مخرج ومخترع السلسلة المشهورة ميتال جير سوليد، هيديو كوجيما، يقول انه شاف جراند ثيفت أوتو 5 على بلاي ستيشن 4، وانها من رهابتها جابت له الاحباط!
في بداية الكلام عن هذا الموضوع، يقول كوجيما: “حنّا وروك ستار نمشي في طريقين مختلفين تماماً، لمّن قلنا اننا بنسوي لعبة عالم مفتوح (يقصد ميتال جير سوليد 5) الكثير ظن اننا بنسوي مثل روك ستار وجراند ثيفت أوتو. اللي أحاول أسويه أنا هو لعبة تسلّل وتخفّي بطريقة حرّة فقط”.
بعدها يدخل كوجيما في صلب موضوعنا: “الشي اللي سووه روك ستار في نسخة جراند ثيفت أوتو 5 الجديدة خرافي، يوم شفتها على بلاي ستيشن 4 أصابني احباط من رهابتها. هذا الشي ماله علاقة بتصميم الألعاب، لكنه شعور شخصي لا أكثر. الجودة اللي شفتها على نسخة بلاي ستيشن 4 كانت من جد ممتازة”.
هذي ماهي أول مرة كوجيما يصاب فيها بالاحباط بسبب جراند ثيفت أوتو، قبل سنة روك ستار نزلت عرض لجراند ثيفت أوتو 5 وتكلم عنه كوجيما، وقال انه أصابه احباط من الجودة اللي شافها في العرض.
قد تناقشنا عن الفرق بين نسخة بلاي ستيشن 3 وبلاي ستيشن 4 لجراند ثيفت أوتو قلنا انها شي خرافي. هل تتوقعون انها بتتفوق حتى على الألعاب اللي نازله خصيصاً على الاجهزة الجديدة؟
