في مقابلة مع المخرج الابداعي للعبة Neil Druckmann ومخرج اللعبة Bruce Straley ، يقول نيل انه يبغى يتعلّم من كل الدروس اللي تعلموها من عملهم على السلسلة، بالاضافة الى لعبتهم المشهورة The Last of Us.
المقابلة طويلة، ترجمت لكم كل الأشياء المهمّة فيها. خذ لك كوب شاهي وروّق، ترا المعلومات دسمة شوي 🙂
تكلم نيل دركمان ومخرج اللعبة بروس ستريلي عن الفرق بين تصميم لعبة ذا لاست أوف أس وأنتشارتد، يقول ستريلي:
” في أنتشارتد حاولنا نفتح العالم بشكل أكبر من الأجزاء اللي قبل، وبرضه اشتغلنا على الأشياء اللي تحيط باللاعب وسط اللعبة، عندك في ذا لاست أوف أس كانت أسهل من ناحية اننا نحط جدار فقط، أما في أنتشارتد فصرنا نحط مناظر بعيدة مثل الجبال والأشجار اللي شفتوها في العرض”.
سألوهم في المقابلة: “هل تحسون بالضغط وأنتم تشتغلون على أنتشارتد 4 خصوصاً بعد ما قرّرتوا انكم تتخذون معها قرارات كبيرة؟” والجواب كان:
” ما أدري هل نسميه ضغط أو شي ثاني. حنا لعبنا الأجزاء اللي قبل في السلسلة، والضغط في الموضوع اننا نحاول نحط الأنظمة وطرق اللعب الصحيحة. نبغى نسوّي لعبة حتى حنا نشعر بالفخر وحنا نلعبها”.
” بعض الأحيان اذا صار فيه اجتماع مع باقي فريق التطوير وسوينا عصف ذهني وحطينا كل أفكارنا، بعض أعضاء الفريق يقول: ‘ياخي هالأشياء اللي تطلبونها صعبة!’ لكن نرد عليهم ونقول لهم: ‘ترا حنا ستديو نوتي دوق! حنا نسوي أفضل الألعاب في العالم’. الجملة هذي لها أثر كبير على الفريق وتخليهم يتحمسون في شغلهم”.
سألوهم في المقابلة برضه عن نجاح The last of us في جذب جمهور أكبر من اللاعبين، وهل بيقدرون يسوون نفس الشي مع أنتشارتد 4، بحيث بيقدرون يوسعون جمهور السلسلة أو لا.
يقول نيل: ” حنا نحاول اننا نحدد بعض الأهداف الرئيسية مثل تطوير القصة من نواحي خاصة ونطوّر طريقة اللعب من نواحي خاصة ونحاول نخلّي اللاعب يشبك معها بالطريقة اللي حنا رسمناها”.
سؤال: وش أكثر المصاعب اللي واجهتوها في تطوير أنتشارتد 4؟
يقول ستريلي: “بالنسبة لي العمل على لعبة أضخم وأكبر، وان اللعبة أكبر من ناحية طريقة اللعب”.
أما بالنسبة لنيل فيقول: “قضية اننا نفهم سلسلة أنتشارتد ونحاول قد ما نقدر اننا نعرفها وكيف اننا راح نطوّر هذا الشي، هذا أكبر تحدي. عندك مثلاً الشخصيات نحاول اننا ناخذها مثل ما هي ونحاول نطوّرها بدون ما نضيف أي شي يخلّي اللاعب يحس ان الشخصيات مختلفة عن قبل. أنا ساعدت في كتابة الجزء الأول والثاني لأنتشارتد، فأحاول اني أستفيد من هذا الشي في أنتشارتد 4”.
بعدها سألوهم سؤال يهم الكثير: لو افترضنا ان فيه جزء ثاني للعبة ذا لاست أوف أس، هل عادي بالنسبة لكم ان فريق ثاني يشتغل عليها غيركم؟
يقول نيل: “لو افترضنا ان فيه جزء ثاني لذا لاست أوف أس، وهذا افتراض كبير، هل بيكون عادي عندي ان واحد ثاني يسويها غيري؟ لا. سؤالك غريب” قالها مع ابتسامة عريضة.
أما بالنسبة لبروس ستريلي، فقرر انه يتفادى الاجابة وقال: “حنا حالياً مركزين بنسبة 100% على أنتشارتد 4”.
سؤال: هل تتفهمون الناس اللي يقولون: ‘ما أبغى جزء ثاني للعبة ذا لاست أوف أس. أنا حبيت اللعبة كذا’.
يقول نيل: “ايه أكيد. حنا عندنا نفس الرأي برضه. أنا قلت هالكلام من قبل، حنا سوينا عصف ذهني لجزء ثاني لذا لاست أوف وبرضه سوينا عصف ذهني لأفكار لألعاب جديدة. كل هذا الآن وقفناه لأننا نشتغل على أنتشارتد 4”.
أخيرًا، سألوهم: هل فيه شي تبون توضحونه للجمهور؟
يقول بروس: “نبغى نوضّح للجمهور اننا ما راح نخلّي أنتشارتد 4 لعبة جدّية وغامضة، خذوا نفس عميق. دريك راح يبقى مثل ماهو خفيف دم”.
قبل فترة، أعلن ستديو التطوير عن بعض المعلومات المهمّة بخصوص اللعبة.
وش رأيك في المقابلة الدسمة؟
