أقرأ الجزء السابق من القصة: السفرة اللانهائية!
بعد الوصول للفندق أخيراً، وبعد مشوار طويل مع التاكسي الأرميني اللي يبغى يثبت لنا انه “يعرف” الثقافة العربية، حتى انه شغل لنا أغاني عمرو دياب، دوّرت جميل في الساحة الرئيسية للفندق. ما لقيته فرحت أجلس أنتظر ولا أدري ايش أسوي، خلّص رصيد جوالي في من أول مكالمتين، ولا فيه انترنت. طلّعت جوّالي وسويت نفسي أحوس وأكتب رسالة بالجوال، ولا يدرون المساكين اللي حولي ان ما عندي لا انترنت ولا هو مشبوك مع أي شبكة اتصال أصلاً. وألاحظ ان فيه واحد فجأة يدفّني من الجنب بقوة! التفتّ وأطالع وألقى جميل! أخيراً يارجل! بالأحضان ياراقل! آخر مرة شفته فيها كانت في ألمانيا، أيام جيمز كوم.
بعد السلام لاحظت ان معه محمد النشّار وعصام الشهوان من الموقع الزميل زيباد، سلمت عليهم وسولفنا شوي الين ما وصلنا مشهور، واكتلمت مجموعة تغطية سعودي جيمر للإي ثري!
وفي وسط سوالفنا، لاحظت وجه مألوف، وأسأل جميل: ياخي هذا مو كأنه Greg Miller حق IGN؟
التفت جميل وعرفه. رحنا نسلم عليه وقال له جميل انه سعيد بشفاءه من مرضه وقال له انه صار بينهم مواقف في إي ثري اللي فات، وعرفه جريج ميلر وانبسط، قاله جميل انه جايب له فنيلة بمناسبة شفاءه من مرضه، وانه بيطلع الغرفة بسرعة يجيبها له ويرجع.
انشغل مشهور بجواله، وقمنا نسولف أنا وجريج ميلر ودار بيننا الحوار:
جريج: متحمس لإي ثري هالسنة؟
أنا: أكيد، هذا أول معرض إي ثري أحضره!
جريج: من جد؟ فيه أشياء كثيرة ممتعة بتشوفها!
أنا: طبعاً، بيكون فيه أشياء كثيرة عن البلاي ستيشن فور والاكس بوكس ون.
جريج: أجل انت ايش وظيفتك في موقعكم بالضبط؟
أنا: أكتب مراجعات للألعاب، أكتب مقالات، بشكل عام أنا مسئول عن أغلب المحتويات الكتابية في الموقع.
جريج: كيف مجتمع اللاعبين عندكم في الشرق الأوسط؟
أنا : في تحسّن مستمر، كل ماله يصير أكبر وأفضل من قبل وبشكل سريع.
جريج: أنت وصاحبك لحالكم تشتغلون في موقعكم؟
أنا: لا طبعاً، حنا عددنا ستة لكن اللي جاي يغطي ثلاثة.
التفتّ على مشهور وأشّرت عليه وقلت: هذا مؤسس موقعنا
جا مشهور ودار بيننا حوار عن المواقع وألعاب الفيديو وغيرها، الين ما وصلنا جميل وأعطاه الفنيلة. أخذنا معه صور تذكارية وحيّانا على عملنا.
طلعنا للغرفة أخيراً، ارتحنا شوي وطلعنا ناخذ بطاقات الدخول لإي ثري. رحنا ناكل ورجعنا للغرفة من جديد.
يوم المؤتمرات
صحينا الصبح وانطلق مشهور لمؤتمر مايكروسوفت، وتجهزنا أنا وجميل على كمبيوتراتنا عشان التغطية. بدينا نعطّي بكل حماس، خصوصاً ان المؤتمر كان حامي، بدايةً بعرض جديد لميتال جير ٥، وانتهاءاً بالكشف عن لعبة Titanfall.
انتهى مؤتمر مايكروسوفت وجا وقت تبديل الأدوار، مشهور يستلم التغطية وأنا وجميل نحضر معرض إي ايه. عرضهم كان مبهر لولا اننا طفشنا من الجانب الرياضي اللي ماخذ أكثر الوقت. كانت تجربة ممتازة لي اني أحضر المؤتمر وأشوف الألعاب نتعرض قدامي، بعد ما كنت أشوفها على الكمبيوتر لسنوات كثيرة!
انتهى المعرض وراح مشهور يحضر مؤتمر يوبيسوفت، واستلمنا أنا وجميل التغطية. انتهى مؤتمر يوبيسوفت وبدأ بعده مؤتمر سوني.
التغطية كان لها طعم خاص جداً، خصوصاً مع جميل وهو مستلم تويتر بتعليقاته الفكاهية!
رجع مشهور من المؤتمر، وقمنا نكتب ونشتغل في الموقع وننشر الأخبار أول بأول وبكل حماس. وبعدها سجلنا الحلقة الخاصة.
اليوم اللي بعده فتح معرض E3 للاعلاميين، وهو الشي اللي اللي مسافرين عشانه! ايش اللي صار معنا هناك؟ تابعنا في المقالة القادمة بكرة!
تحديث: اقرأ الجزء الثاني من القصة: في داخل المعرض
