يبدو ان مايكروسوفت بدأت قذف القنابل قبل لا يبدأ معرض E3 المنتظر. أعلنت اليوم مايكروسوفت عن الجزء الخامس من سلسلتها الحصرية المعروفة هيلو 5: جارديانز (Halo 5: Guardians). بتنزل اللعبة في 2015.
تقول بوني روس (Bonnie Ross) عن اللعبة انها “مشروع ضخم ورهيب” وبرضه وصفها بأنها “الجزء التالي للسلسلة الضخمة اللي تحكي قصة ماستر تشيف”.
تقول بوني: “سالفة اننا نخلي لعبة تشتغل بستين اطار في الثانية على سيرفرات ثابتة (مستقرة مافيها مشاكل) مع الميزات وضخامة المحتوى اللي حلمنا فيها لأكثر من عقد كامل، هو موضوع جدّي ماهو تافه”.
تكلمت بوني برضه عن استغلال قوة الاكس بوكس ون، وان شي طبيعي ان بيكون فيه بعض العناصر اللي بياخذونها من الاجزاء اللي قبل، وانهم برضه تعلموا الكثير من الجزء اللي قبل. بوني تقول ان الوعد في معرض E3 على منصة مايكروسوفت، بيعرضون هناك معلومات زيادة عن اللعبة.
مايكروسوفت قبل سنة عرضت مجرد عرض تشويقي للعبة هيلو القادمة، ولا كان لها اسم ولا فيه معلومات. اليوم مايكروسوفت أعلنت عن باقي المعلومات ويبدو ان اتضح قدامهم الطريق. متحمس أشوف وش بيسوون في المعرض هذي السنة!
وش اللي تنتظره من الجزء الخامس من هيلو؟
