أحمد قربان
بعد ماشفنا اجهزة ننتندو الجديدة، الوي يو (Wii U) و الثري دي اس (3DS)، و بعد ماطلعت الاخبار عن خسائر الشركة في المبيعات. صرح رئيس ننتندو ساترو ايواتا (Satrou Iwata) انهم شغالين على جهاز جديد على الرغم من قرب اصدار اجهزتهم الحالية. وقال انه طبيعي والشي المفروض انه بعد ماتصنع جهاز، تبدأ تشتغل على جهاز بعده مباشرة.
قال ساترو:” لما نطلق جهاز جديد، طبيعي نبدأ نستعد لجهاز اجدد، و طبيعي ناخذ كم سنة عشان التصنيع و تهيئة الجهاز، فإذا تسألونا هل شغالين على جهاز جديد؟ الجواب الصحيح انه احنا دائما شغالين على جهاز جديد.”
ايواتا مااعلن اي شي عن مواصفات او هيئة الجهاز، مانعرف هو جهاز منزلي او جهاز محمول او شي مختلف كليا. الشي الوحيد اللي وضحه انهم ماعندهم نقص في الافكار الجديدة وانه عندهم افكار جاهزة ورهيبة.
قال ساترو:” اقدر أأكد لكم انه احنا ماوصلنا لأي نهاية مسدودة من ناحية انعدام الافكار لتصنيع جهاز جديد”.
ساترو اللي خفض راتبه الى النصف في بداية هذا العام عشان ضعف مبيعات جهاز الوي يو وضح وقال:” اطلاق جهاز جديد ماراح يحقق نتائج ممتازة الا اذا أولاً ارضينا الناس اللي اشترو اجهزتنا الحالية”.
كمل ايواتا وقال انهم حيشتغلو بكل جهدهم عشان يجعلو اللاعبين اللي يمتلكو ثري دي اس و وي يو مبسوطين. وفي نفس الوقت زي ماهو واضح ان ننتندو قاعدين يشتغلو للمستقبل.
قال ساترو:” ودي اقول ان احنا شغالين على جهاز جديد، وفي الحقيقة عندنا رؤية واضحة عن الاتجاه الجديد اللي راح يتوجه له الجهاز”.
على الرغم من ضعف مبيعات الوي يو، الجهاز الى الان باع 6.17 مليون جهاز من يوم اطلاقه في عام 2012، ايواتا ينظر للجانب المشرق ويقول حتى القيم بوي (Game Boy) اول مانزل ماباع بشكل ممتاز، لكن بمجرد نزول لعبة واحدة رهيبة الجهاز انتشر و صار معروف عند الناس. قال ان هذا الشي ممكن يصير بالضبط للوي يو. عندك ماريو كارت (Mario Kart)، سماش بروس (Smash Bros)، و لينجند اوف زيلدا (Legend Of Zelda). كل هذي الالعاب راح تصدر على الوي يو.
قال ساترو:” مصير جهاز الالعاب غالبا يتأثر بشكل كبير بتقديم لعبة واحدة رهيبة، مثل ماكلكم تذكرون ان القيم بوي ماكان بيبيع بشكل ممتاز ومعظمكم خمن انه راح تكون نهاية القيم بوي قبل مانطلق لعبة بوكيمون (Pokemon)، لكن بوكيمون لحالها غيرت مجال الجهاز بشكل كامل، وبعدها بدأت المبيعات تصير منتظمة و ممتازة.”
لكن ايواتا مازال يعتقد ان مبيعات الوي يو ماراح تقرب من مبيعات الوي اللي كان من اعلى اجهزة الالعاب اللي انباعت في تاريخ الاجهزة، 100 مليون جهاز انباع الى هذا اليوم.
قال ايواتا:” مثل ماقلت في يناير بداية العام. صحيح احنا مانقدر نتوقع مبيعات للوي يو اعلى من مبيعات الوي. عشان كدة راح نشتغل بشكل حذر جدا من ناحية المبيعات والمصروفات وكيف نوزن بينهم، ومن ناحية ثانية مانعتقد انه توقعنا للوي يو لهذي السنة بحيث انه يبيع 3.60 مليون جهاز راح يكون هو اعلى رقم راح يوصل له الجهاز في مسيرته. واحنا نبغا نشتغل بشكل جبار وكافي عشان نساعد الجهاز و بعدها نقدر نتوقع نتائج جيدة منه في خلال هذا العام و الاعوام اللي بعده. وعلى اي حال، بالنسبة للعام هذا، مثل ماشفنا النتائج كانت مخيبة للامال، عشان كدة قللنا التوقعات وكنا محافظين اكثر من اللازم.”
بالنسبة لي كلام مقنع بعضه و بعضه اختلف معاه، المقنع انه شغال على جهاز جديد و لازم بعد التصينع يبدأو يفكرو في شي جديد، لكني اختلف معاه من ناحية انه اذا القيم بوي نجاح عشان لعبة واحدة بس فهذا يعني انه الوي يو راح ينجح لنفس السبب، من دراستي اتعلمت حاجة انه في شركات تكون مظلله بنجاحها القديم وتعتقد انه اللي نجح زمان راح ينجح في الحاضر. هذا الشي اللي بيسويه ساترو، اتعلمت ان الشي الصحيح انك تسوي نقلة نوعية وتبدأ بشي جديد مختلف كليا عن اللي سويته ويغير مجرى الاجهزة. مثل ماسوت فيفا في البلايستيشن 3 لما غيرت تاريخ العاب الكورة و اجبرت الشركة المنافسة لها انها تقلدها. في نظري العوامل الان اختلفت و اللاعبين اختلفو واشياء كثير جدا اختلفت عن السابق، صعب انك تربط نجاح جهاز كامل على لعبة واحدة فقط في الوقت الحالي. عندك الاكس ون معتمد على تايتن فول (Titanfall) ولكن لسه ماجاب مبيعات البلايستيشن اللي مااعتمد على اي لعبة كبيره غير انفيموس اللي ماكانت قد الطموحات اصلا. ننتظر ونشوف هل كلامه صحيح والالعاب اللي بتنزل راح تجبر اللاعبين يشترو الوي يو ولا لا.
اش رايكم تعتقدو كلام ساترو صح ان اللي نجح في الماضي راح ينجح في الحاضر؟ ولا تتفقو معي؟ واش تتوقعو يكون جهاز ننتندو الجديد؟ شاركونا
احمد خالد
بارعة
