اذا فاتك تغطيتنا المباشرة لمؤتمر بلايستيشن 4 في الرياض فلا تشيل هم، هذي باختصار أهم 10 أشياء عرفناها في المؤتمر:
1. سوني جالسه تعرّب بلايستيشن 4
رئيس سوني أوروبا أعلن رسمياً انهم يشتغلون وبكل جدّية على تعريب بلايستيشن 4، وان دعم اللغة العربية فيه تحدّي كبير لانها تستخدم حروف مختلفة تماماً عن الحروف اللاتينية، وتكتب من اليمين لليسار بدال اليسار لليمين مثل أغلب لغات العالم.
ومع ان رئيس سوني أوروبا وعد أنهم راح يدعمون اللغة العربية، الا انه وضّح بأنه ما عندهم تاريخ واضح لدعم اللغة العربية في الجهاز.
2. عرفنا سعر بلايستيشن 4 وتاريخ اطلاقه الرسمي في السعودية
بينزل في 14 ديسمبر وبسعر يبدأ من 1799 ريال حسب الحزمة اللي تشتريها.
3. تخفيض (وتوحيد) سعر البلايستيشن 3 والبلايستيشن فيتا
تم تخفيض سعر البلايستيشن 3 سعة 12 جيجا بايت (اللي أسمّيه اصدار الاستراحات) والبلايستيشن فيتا بحيث يكونون كلهم بـ849 ريال سعودي فقط.
4. بتنزل 33 لعبة مع بلايستيشن 4 خلال أول شهر من اطلاقه في السعودية
بس طبعاً حط في بالك ان كثير منها هي العاب الجيل الحالي بس مطوّرة (زي أساسنز كريد وفيفا 14).
5. موزّع سوني (الفيصلية) عنده توجّه لانتاج ألعاب محلّية
وبيستفيدون بشكل كبير من خبرة سوني في هذا المجال، وبدأو فعلياً بهالشي مع المسابقة اللي سووها واعلنوا الفائزين فيها في يوم المؤتمر.
6. يوم اللاعبين 2013 بيستقبل عدد كبير جداً من الزوّار
ذكر الامير محمد بن خالد العبدالله الفيصل (من الفيصلية) انهم يتطلّعون لزيارة 50 ألف شخص ليوم اللاعبين 2013 خلال الثلاث أيام. مدري اذا هذا العدد منطقي، لكنه بالتأكيد عدد ضخم. هل يعني بتصير زي حوسة وزحمة السنة الماضية؟ ما اتوقع، لأن ….
7. المكان المخصّص ليوم اللاعبين 2013 ضخم جداً
سوني حجزت كامل مساحة مركز الرياض الدولي للمؤتمرات والمعارض، عكس السنة الماضية اللي حجزوا تقريباً ربع المساحة. حتى ان رئيس سوني اوروبا قال ان مساحة المعرض هذا السنة أكبر من مساحة ملعب ويمبلي! مدري اذا من جدّه ولا يبالغ.
8. ملايين اللاعبين السعوديين يلعبون على أجهزة بلايستيشن
من زمان ندري ان بلايستيشن هو جهاز الألعاب الأكثر انتشاراً في السعودية، لكن اليوم ذكر الأمير محمد بن خالد ان عدد مستخدمين بلايستيشن 2 وبلايستيشن 3 في السعودية تجاوز 3.5 مليون مستخدم، بالاضافة الى أكثر من مليون مشترك في متجر بلايستيشن السعودي. عدد كبير ولا؟
9. مافيه نظام واضح للرقابة على الألعاب في السعودية
من خلال سؤال وجّهته للاستاذ بدر السويلم من شركة الفيصلية (الموزّع المحلّي لسوني) عن رقابة وزارة الاعلام والجمارك على الألعاب، اتضح من جوابه انه مافيه نظام واضح حالياً لمراقبة أو منع الألعاب في السعودية، لكنهم يشتغلون مع الجهات الرسمية قدر الامكان عشان ينظمون هذا الموضوع.
10. ولأول مرة: جهاز بلايستيشن القادم بينزل في السعودية قبل اليابان!
لأول مره وبشكل ما كنت متوقّعة شخصياً، راح ينزل البلايستيشن 4 في السعودية قبل اليابان! في السعودية بينزل في ديسمبر، وفي اليابان بينزل بعدها بشهرين في فبراير.
—-
وش رأيك في المعلومات اللي شفتها في المؤتمر عموماً؟ وأي وحده من النقاط اللي ماخذه اهتمامك أكثر شي؟ شاركنا برأيك في التعليقات!
