أفضل ألعاب 2014مقالات

أكثر لعبة متحمسين لها في 2015

mostwantedgamein2015

سنة 2015 بتكون سنة مجنونة من ناحية الألعاب، كثير من ألعاب 2014 اللي كنا ننتظرها تأجّلت الى 2015، السنة اللي أساساً فيها ألعاب كثيرة رائعة ننتظرها.

من كثر الألعاب اللي متحمسين لها في 2015، قررنا نستثني اننا نختار 5 ألعاب، ونحط كل الألعاب القوية اللي نتظرها:

  • Uncharted 4: A Thief’s End
  • The Witcher 3: The Wild Hunt
  • BloodBorne
  • Metal Gear Solid V: The Phantom Pain
  • The Legend of Zelda Wii U
  • No Man’s Sky

تشوف القائمة؟ هذا فقط اللي اخترناها، غير الألعاب اللي بتفاجأنا ولا ندري عنها!

لعبة Uncharted 4، من أقوى سلاسل الألعاب الموجودة حالياً، والعرض اللي شفناه في حدث PlayStation Experience كان ممتاز ولا نقدر ننتظر اننا نلعبها. لعبة The Witcher 3 أبهرتنا بعروضها اللي شفناها وتحمسنا لها، خصوصاً وانها بتكون عالم مفتوح بالكامل عكس الأجزاء اللي قبل.

لعبة Metal Gear Solid V: The Phantom Pain أبهرتنا من سنوات بعروضها الرائعة، وهذا شي ماهو مستغرب على السلسلة العريقة، وهذي المرة برضه بتكون عالم مفتوح بالكامل لأول مرة في السلسلة. لعبة The Legend of Zelda على الويي يو شفنا عرضها الأخير اللي أبهرنا من جد، وشفنا جمال اللعبة من ناحية فن الرسوم وحجم العالم، وبيكون هالجزء أكبر جزء في السلسلة. لعبة No Man’s Sky وهي من أغرب الألعاب اللي شفناها، واللي تدعمها سوني في كل حدث لها، بحيث تعتمد اللعبة على تكوين عوالم وحتى كائنات بشكل عشوائي. ما نقدر ننتظر الين ما نشوف كيف بتكون اللعبة.

كل هالألعاب اللي ذكرناها متحمسين لها مره، لكن أكثر لعبة متحمسين لها في 2015 هي لعبة BloodBorne. هذي اللعبة بيكون أسلوبها مقارب لسلسلة Souls (ديمونز سولز ودارك سولز) ولكنها بتكون مختلفة شوي من ناحية طريقة اللعب، بحيث بتكون أسرع وألغوا نظام الدرع بالكامل، وصار اللاعب ما يقدر يرد الضربات. هذي الميزة بتغيّر شي كبير في طريقة اللعب، وحسب تجاربنا لها في المعارض اللي حضرناها أعجبتنا بشكل استثنائي، ولا نقدر ننتظر الين ما نشوف كيف بيكون مستوى اللعبة!

لعبة BloodBorne بتنزل في 24-3-2015 حصرياً على بلايستيشن 4.

وش أكثر لعبة متحمس لها في 2015؟

الوسوم
اظهر المزيد

Saudi Gamer

اذا شفت اسمي هنا فمعناتها أن الموضوع اشتغل عليه أكثر من واحد من فريق العمل، أو انه تصريح رسمي باسم الموقع. بس لا تخلي هالشي يمنعك من انك تتابعني في تويتر وانستقرام. عادي لا تستحي.
إغلاق