تكلمنا أكثر من مرة عن اللعبة الطموحة في حلقات البودكاست، وخصوصاً الحلقة الخاصة اللي سويناها في تغطيتنا لمعرص E3 هذي السنة. المشكلة في تجربتي مع الديمو حق E3 ان المطور واقف فوق راسي يشرح لي كل شي في اللعبة ويستعرضها لي، غير ان فيه ناس وراي تبي تلعبها. لكن المرة هذي وصلنا كود، وأخيراً حصل لي أجرب جزء من اللعبة برواق.
الديمو كان عبارة عن مهمة وحدة بس، ولكنها مهمة أعطتني الكثير من المعلومات عن اللعبة، واللي بأشرحها بالتفصيل في موضوع اليوم.
أولاً التقديم في اللعبة ممتاز، شرح الأوضاع مع الـHelgast “الأعداء المعروفين في السلسلة” والمشاكل الحاصلة بينهم وبين الـ ISA “الطيّبين” بالاضافة الى شرح المهمات اللي تحتاج تسويها وسط هالمشاكل.
أول ما تبدأ اللعب تلاحظ ان فيه خريطة صغيرة تحت على اليسار فيها معلومات مهمة جداً مثل مواقع الأعداء وهل هم منتبهين لوجودك أو لا، وغيرها أشياء كثيرة بأشرحها وحدة وحدة.
من أهم الاضافات اللي لاحظتها في اللعبة هي اضافة Stealth “التخفي والتسلل”، وهي بشكل أساسي انك بدل ما تدخل أي مكان في اللعبة وتلقى الأعداء يطلقون عليك، فيه عندك الخيار انك تتسلل من وراهم وتتخلص منهم واحد واحد. التخفي أعجبني مرة، طريقة توزيع الأعداء متقنة وصعب على اللاعب انه يتخلص منهم بسهولة، خصوصاً اني كل ما تسللت ورا واحد وطعنته يصرخ وأخوياه يسمعون صرخاته ويجون يتأكدون من الوضع.
الكثير يتساءل عن كيفية استخدام تقنية اللمس في اللعبة، وهذا شي طبيعي بيكون موجود في أي لعبة للفيتا. استخدام اللمس معقول جداً، في كل المواقف اللي استخدمت فيها اللمس كان خياري، بامكانك تضغط مثلّث أو تلمس الأيقونة اللي قدامك على الشاشة عشان تفتح الباب أو تسوي أي شي ثاني. لكن الاستخدام الالزامي الوحيد للمس هو في القتال اليدوي مع الأعداء “Melee attacks” واللي فيه اضافة جيّدة، وهي انك اذا اشتبكت مع أحد الأعداء يطلع لك “سهم” على الشاشة لازم تسحب اصبعك بالاتجاه نفسه عشان تنفذ الضربة القاتلة على راس الهيلقاني المسكين.
من الاضافات الجديدة على السلسلة واللي لا بد من ذكرها هي العملة “Currency”، وهي ببساطة عملة تشتري فيها أشياء في اللعبة مثل الأسلحة والذخيرة والدروع وغيرها. تحصل على العملة من خلال تنفيذك لأشياء معينة في اللعبة مثل قتل الأعداء أو تنفيذ المهمات المطلوبة منك وغيرها. تختلف مقدار العملة اللي تجيك على حسب طريقة القتل، اذا جبت الطلقة في راس العدو راح يعطونك 100 عملة، واذا قتلته بالسكين والضربات اليدوية يعطونك 100 برضو، لكن اذا قتلته بشكل عادي يعطونك 50 فقط. برضو تجميعك للذخيرة اللي طايحة في الأرض يعطونك عليها فلوس.
ذخيرة؟ ايه أضافوا ذخيرة في السلسلة، وهذي من أساليب الموازنة اللي أعجبتني في اللعبة. هذي من ألعاب التصويب النادرة اللي حسيت اني أحسب حساب كبير للطلقات اللي معي واني أحرص على جمعها بعد ما أقتل أي عدو. من المعروف في ألعاب التصويب ان الأسلحة بشكل عام مرميّة في كل مكان في المرحلة، أول ما تخلص من الأعداء رح عند جثثهم وتلقى عندها ما لذّ وطاب من الأسلحة والذخيرة، لكن هذي المرة لعبتها كيلزون بطريقة مختلفة.
فيه عندك برضو اضافة لطيفة وهي Mantis Engine طائرة صغيرة فيها سكّين، تقدر تتحكم فيها وتروح عند الأعداء وتقتلهم باستخدامها. استمتعت باستخدامها، خصوصاً شكلها وهي تطلع السكّين وتدخله في راس الهيلقان. تذكرون Metal Gear MK II اللي مع سنيك في ميتال جير سوليد 4؟ هي نفسها بالتمام، لكن على الطريقة الكيلزونية. مساكين الهيلقان وراهم قتلات شنيعة على يدين اللاعبين في هالجزء.
تم تطوير طريقة قتال الأعداء معك، لاحظت في كثير من المرات ان الأعداء يغيرون أماكنهم الاحتماء حقتهم باستمرار. كثير من المرات أكون شايف موقع واحد قبل لا آخذ وضعية الاحتماء، واذا طلعت من الاحتماء ألقاه يطلق علي من مكان ثاني! برضو من المفاجآت مع الأعداء انهم ينسدحون بعض الأحيان اذا اخذوا وضعية الاحتماء عشان يصعب عليك التصويب. تخيل الأعداء ياخذون وضعية الاحتماء ولا تدري هل هم بيطلقون عليك وهم واقفين ولا وهم منسدحين؟ طريقة قتال رائعة جداً، وهذا شي ماهو مستغرب على السلسلة اللي تميّزت بذكاءها الاصطناعي للأعداء.
آخر اضافة لاحظتها هي الاختراق “Hacking”، تسويها عشان تنفذ مهمات معينة مثل تعطيل أنظمة الصواريخ الهيلقانية وغيرها من المهمات. طريقة الاختراق ممتعة جداً، تقدر تقول انها لعبة صغيرة وسط اللعبة الأساسية. فكرتها ان فيه صورة قدامك مقسمة الى عدة أجزاء، وفيه على أطراف الشاشة أجزاء مشابهة لها، لازم تاخذ كل جزء من أطراف الشاشة وتركبه بشكل صحيح على الصورة الأساسية وفي وقت معيّن.
الشي الوحيد اللي مخّوفني في اللعبة في القصة والشخصيات والحوارات، صحيح ان الحكم على هذي الأشياء لازم يكون بعد التجربة اللعبة كاملة، لأن الديمو ما يعطيك الا جزء بسيط من القصة والشخصيات والحوارات. ولكن على حسب اللي لعبته، الشخصيات كانت ضعيفة جداً خصوصاً الشخص اللي يعطيك المهمات. ما أدري ليه Guerrilla Games عرفوا يسوون كل شي في سلسلة كيلزون ما عدا الشخصيات.
أخيراً قبل لا ننهي الكلام، أذكر من ضمن كلامي مع المطوّر في E3 ان الأسلحة اللي تطورها في طور القصة “والأسلحة كثيرة مرة في هالجزء” تقدر تاخذها معك في طور الأونلاين وتلعب فيها. أعتقد ان بهذا الشكل انحلت مشكلة كبيرة في الأونلاين وهي ان اللاعب بعض الأحيان يدخل الأونلاين متأخر ويلقى نفسه متوّرط بمسدس ورشاش أبو كلب بينما باقي اللاعبين فاكّين الأسلحة القوية كلها.
هل بتنجح كيلزون ميرسيناريز؟ أتمنى انها تنجح، جربتها مرتين الى الآن وكلها كانت ايجابية. لازم تنجح اللعبة وتكون لعبة الشوتر المنقذة للفيتا، خصوصاً بعد الاحباط العظيم اللي شفناه من Resistance: Burning Skies واختها Call of Duty: Declassified.
هل تعتقد ان كيلزون راح تكون لعبة التصويب المنقذة للفيتا؟ شاركنا برأيك في التعليقات!
