بما ان الكثير من الأسئلة المتعلقة بنينو كوني توصلني في تويتر، وبما ان الجواب على بعض الأسئلة صعب وياخذ أكثر من 140 حرف، قررت أكتب تعليمات عامة للعبة أكثرها متعلقة بطريقة اللعب عشان نتفادى أي نوع من التخريب للعبة.
1- حاول تنوّع في الكائنات(familiars) اللي تاخذها لكل شخصية
كل شخصية في المجموعة (party) اللي تلعب فيها، بامكانها تشيل 3 كائنات معها. حاول تخلي واحد منها يعالج في حال ان الشخصيات اللي معك ما عالجوك (وهذي دائماً تصير لي، والشكر موصول للسلوك الاصطناعي الغريب في اللعبة).
2- اعرف انواع الكائنات
لازم تعرف ان كل كائن له ضربات خاصة، وكل عدو يتأثر بنوع معين من الضربات السحرية. مثال: اذا العدو كائن ناري فاستخدم ضده الهجمات السحرية الثلجية “Ice Attacks” أو “Water Attacks” عشان الضربات تكون تأثيرها أقوى بكثير من الضربات العادية.
3- حاول تقاتل قد ما تقدر!
الكثير من اللاعبين يقولون لي انهم يواجهون صعوبات اذا وصلوا لأي زعيم (Boss). سبب هذا ان اللاعب غالباً يتهرب من القتالات العادية مع الأعداء العاديين في عالم اللعبة، وهذا خطأ كبير. أي عدو تلقاه قدامك ادخل معه في قتال عشان ترفع المستوى حقك (Level up).
برضو حاول انك تركز على “Bounty Hunts” أو المهمات الجانبية اللي تروح تقاتل فيها أعداء محددين، هذي تعطيك جوائز بامكانك تستبدلها بميزات تفيدك في اللعبة فائدة كبيرة جداً. عندك مثلاً ميزة تفكها تعطيك القدرة انك تتسلل على الأعداء من الخلف، وهذا يعطيك أفضلية في بداية القتال. هذا أعتبره شي مهم جداً.
وفيه طريقة تقدر تعرف عن طريقها انك قاتلت الى الحد الكافي: وانت في عالم اللعبة، اذا دخلت نطاق أي عدو وشافك راح يهاجمك، ادخل معه في قتال واستمر كذا الين تلاحظ انك اذا دخلت نطاق العدو وشافك، بدال ما يهاجمك بتلاحظ انه صار يهرب منك! من هنا اعرف انك مستواك (level) وصل الى المستوى الكافي انك تتقدم بالقصة وانت مرتاح.
4- دوّر على الأعداء اللي يعطونك نقاط خبرة أكثر
هذي من أهم الأشياء اللي ما عرفتها الا في آخر اللعبة للأسف. فيه أعداء تتقاتل معهم يعطونك نقاط خبرة أضعاف مضاعفة من الأعداء العاديين. لاحظ اني قلت أضعاف مضاعفة. في فترة من فترات اللعبة كنت أدخل القتالات العادية وأطلع منها بـ500 نقطة خبرة XP فقط، لكن لمن عرفت نوع من الأعداء صار يعطيني 25,000 نقطة خبرة! فرق كبير ويستاهل طبعاً.
شيّك على الفيديو عشان تعرف مواقع العدو الرهيب هذا.
5- حاول تشتري المواد (Items) اللي تعيد لك الطاقة السحرية (Magic Points)
فيه عندك المادة الأساسية تشتريها وتعيد لك 30 نقطة سحرية، اذا تقدمت في اللعبة وفتحت مدن بتلاحظ ان فيه كابتشينو “لا تسألني ليه كابتشينو” يعيد لك 70 نقطة سحرية، واذا تقدمت أكثر بتلقى اسبرسّو يعيد لك 130 نقطة سحرية. كل هذي راح تحتاجها بكل تأكيد في كل قتال ضد أي زعيم Boss Fight.
هذي نصائح عامة لأي لاعب ناوي يبدأ اللعبة أو بدأ فيها. فيه نصائح ثانية كثير لكن أعتقد ان هذي هي أهمها من خلال تجربتي مع اللعبة.
لا بد ان فيه نصائح أفضل وأحسن من النصائح اللي كتبتها أنا، لذلك يا ليت أصحاب الخبرة يساعدونا في ذكر نصائحهم اللي طلعوا منها بتجربتهم في التعليقات.
