مشهور الدبيان
وفّرت لنا بلايستيشن مقابلة حصرية على مستوى السعودية مع “مايكل دني” نائب رئيس استديوهات سوني العالمية (Sony Computer Entertainment World Wide Studios). حطينا موضوع يومها سألنا المتابعين اذا فيه شي يبون يعرفونه عن ستديوهات سوني (الستديوهات هي الشركات اللي تطوّر الألعاب)، ووصلنا أكثر من 100 سؤال في ساعات قليلة.
توجّهت يومها لفندق الراديسون (مكان المقابلة) شايل عدّتي معي واتصفّح الاسئلة اللي وصلتنا بالطريق بحيث اختار اشياء منها للمقابلة. مع اني لقيت اسئلة كثير غير مناسب طرحها لأنها ماهي من اختصاص الرجال اصلاً، الا اني لقيت عدة اسئلة رهيبة ألهمتني باسئلة للقاء، واستخدمت منها ثلاثه تقريباً، فاخذتها كلها وضبطتها في قائمة في جهازي.
في طريقي قابلت الزميل أحمد النشيط من دفلز قيم، كان بعدي في المقابلة كاعلامي من البحرين. جلسنا نسولف الى ما جا وقت المقابلة، ثم دخلت الى غرفة المقابلات وبدأت بطرح الاسئلة.
1: اعلنتم ان عندكم اكثر من 30 لعبة حصرية على البلايستيشن 4، هل هي كلها من استديوهات سوني أو حسبتوا معها المطوّرين المستقلين؟
اذا قلنا العاب حصرية فحنا نقصد العاب ستديوهاتنا الداخلية، بس مثل ما ذكرنا في المؤتمر امس عندنا اكثر من 50 ستديو ثاني يسوون لنا ألعاب حصرية.
2: كم من هذي الألعاب الحصرية بتنزل مع البلايستيشن 4؟
الالعاب اللي اعلنا عنها بتنزل مع الجهاز هي Driveclub، و Killzone و Knack وبينزل بعدها بفترة قصيرة العاب مثل Infamous: Second Son وفي 2014 لعبة The Order.
3: بالنسبة للاستديوهات التابعة لكم (استديوهات الطرف الأول)، هل فيه تنافس بينهم أو انهم يتعاونون مع بعض؟
*يضحك* هذا سؤال ممتاز. طبعاً كلهم يسوون العاب حصرية وابداعية لمنصات بلايستيشن. أعتقد ان المنافسة شي جيد بأي حال، فاعتقد ان كل ستديو يحاول يطوّر اللعبة الأفضل، فمن هذي الناحية بيكون فيه دائماً منافسة بين كل استديوهاتنا، ولهالسبب نشوف نتائج وابتكارات وجودة كبيرة من هذي الفرق.
4: هل تحطّون خطة استراتيجية معيّنة للبلايستيشن 4 ثم تعطون لكل استديو دور في هذي الخطة، أو انكم تشوفون استديوهاتكم وش تبي تسوي وتبنون خطّتكم بناءاً على الالعاب اللي قرروا يسوونها؟
ما نبي نوجّه استديوهاتنا بحيث نحاول نعبّي كتالوج من المنتجات، نبيهم هم يعرضون افكارهم علينا خاصة اذا كنا نتكلم عن ألعاب جديدة، أشياء نحسّهم متحمّسين عليها، وأشياء نعرف أنهم بيقدرون ينفذونها بشكل ابداعي وبجودة عالية. واعتقد هذا اللي راح تشوفه من العابنا الحصرية، وهي أشياء تميّز أجهزتنا. بتشوف استديوهاتنا تحاول تجيب افكار جديدة مبدعة جداً، بدال ما نجلس حنا نقول لهم نبي وحدة من هالنوع من الألعاب أو وحدة من النوع هذاك.
5: بس لو مثلاً كلهم فجأه قررون يسوون ألعاب تصويب، أكيد بتتدخلون وتقولون لحظه يا جماعة لازم يكون فيه شوية تنويع بالعابكم، صح؟
اعتقد لو كلهم عرضوا علينا نفس الفكرة فبنتكلم معهم عن هالموضوع، بس هالشي ما يصير عادة.
يعني فعلياً تتدخلون في انواع الالعاب اللي يسوونها..
أكيد، بس مثل ما قلت هالشي ما يصير عادة. الاستديوهات أكيد بيكونون يعرفون عن الأشياء اللي تسويها الاستديوهات الثانية، بس عندهم أشيائهم الخاصة اللي يعشقونها وألعاب معيّنة يبون يسوونها.
6: الى أي مدى استديوهاتكم مشاركة في تشكيل البلايستيشن 4؟ هل هم بس يشاركونكم بآرائهم أو انهم داخلين بشكل رئيسي في عملية اتخاذ القرار؟
اعتقد هالمرة مع بلايستيشن 4 صارت آلية العمل أكثر شمولاً من الأجهزة السابقة. قبل خمس او ست سنوات يوم بدينا نفكّر عن بلايستيشن 4 ووش المفروض يكون، كان إشراك صنّاع الألعاب والتقنيين الأساسيين من ناحية الألعاب شيء مهم جداً بالنسبة لنا. مثل ما نقول دائماً هذا بيكون جهاز مصنوع للاعبين من اللاعبين أنفسهم.
من المهم جداً اننا ناخذ آرائهم من البداية وخلال عملية التطوير أيضاً، مثلاً كم تحتاجون ذاكرة؟ هل الجهاز بيكون قوي بما فيه الكفاية؟ الخ الخ. لأننا فعلاً نبي نفتح باب الابداع. ونقطة رئيسية في رؤيتنا كانت هيكلة البلايستيشن اللي كان مبني على هيكلة “بي سي” مألوفة للمطوّرين، عشان يفهمونها المطوّرين بشكل سريع جداً، ويحصلون على اداء ممتاز من الجهاز بشكل سريع أيضاً، وبالتالي نحصل على العاب رائعة مع وقت اطلاق الجهاز.
7: بس هل كان بيدهم انهم يصوتون ضد أحد مزايا أو مواصفات البلايستيشن 4 مثلاً؟
ما اعتقد انها كانت “تصويت” بهالشكل، وكأنك تتخيل غرفة مليانه ناس يصوتون على اشياء. اعتقد انك تحتاج تستمع لجميع الفرق. كل فريق يسوي نوع معيّن من الألعاب، فالشي اللي يعتبر مهم بالنسبة لفريق، يمكن ما يكون مهم بالنسبة لفريق ثاني. فالموضوع مرتبط بالاستماع للجميع، وثم اتخاذ قرار بحيث نوصل لخيار متوازن.
8: آخر سؤال: هل تخلون استديوهاتكم تشتغل مع بعض في بعض النواحي بحيث يتبادلون الخبرات؟ او انه شي راجع لهم؟
شيء من الاثنين. في استديوهاتنا العالمية عندنا شبكة قوية من الاستديوهات من جميع انحاء العالم. وشيء جميل اذا تقابلنا في مناسبات عديدة وتشوف الاستديوهات بانفسهم يبون يشاركون الآخرين بتجاربهم، ويبون يعرفون وش الأشياء اللي تضبط، ويبون يعرفون وش تسوي الاستديوهات الثانية. المشاركة شي جيد على هذا المستوى. بس حتى في شركة استديوهات سوني العالمية عندنا ادارة تكنولوجيا عالمية تساعد كل استديو في اتخاذ القرارات المتعلقة بالتقنية اللي يستخدمونها في العابهم، واعتقد هذي ميزة كبيرة في شركتنا.
شكراً جزيلاً، أقدّر لك وقتك. تدري .. هذي ثاني مره اسوي معك مقابلة، وأكره كيف انك ما تزل نهائياً أو حتى تلمح لأي شي المفروض انك ما تقوله
*يضحك* اتوقع هذا شيء مهم في شغلي كنائب رئيس
ما اقصده بشكل سيء طبعاً، لكن اجوبتك دبلوماسيه ومرتبه جداً
اعتقد ان هذا شي جيد
—-
وش رأيك في اللقاء والمعلومات المذكورة فيه؟ شاركنا برأيك في التعليقات!
احمد خالد
