أفضل ألعاب 2013

أكثر لعبة فاجأتنا (أفضل ألعاب سنة 2013)

wolf3

أو أكثر لعبة تفاجأنا فيها، سمّها اللي تبغى، ولا تفرق معنا طالما انك فهمت المعنى!

في كل سنة تنزل ألعاب وهذا شي طبيعي. كثير من هالألعاب -او حتى أغلبها- نكون متوقعين وعارفين، وهذا شي طبيعي برضو. لكن السؤال هو: كم لعبة ما حسبنا لها حساب وفاجأتنا وأبهرتنا بمستواها الرائع؟

السنة هذي كان من ضمن المرشحين لعبة Lone Survivor وHotline Miami، كل هاللعبتين من مطوّر مستقل، وكل هاللعبتين فعلياً نزلوا على البي سي قبل سنة لكن ما حصل لنا -ولا للكثير من اللاعبين- انهم يلعبون هاللعبتين الا بعد نزولهم على الأجهزة المنزلية، بالاضافة الى الفيتا.

Lone Survivor اللي فاجأتنا بأجواءها المرعبة على ان رسومات اللعبة كلاسيكية جداً، بالاضافة الى قصتها -وخصوصاً نهايتها- اللي أضافت كمية كبيرة من المفاجأة لنا. Hotline Miami وطريقة لعبها الادمانية اللي فاجأتنا بالتحديات الرهيبة والممتعة، ولا كنا نتوقع منها كثير يوم كنا نشوف دعاياتها، بالاضافة الى قصتها اللي تبدأ غريبة ومتكررة ولكن تتحسن القصة بشكل مفاجئ، عجيبة اللعبة!

عندك برضو من المرشحين Assassin’s Creed IV: Black Flag اللي تفاجأنا منها بمستواها الممتاز والرائع، بعد ما كنا نتوقع انها مجرد جزء جديد لحلب السلسلة وكسب الفلوس من وراها. وأخيراً ٌResogun اللعبة صاحبة الفكرة الكلاسيكية البسيطة، واللي قدروا يطلعون منها بطريقة لعب ادمانية جداً، مخلوطة مع رسومات ومؤثرات وموسيقى تصويرية عجيبة!

ولكن كل هالمفاجآت على جنب، كل المفاجآت هذي ما كانت مقارنة للمفاجأة الكبرى اللي شفناها من لعبة The Wolf Among Us، اللعبة اللي ما شفنا لها دعايات كثير -ويبدو ان هذا أسلوب تيلتيل جيمز- ولا سمعنا عنها كثير، وكانت توقعاتنا لها انها بتكون مجرد نسخة مشابهة للعبتهم اللي قبل The Walking Dead. ولكن كنا غلطانين، اللعبة ما نزل منها الا حلقة وحدة فقط، ومع ذلك التجربة اللي أخذناها منها كانت هائلة، هائلة الى درجة اننا قررنا ندخلها ضمن التصنيفات. وحققت اللعبة انجاز كبير بتغلبها على باقي الألعاب الكاملة ضمن المرشحين.

عشان كل هالأسباب، اتفق غالبية فريق عمل سعودي جيمر في ان The Wolf Among Us هي أكثر لعبة تفاجأ فيها!

وش رأيك في لعبة The Wolf Among Us؟ ووش أكثر لعبة فاجأتك السنة هذي من ضمن المرشحين اللي اختارنهم؟ شاركنا رأيك في التعليقات!

الوسوم
اظهر المزيد

Saudi Gamer

اذا شفت اسمي هنا فمعناتها أن الموضوع اشتغل عليه أكثر من واحد من فريق العمل، أو انه تصريح رسمي باسم الموقع. بس لا تخلي هالشي يمنعك من انك تتابعني في تويتر وانستقرام. عادي لا تستحي.
إغلاق