يزيد السويري
تكلم Chris Charla مدير برنامج ID@Xbox في آخر حلقات بودكاست Inner Circle podcast عن حصرية لعبة No Man’s Sky على جهاز سوني وقال:
“بودي أشوف لعبة No Man’s Sky على الإكسبوكس ون لكن هالشيء راجع للمطور Hello Games”.
الأخ Chris عارف أن فيه كثير من المطورين قد يتجنبون مايكروسوفت بسبب سياسة شرط التكافؤ ( Parity Clause ) لكن أكد أن المطورين يمديهم وبسهولة يتواصلون مع مايكروسوفت ويتكلمون في الموضوع وقال:
“إذا كنتم شايلين هم سياسات الشركة حنا نحاول نخلي طريقة التواصل معنا سهلة قدر المستطاع. حنا نحاول نكون شفافين جدا إذا جينا نتكلم مع المطورين. لا تفترضون أن الكلام اللي تقرونه في موقع زي Neogaf هو سياستنا اللي نتبعها في الشركة، تعالوا تكلموا معنا.”
شرط التكافئ يتطلب أن الألعاب تنزل على الإكسبوكس ون بنفس اليوم اللي تنزل فيه هذه الألعاب على البليستيشن 4 والبي سي وهذا الشيء سبب بلبلة بين اللاعبين والمطورين. قد تكلم فيل سبنسر مدير قسم الإكسبوكس عن سبب وضع هذا الشرط وهو عشان ما يحس اصحاب جهاز الإكسبوكس بأنهم أقل من غيرهم لكن هالشيء ممكن برضو يحرم هذولي اللاعبين من ألعاب كانوا يتمنون أنهم يلعبونها على جهازهم بسبب هذا القرار التجاري البحت.
في بداية الشهر صرح Chris أن مايكروسوفت مهيب متشددة مرة في موضوع شرط التكافؤ زي ما يعتقد بعض الناس وقال:
“إذا فيه حالات أن المطور يحتاج أنه ينشر لعبته على جهاز واحد دون الثاني بسبب أنه ما عنده موارد كافية أنه ينشر اللعبة على الجهازين بنفس الوقت حنا نتفهم هالشيء تماما ولا عندنا مشاكل أبدا. هدفنا من هالحركة هو أننا نظمن أنه إذا فيه مطور يبي ينشر لعبته على الإكسبوكس ون بإمكانه فعلا ينشر لعبته على الإكسبوكس”.
أضاف Chris أن مايكروسوفت ما تبي المطورين ياخذون فلوس عشان عقود حصر ألعابهم على جهاز معين وبعيدن ينزلون لعبتهم بعد كم شهر على جهاز الإكسبوكس بدون ما يضيفون شيء يخلي نسخة الإكسبوكس تجربة طازجة لملاك الجهاز.
وش رأيكم شباب بكلام Chris؟ شاركونا أرائكم في التلعيقات.
احمد خالد
بارعة
