أكد Masahiro Sakurai منتج ومبتكر العاب سلسلة Super Smash Bros العريقة أن شخصية Mewtwo البوكيمون الأسطوري شبه جاهزة وراح تنزل قريبا جدا إن شاء الله.
جاء هذا الكلام في حدث صار مؤخرا في اليابان وقال فيه Sakurai أن فريق التطوير تقريبا إنتهى من تطوير إضافة شخصية Mewtwo وأن الناس خلاص مار اح تنتظر كثير عشان تجرب قدرات الشخصية الجديدة ويصفقون بعض في لعبة ننتندو القتالية المعروفة.
الإضافة تقدر تحصل عليها بطريقتين وهي إنك تشتري نسختين من لعبة SUPER SMASH BROS الجديدة وحدة على الوي يو والثانية على 3DS وتسجل اللعبتين في حسابك في ننتندو كلوب وبكذا تقدر تحمل الإضافة اول ما تنزل بشكل مجاني. أم الطريقة الثانية فهي للناس اللي مثلي اللي إكتفوا بشراء نسخة وحدة من اللعبة سواء على الوي يو أو 3DS لازم يدفعون قيمة هذه الإضافة عشان يقدرون يحملون شخصية Mewtwo.
بصراحة في البداية كنت بتهور وبشتري نسخة 3DS من اللعبة بس عشان أظمن تجيني الشخصية بعدين قلت لا والله ما تستاهل أدفع 200 ريال قيمة لعبة جديدة بس عشان اخذ الإضافة مجانا اللي غالبا ما راح يتعدى سعرها 10 دولار. بس صراحة قعدوا تقريبا نص سنة بس عشان يسوون شخصية وحدة أحسهم يطورون على بيض. أخاف تكون هذه آخر شخصية تنضاف للعبة إذا استمروا على بطئهم هذا خاصة أن Masahiro Sakurai الله يصلحه مسوي يقلد كوجيما وقال هذا آخر جزء راح أشتغل عليه من اللعبة مع انه قال نفس الشيء مع الجزء اللي راح.
وش رأيكم شباب مين متحمس لشخصية Mewtwo؟ شاركونا أرائكم تحت في التعليقات.
