محمد الشريف
تسربت أخبار أمس، عن دفع مايكروسوفت لبعض قنوات يوتيوب عشان يسوّقون الاكس بوكس ون. الخبر طويل ومعقّد، لذلك بنحاول نختصر لكم الموضوع، والحكم في الأخير يبقى للقارئ.
أول التقارير اللي تسربت كانت ثابتة على مايكروسوفت، بحيث تسربت صور لايميل من شبكة Machinima المعروفة، تعرض للقنوات المتعاونة معها انها تسوي فيديوات تسويقية للاكس بوكس ون، وبالمقابل بيجيهم فلوس. اللي زاد الطين بلّة بالنسبة لماشينيما، ان مدير الشبكة الاجتماعية حقتهم مسح تويت كتبه عن الموضوع بعد ما تسربت هذي التقارير.
أما بالنسبة للتقرير الثاني، وهو الفضيحة الكبرى، فكان تسريب الاتفاقية بكاملها على الانترنت! الاتفاقية طويلة وحنا نعرف ان مالكم بالطويلة، لكن الملفت للنظر في الاتفاقية ان فيه شرط يقول: ” صاحب الفيديو ما يقول أي شي سيء عن ماشينيما، واكس بوكس ون وكل الألعاب اللي بتنزل عليه”، وشرط ثاني يقول: “أصحاب الفيديو لازم يخلّون الاتفاقية هذي سريّة”.
بمعنى ثاني، اذا كنت تبي تشارك في هذي الاتفاقية اللي مايكروسوفت بتدفع لك منها فلوس، فلازم تسوي فيديو تلعب فيه اكس بوكس ون (وتذكر في الفيديو انك تلعب اكس بوكس ون)، وتمدح الاكس بوكس، وانك تخلّي الموضوع هذا كله سرّي ولا تقول لاحد عليه!
شخصياً أشوف ان الموضوع هذا كارثة في عالم ألعاب الفيديو، قضية انك تستغفل المشاهدين وتحاول تقنعهم بمنتجك بطريقة ملتوية وتروح تدفع للشبكات الكبيرة شان يتعاونون معك، هذي كلها فضيحة تستاهل النقد لأسابيع قدام.
مرة ثانية، الموضوع جدلي وقابل للنقاش، والحكم في الأخير يبقى للقارىء. وش رايك أنت في الموضوع؟
أحمد عصام
