Saudi Gamer
وياكثرها في كل سنة! تنتظر لعبة ومتحمس لها، وتسولف لها عند أخوياك وتقول:” ياخي اللعبة هذي شكلها بتكون رهيبة!” ولكن اذا نزلت اللعبة، تتفاجأ انها أقل من المستوى، ويصيبك احباط بسببها.
من الألعاب اللي أحبطتنا هذي السنة كانت Killer is Dead، واللي وعدنا مطوّرها انها بتكون بنفس مستوى لعبته الاسطورية Killer7، ولكن طلعت اللعبة عادية أو حتى أقل من عادية. فيه برضو لعبة Ryse: Son of Rome اللي توقعنا انها تكون لعبة ملحمية وانها من ألعاب الجيل المميزة ولكنها طلعت أقل بكثير من التوقعات. أخيراً، لعبة Remember Me اللي على الرغم انها أعجبت محمد الشريف شخصياً، الا ان غالبية فريق العمل رشحها ضمن الألعاب اللي أحبطتهم هذي السنة.
لكن كل هالألعاب المحبطة على جنب، فيه ألعاب كنا نتوقع انها تكون ممتازة ولا طلعت ممتازة، ولكن الأسوأ انك تكون حاط توقعات منخفضة للعبة ولكن تتفاجأ انها أسوأ من توقعاتك المنخفضة لها! اللعبة هذي كانت من نصيب الركاز: في اثر ابن بطوطة – الحلقة الأولى.
توقعنا ان اللعبة بتكون بداية مقبولة للألعاب العربية، وانها احتمال تشجع المطورين العرب على صنع ألعابهم، ولكن للأسف طلعت اللعبة سيئة من أكثر النواحي. أصابنا احباط شديد من اللعبة بعد ما لعبنا الحلقة الأولى منها، اللعبة كانت غير قابلة للعب وغير جاهزة للاطلاق حتى!
عشان هالأسباب اللي ذكرناها، اخترنا الحلقة الأولى من لعبة الركاز: في اثر ابن بطوطة كأكثر لعبة أحبطتنا هذي السنة.
وش رأيك بالحلقة الأولى من لعبة الركاز: في اثر ابن بطوطة؟ ووش كانت أكثر لعبة محبطة بالنسبة لك هذي السنة؟ شاركنا رأيك في التعليقات!
محمد الشريف
