أخبار

ننتيندو تقول لنا ليش ما تبغى تطلق جهازها الجديد والصغير New Nintendo 3DS في أمريكا

3dsphoto

تخبطات شركة نينتندو (Nintendo) كثيرة جدا، واحد منها انهم نزلوا جهازهم المحمول نينتندو ثري دي اس الجديد (New Nintendo 3DS) في منطقة امريكا الشمالية واوربا باحجام مختلفة بحيث في امريكا الشمالية مافي غير النسخة الكبيرة من الجهاز اللي اسمه نينتندو ثري دي اس اكس ال الجديد (New Nintendo 3DS XL). حتسال نفسك اش الفرق بين النسختين؟ طبعا الصغير في منه الوان مختلفة للازرار و تقدر تضيف عليه استكرات خارجية رهيبة، هذي احد الفروقات الموجودة.

قبل شهر صرحت نينتندو عن هذا الخبر وقالت: ” احنا نعتقد ان جهاز نينتندو ثري دي اس اكس ال هو المناسب لمستهلكينا” وتم سؤال نينتندو اذا في اي امكانية ان الجهاز ينزل في امريكا الشمالية بالمستقبل وقالت الشركة: “مافي اي شي نقدر نعلن عنه حالياً”

الثري دي اس الجديد و الثري دي اس اكس ال الجديد نزلوا فقط في اليابان في الخريف الماضي واخر احصائية نزلت للجهازين كانت تقول ان مبيعات الثري دي اس اكس ال الجديد (الكبير) متفوقة على الصغير بالضعف. واذا مهتم اكثر باحصائيات ثانية لنينتندو، كتبنا خبر عن مبيعات الاميبو الرهيبة حول العالم.

موزّع ننتيندو في السعودية غالباً يجيب منتجاته من أمريكا، ماهو من أوروبا. فأي قرار يخص ننتيندو في أمريكا احتمال يكون له أثر في سوقنا المحلّي.

في نفس الوقت دامون بيكر (Damon Baker) رئيس التسويق لنينتندو في امريكا كان متوقع هذا الاستياء من الجماهير وقال: “احنا ماراح نوصل لاتفاقية مع اللاعبين حول حجم الجهاز الافضل اللي نبيعه، لكن احنا نبغا نوسع اساسنا، ونبغا نسهل عملية التسويق للمستهلكين، شوف مااختلف معك ان الاستكرات الخارجية مرة رهيبة، لكن احنا سوقنا مختلف شوي، الان احنا عندنا اختلاف واضح بين الثلاثة اجهزة – ثري دي اس، ثري دي اس اكس ال الجديد و تو دي اس (2DS)-. من قبل كان الفرق جدا بسيط بين الثري دي اس و الثري دي اس اكس ال، بغض النظر عن فرق الحجم، الجهازين لهم نفس الوضوح ونفس الخصائص، الان عندنا التو دي اس و الثري دي اس و الثري دي اس اكس ال الجديد، كل جهاز له خصائصه الخاصة فيه ومميزاته. واختلاف الاسعار بينهم يوضح للمستهلك اختلاف الخصائص بينهم بشكل واضح.”

زبدة كلامه انهم مايبغوا ينزلوا اجهزة خصائصها قريبة من بعض، يبغوا يقللوا حيرة المستهلك و يخلوه عارف الفرق بين كل اجهزتهم المحمولة، اشوف طريقتهم نوعا ما صحيحة لاني حتى انا وانا اكتب هذا الخبر تهت من اسماء اجهزتهم.

وش رأيكم بكلام ننتيندو؟

الوسوم
اظهر المزيد

أحمد قربان

طالب جامعي ، يدرس في جامعة الملك عبدالعزيز بجدة ، تخصص هندسة صناعية ، اعشق العاب البلايستيشن و مدمن فيفا ، احب العاب الاكشن و المغامرات واي لعبة فيها كريتفتي او شيئ جديد
إغلاق