في مقابلة على يوتيوب، تكلّم شيجيرو مياموتو -أحد أقدم مطوّري الألعاب وأشهرهم- عن الجزء القادم لسلسلة ننتيندو المشهورة، لعبة The Legend of Zelda Wii U.
من حسن الحظ، المقابلة كانت مجرد كلام عام يقدر يفهمه اللاعب العادي، وماهو كلام متعمّق. بالنسبة لحجم اللعبة، يقول مياموتو عن الجزء القادم لسلسلة زيلدا:
” في سلسلة زيلدا، اللي نسويه دائماً وأبدًا، اننا نحاول نخلي اللاعب يدخل عالم هايرول الكبير، وان فيه أشياء كثيرة تسويها وأماكن كثيرة تزورها. لكن بسبب الأجهزة اللي اشتغلنا عليها (يقصد ضعفها وانها محدودة)، اضطرينا نقسّم عالم اللعبة الى أجزاء مفصولة عن بعضها وبعدها نحاول نجمعها بطريقة معيّنة بحيث يحس اللاعب انه عالم واحد كبير”.
” لكن الآن مع جهاز مثل Wii U، اللي سويناه اننا قلنا لبعضنا: ‘خلونا نشوف اذا نقدر ناخذ عالم كامل بحجم جزء Twilight Princess (واحد من أجزاء زيلدا) واننا نخلي هالعالم مجرد جزء من عالم اللعبة'”.
اللعبة يبدو انها بتكون كبيرة بالنسبة لألعاب زيلدا اللي قبل، يقول مياموتو: “فيه بعض الفترات اللي بتحس فيها انك تنسى وش الهدف الأساسي اللي تبغى تسويه، بسبب الأشياء الثانية اللي بتسويها”.
” اللي نحاول نسويه هو اننا نصمم اللعبة بطريقة بحيث ما تحتاج بالضرورة انك فقط تجلس تلعب لفترة طويلة جدًا، ولكن بنحاول اننا نصممها بطريقة تناسب الألعاب الحديثة، بحيث تفكّر وتقول في نفسك: ‘ودّي ألعبها اليوم بس عشان أسوّي الشي الفلاني!’ وتسوي هالشي وتنتهي منه”.
المقابلة جميلة، بامكانك تتفرج عليها كاملة مترجمة الى انجليزي.
وش توقعاتك للعبة زيلدا القادمة؟
