واحد من الموظفين الكبار السابقين في ننتيندو طلع اليوم ينتقد الشركة ويوصفها بأنها شركة تقليدية بزيادة وان القرارات صعب تتخذها فيها.
يبدو ان Dan Adelman ما عنده أي مشكلة انه يتكلم عن الأعمال الداخلية للشركة اللي كان يشتغل فيها. دان ترك الشركة في شهر أغسطس من عام 2014 ومن بعدها أطلق كم تصريح ناري، واحد منها وصف اسم جهاز Wii U بأنه اسم ” سيء للغاية”.
” هذي الشركة تقليدية جدًا، ومركزّين على عنصر التسلسل الهرمي واتخاذ القرار عن طريق تصويت المجموعات”.
المقصود بالتسلسل الهرمي هو ان الشخص اذا يبغى يتخذ قرار فلازم يرجع للشخص الأعلى منه وظيفياً، والشخص الأعلى منه يروح للشخص الأعلى، وهكذا الين يوصلون لأعلى شخص. طريقة اتخاذ القرار هذي قديمة، لانها تاخذ وقت أطول من المفروض.
” للأسف، هذا الشي يكوّن سلوك معيّن يخلّي كل اللي في الشركة يشتغلون كأنه مستشار أو ناصح، وليس متخذ للقرار. حتى السيد ايواتا (المدير التنفيذي لننتيندو) ما قد شفته يتخذ قرار عكس القرارات اللي يتخذونها باقي الأعضاء التنفيذيين في الشركة”.
” هذا الشي ماهو بالضرورة شي سيء، لكنه ممكن يكون شي يستهلك وقت طويل وغير كفؤ. المشكلة في هذا انه لو شخص واحد فقط وقف ضد القرار، فالقرار بيموت على طول. لذلك فالأفكار الجريئة مستحيل تمشي في الشركة، الا اذا اتخذها واحد من الأشخاص اللي في قمّة الهرم”.
أخيرًا، انتقد دان الشركة وقال ان عندهم ناس عقليتهم قديمة:
” أغلب التنفيذيين الموجودين في ننتيندو كانوا موجودين من أيام NES و Super NES (أجهزة قديمة لننتيندو) ولا يفهمون الألعاب بشكلها الحديث. لذلك فطريقة استيعابهم وفهمهم لأشياء مثل الأونلاين وقائمة الأصدقاء وتفهّم سالفة ان البي سي يطلع بشكل سريع هو تفهّم بطيء جدًا”.
ننتيندو سوّت قبل فترة بسيطة حدث أعلنت فيه عن أشياء رهيبه، وبعدها أعلنت عن اغلاقها لنظام المكافآت حقها.
وش رأيك في تصريحات دان؟
