محمد الشريف
أعلنت كونامي اليوم ان منصّتها القادمة اللي تبي تركز عليها هي الجوالات، وانها بتدخل فيها بشكل شرس.
التصريحات هذي جات من المدير التنفيذي الجديد لشركة كونامي، واللي قال في المقابلة:
” بندخل في عالم الجوالات بشكل شرس. منصّتنا الرئيسية بتكون الجوالات. نبي نتبع نظام ادفع وأنت تلعب (pay as you play) مثل ألعاب Power Pro و Winning Eleven. ألعابنا لازم تنتقل الى بيع مميّزات”.
” حنا شفنا هذا الشي حتى مع الناس اللي يشترون اللعبة من المحلات، وكيف انهم متحمسين لشراء محتويات اضافية. نجاح لعبة Success Pro بالذات خلانا نتحمس اننا نطلق ألعابنا المشهورة على الجوالات بشكل غير مسبوق”.
المدير التنفيذي الجديد جدًا متحمس على منصة الجوالات، وناوي يدخل فيها بقوّة:
” عالم الألعاب انتشر وصار موجود على كثير من المنصات، ولكن في نهاية الأمر المنصة القريبة لنا هي منصة الجوال. منصة الجوال هي المستقبل”.
الأمر ما وقف على كذا، ولكنه ناوي يطلق ألعاب كونامي المعروفة على الجوالات برضه:
“نتمنى ان ألعابنا العالمية مثل Metal Gear Solid و Winning Eleven تكمّل في نجاحها، لكننا دائمًا نفكّر في كيفية اطلاق ألعابنا على الجوالات”.
” مع الألعاب اللي تنزل على أكثر من منصة، ما نشوف أي هدف في تقسيم السوق الى عدّة تصنيفات منفصلة عن بعضها. منصّة الجوالات بتاخذ دور جديد وهو ربط عامّة الناس مع عالم الألعاب”.
يبدو ان كونامي من جد متحمسة تدخل عالم الجوال. احتمال ان هذا مرتبط بعدم اهتمام كونامي في ألعابها على الأجهزة المنزلية واللي تسببت في سلسلة من المشاكل مع أشهر ألعابها، سلسلة ميتل جير.
وش رأيكم بكلام المدير التنفيذي الجديد لكونامي؟
بارعة
احمد خالد
