هل ماشينيما تسيء الى الرسول عليه الصلاة والسلام؟

تحديث 2: نشر صاحب المقطع الأصلي مقطع جديد فيه اساءات صريحة للنبي محمد عليه الصلاة والسلام. منب متفاجيء صراحه بعد السب اللي جاه، لكن عموماً اقترح استخدام خاصية التبليغ في اليوتيوب للتبليغ عن المقطع لعلهم يزيلون مقطع هذا التافه.

نشر أحد الكومنتيترز (المعلقين) الغربيين أمس على قناته في اليوتيوب مقطع في آخره تم ذكر اسم الرسول عليه الصلاة والسلام. وكالعادة مثل ما يصير في أي شيء يطلع من مصدر غربي، شخص واحد ينقل المعلومة والبقية مثل القطيع تتبعه بدون ما تتحقّق من صحّتها.

المقطع “المسيء” يبدأ في الثانية 01:57 في الفيديو اللي تحت. كل اللي صاير ان الكومنتيتر هذا جالس يحاول يخلي الكلاب هذولي وكأنهم يحاربون حرب مقدّسة، وجالس يستخدم كلمات وجمل عشوائية مثل “Our baptism by murder awaits”، يعني “المعمودية عن طريق القتل تنتظرنا”، والمعمودية هذي من الديانة المسيحية بالمناسبة. وأيضاً استخدم جمله ثانية تسخر من التثليث في الديانة المسيحية.

وأخيراً أنهاها بجملة خربوطية قال فيها “The Christian jew god of prophet mohammed” يعني شي زي “الإله المسيحي اليهودي للنبي محمد”، على باله يبي يجيب جميع الاديان في جملة وحده عشان يطلع كأنه فعلاً شي مره مقدّس. وأستبعد تماماً أنه كان يقصد الاساءة للنبي، لو انه لو هذا اللي صاير كان ما خلا أغلب التريقه على الدين المسيحي.

وفي نهاية قتاله في المقطع تسائل “مين هذا الارنب اللي هناك؟”، وطلع كم واحد يقولون هو يشبّه الرسول بالأرنب. كيف ربطوا بين المعلومتين؟ الله أعلم، لكن أعتقد أنه الحماس الزايد والدرعمة المعتادة.

تحديث: وضّح احد الاخوان انه المقصود ب”الإله المسيحي اليهودي للنبي محمد” (the crhistian jew god of prophet mohammed) المقصود فيه رئيس الارانب اللي كانوا يحاربونه. مثل ما ذكرت في الفقرة المحذوفه، واضح ان الهدف من كلامه هو انه يخلي المشهد حرب مقدّسة، واستبعد تماماً انه كان قصده الاساءة للنبي تحديداً. لو قاصد يسيء له تحديداً فوش دخل الديانات اليهوديه والمسيحيه في السالفة؟ اللي سواه غلط، بس نحتاج نفرق بين اللي يستهدفنا وقاصد الاساءة، وبين اللي جالس يخبص في الكلام وهو ما يدري وش قاعد يقول على باله يبي يضحك الناس.

وش دخل ماشينيما في السالفة؟ لأن صاحب المقطع (قناة Bro Team) هو “بارتنر” (أو شريك) في شبكة ماشينيما (زينا يعني)، وشبكة ماشينيما نشرت المقطع حقه في قناتها زي ما تنشر مقاطع اعضاء آخرين في الشبكة، وبالتالي بقدرة قادر صارت ماشينيما بكبرها تقصد الاساءة للرسول عليه الصلاة والسلام.

وكالعادة، أفضل طريقة لايصال أخلاقنا الاسلامية الحميدة اللي حثنا عليها الرسول الكريم هي ان المقطع هذا يمتلي سب وشتم من المسلمين موجّه لصاحب المقطع، زي واحد رايح كاتب “يلعن أبوك يا ابن الكلب”. ايه. بالعربي.

المضحك في الموضوع أنه ما زال فيه ناس يعتقدون ان ماشينيما لها تواجد رسمي في الشرق الأوسط. مالهم أي تواجد حالياً، كان عندهم موظف واحد سابقاً مختص في مساعدة الناس على الانضمام للشبكة، وطلع منهم الآن. تحققت بهالشي من نفسي من الشركة مباشرة سابقاً، فلاحد يتعب نفسه ويكلم واحد من منطقتنا يعتقد انه “مسؤول” عن اي شيء يصير.

موضوع السخرية من الأمور الدينية منتشر وبكثرة في الغرب حتى في افلامهم ومسلسلاتهم، وأكثر من يتنتّف فيها هم المسيحيين. نعم هو شي غلط بنظرنا، بس صاير شي عادي عندهم، فمسألة انك تجلس تسوي حمله على كل واحد غربي يسب دينك هو مجرّد مضيعة للوقت والجهد، الا اذا كان هدفك هو استغلال جهل وعاطفة الناس عشان تمشّي سوق مقاطعك. ومسألة انك تروح تسب الاجانب لانهم سبوا دينك يزيدهم عناد على سب دينك، ويشوه صورة ديننا واخلاقياته في عيونهم. واذا بتقول “ما طقيت خبر لنظرتهم لنا” فليش تتعب نفسك أساساً وتسوي حمله دامك ما تطق خبر؟

عموماً اتمنى من الناس انهم يتحققون من المواضيع بانفسهم قبل ما “يدرعمون” وراها، وما يخلون أحد ينقل لهم معلومه غلط ويمشيهم على كيفهم. الله خلق لك عقل عشان تستخدمه.

وأخيراً، اذا كنت فعلاً تحب الرسول عليه الصلاة والسلام فمن باب أولى انك تتبع الأخلاقيات اللي حثنا عليها، وتكلم أي واحد يختلف معك في الأمور الدينية بأدب، لأن في النهاية ديننا مستحيل ينتشر بالسب والشتم والكلام القذر.