهمني غلط انا احب دارك سولز حتى ان الجزء الثاني ختمته 6 مرات وتقريبا جربت اساليب قتال كثيرة بالاونلاين السيفين و السيف ودرع الخناجر الكروسبو الاسلحة الضخمة الكاتانا،،،،،،،إلخ بس تروا القصة عبارة عن اقرا واستنتج فقط فيه العاب فيها ذا الاسلوب زي ميتل قير واساسين كريد وفي نفس الوقت تقدملك قصة قوية كعروض سنمائية واحداث وحوارات عكس سلسلة السولز اعتماد كلي على انك تقرا

    • TANGASH

      اخوي ما احد يسلك لقصة اللعبة اولا في فرق بين ميتال جير واساسين والسولز لان ميتال واساسين قصة معقدة ولكن تتكشف لك خلال لعبك للعبة ولكن السولز غير ميازاكي يخلي كل شيئ جزء من قصة اللعبة لذلك اللور الخاص بالسولز اصخم بكثير من بقية الالعاب كل وحش تقابله كل سلاح تاخذه والاشياء اللي تحصلها لها تاريخ وحتى شخصيات تظنها عادية تمر عليها لها تاريخ انا قضيت اكثر من 10 ساعات اتابع واقرا حتى فهمت اللور لدارك سولز ا
      لوتقدر اخي انا نصحت بصفحة لواحد اسمه vaatividya موضح كل شيئ بلور سلسلة اسولز كلها وايضا شارح لمقدمة البلودبورن

  • waleedovic

    عندي سؤال لكم : وش الفرق بين المخرج والمنتج ، انا اعرف ان مايازاكي هو صاحب فكرة اللعبة وسلسلة السولز، لكن هل يشارك في برمجة اللعبة وتصميم البيئة والأسلحة والشخصيات والاعداء ولا بس يعطيهم الأفكار ؟ وماهية وضيف المنتج بالظبط ؟

  • Zero

    الحين عرفت ليش ما اشوفك بلموقع هل الايام بس اللعبة صعب احصلها بلسوق وايضا شبه مستحيل تحميلها من الستور تعرفون نت معفن لاقصى الحدود بس 512 كب وايضا نظام الاون لاين جدا عجبني يعني يصير الزعيم اقوى انا اذا حشتريها بشتريها
    بس حق new game plus

  • fayoozy

    مقابله مميزه ما قصرت مشهور ويعطيك العافيه والحمدالله على السلامه
    واضح انك ما نمت زين

  • Alhasan.

    القصة في سلسلة سولز ما كانت سطحية أبداً، لكن يبغالها فصفصه. يعني لازم تقرأ معلومات الأسلحة و الدروع و الأدوات إلخ عشان تقدر تتعمق في القصة و تعرف كيف الأشياء مرتبطة في بعض. و هذا من وجهة نظري من الأشياء الرهيبة في اللعبة، إنها تجبرك تتعمق عشان تعرف القصة. و تقدر تبحث في اليوتيوب عن Dark souls lore عشان تفهم القصة و الشخصيات أكثر.

    • عبدالرحمن السناني

      المشكلة ان كثيير من الالعاب تقدملك قصة لازم تحلل وتستكشف عشان تعرفها وبنفس الوقت تقدملك قصة واضحة حلوة زي اساسين كريد وميتل قير اما سلسلة السولز بشكل عام فالقصة بالكامل عبارة عن انك تقرا هذا صار كتاب وليس قصة

  • The gamer 999

    طيب بعد ما جربتها كيف انطباعك عن اللعبة

  • NawafKF

    القصة سطحية ؟!
    اعتقد انك لم توفق في اختيار المصطلح الصحيح لوصف القصة
    ممكن تقصد غير واضحة أو مخفية عشان كذا ميازاكي ما حب يوضح أي شي عنها .
    قصص ألعاب هالمطور عميقة جداً لدرجة إنه فيه قنوات عاليوتيوب مبنية على شرح القصة (vaatividya مثلاً) , و تحصل كل قناة من هالقنوات لها تفسير مختلف في بعض الأشياء المبهمة في اللعبة , لأن القصة في هالألعاب مقسة لثلاثة أقسام حسب كلام ميازاكي : قسم يجيك من اللقطات السنيمائية و الإن بي سيز (NPCs) , قسم من وصف الأسلحة والآيتمز , وقسم يبقى مجهول وهنا تجي التفسيرات المختلفة.

    • عبدالرحمن السناني

      كثييييييير العاب تعتمد على ذي النقطة وكمان فوق ذا انها تقدملك قصة خرافية زي اساسين كريد وميتل قير اما موضوع انه قصة كاملة عبارة عن اقرا اوراق !!WTF

      • NawafKF

        انا لما قلت “قصة” كنت اقصد فيها الـ Lore مو الـ Story

        الـ Story : هي الأحداث المتتابعة اللي تصير في اللعبة . مثلاً ( إيزيو راح قتل فلان , و بعدها راح وكلم أخته , بعدها راح و سرق الكنز , و في الأخير راح وأنقذ فلان ) وكذا.

        أما الـ Lore : هي أي معلومة تقدمها لك اللعبة بطريقة غير مباشرة , سواءً عن طريق البيئة أو عن طريق أساليب أخرى في اللعبة (مثل الآيتم ديسكريبشن في دارك سولز , أو الكتب والجورنالز في سكايرم أو حتى الميموري سيكونس في باسشن).

        و الفرق بينهم إن الـ lore عادةً تحتاج جهد إضافي من اللاعب عشان يكتشفها , أما الـ story فتعطى للاعب بمجرد تقدمه في اللعبة .

  • عبدالله

    ليش ما سألته كل اللعبه صارت ماسونيه والحاد ؟؟

  • djxlegend

    مقابله رهيبه مشكور يامشهور
    اللعبه واعده وان شاء الله تطلع قد التوقعات
    انا رافع سقف امالي للعبه اتمنى مايخيب ظني بالعاده ماحب اعطي هايب للعبه
    لكن هذي استثناء

  • osamamii

    صدمني تعليقك بأن قصة دارك سولز سطحية !
    العالم الآن داخله نقاش قوي : هل Bloodborne لها علاقة بـdemon’s souls ؟ وهل تعتبر تكمله لها ؟
    نقاشات جامدة ونظريات كثيرة ! يكفي النظريات الي نزلت وقت صدور دارك سولز 2 وارتباطها بالجزء الاول .

    على كل حال يعطيكم العافية على المقابلة , كان ودي يتوسع في الجواب حول مصادر الهامه ويذكر اشياء محدده :/

  • Zeyad ghanim

    متى اروح اليابان انا كمان 🙁

  • فارس الزهراني

    عيال ما تلاحضون انا عيون مشهور تشبه عيون اليابانين ^_^

    • محمد احمد

      الله يرحمك يا لغتنا

  • ƨ§ζяεαм_¤ḟ_ĐêаṰħ

    شيئ طبيعي بيتفلسف واللعبة موجهه لجمهور معين طبعاً ماراح يكونون كثار

  • الجهني

    قصة السولز سطحية لووووول
    علعموم اللعبة راح تكمل مسيرة سلسلة السولز اسطورة 🙂

  • fall

    استغرب كيف توصف قصة اللعبة بالسطحية !! .
    القصة من ديمون سولز وهي مو مصممه انها تكون واضحه ، مهم انك تكلم ال NPC’s و تقرأ التوضحيات للأسلحه والايتمز علشان تكون عندك خلفية عن الي يصير بعالم اللعبه ، ما اتوقع اي حد تعمق بالقصه وحاول يقرأ lore للعبه وشافها سطحيه ، اتمنى مع تجربتك لبلود بورن انك تحاول تتعمق باللعبه .

  • جعفر

    ياخي فيه شيء ازعجني بالمقابله !
    هذا الكلام

    (رأيي في جوابه: أعتقد انه هذا مجرد وصف آخر ل”القصة بتصير سطحية زي باقي سلسلة دارك سولز”. بالنسبة لي ماهي مشكلة، لكن اذا تهتم بالقصة فما اعتقد ان اللعبة بتكون مناسبة لك.)

    ياخي كيف قصص دارك سولز سطحية ؟ القصة عميقه جداً اكثر مما تتخيلها ! مو السالفة تمشي وتقتل اعداء وبس !
    استكشف العوالم شوف الايتمات الي عندك واقرأ واقرأ واقرأ !! .. في الايتمات في الاسلحة في الدروع في كل شي موجود باللعبة حاول تتأمل فيه راح تشوف انك في عالم عميق وقصة عميقة واحداث مو ممكن تتخيلها ..

    لكن بجد ما يعطي اللعبة حقها الا جمهورها ! ..

  • عبدالعزيز

    “رأيي في جوابه: أعتقد انه هذا مجرد وصف آخر ل”القصة بتصير سطحية زي باقي سلسلة دارك سولز”. ”

    سطحية؟!
    لو فتحت اليوتيوب 5 دقائق بس راح تعرف انه ما عندك سالفة

    سطحية قال *زفير*

    • DAHMOOONY

      القصة في سلسلة السولز في الواقع عميقة و واسعه. لكن طريقة سردها للقصة تختلف عن السياق المعتاد,فهي تعتمد على أن اللاعب يبحث بتمعن في الأشياء و الحوارات التي يسمعها من الشخصيات و أيضا البيئه المحاط بها. بعد ذلك اللاعب يربط و يستنتج السيناريوهات اللتي حصلت إستنادا بالتلميحات اللتي عثر عليها.
      الكثير من اللاعبين لم يستوعبوا هذا الشيء عند لعبهم تلك الألعاب فيلجئون إلى الإفتراض أن قصتها سطحية.

      بإختصار,قصة سلسلة السولز عبارة عن حروف غير منقطة;يجب على اللاعب إيجاد محل النقط و يضع النقاط ليرى الصورة كاملة.

    • Daruko

      كنت راح اقول نفس اللي قلته..!!

  • Saif Ahmed

    قسم بالله تستاهل يا مشهور لقب : (( ملك الرهيبين )) … على المجهود اللي سويته … خصوصاً لأننا متحمسين لهذ اللعبة و انت حمستنا لها

    #شكراً_لك

  • Najrn1

    كلام كبير والله,,,,,,