أحمد قربان
على الرغم من حداثة حصرية الـPS4، لعبة كيلزون (Killzone: Shadowfall)، الا ان استديو قيريلا قيمز (Guerrilla Games) بدأوا فعلاً ينظروا للمستقبل لتصميم لعبة جديدة. الاشاعات تقول ان اللعبة الجديدة راح تكون تصويب من منظور الأوّل (FPS) و الأر بي جي (RPG) في نفس الوقت، مثل لعبة ديستني (Destiny).
في تصريح لمنتج اللعبة، بوريا توركان (Poria Torkan)، قال: “أن نصمم لعبة على جهاز الـPS4 هذا موضوع مشوق. لو قلت كلمة زيادة الناس في الاستديو راح يقتلوني”.
الاستديو وظّف مؤخراً كاتب لعبة فول اوت نيو فيقاس (Fallout: New Vegas) وهو راح يساعدهم في اللعبة الجديدة. والظاهر ان هذي اللعبة راح تكون مختلفة كلياً عن كلزون. الشي اللي راح يساعد في ان تكون اللعبة الجديدة رهيبة ومختلفة في وجهة نظر مصممين لعبة كلزون هو ان الاستديو راح يختبرها على البي اس فور وهو موجود ومتوفر، عكس كلزون بحيث في وقت تصميمها الجهاز كان تحت الانشاء.
تكلم بوريا عن الفرق بين لما تصنع لعبة على جهاز تحت الانشاء وبين انه يكون جاهز: “افضل وصف للفرق هو كأنك جالس تسوق سيارة سباق و السيارة اصلا جالسة تتصنع”. طبعا قصده انهم كانوا يصمموا كلزون والـPS4 نفسه كان تحت التصنيع.
الى الان ما في اخبار عن اعلان اللعبة في المعرض المنتظر، إي 3 (E3). وبالعكس الاستديو يبغى ياخذ وقته وهو يصمم اللعبة ويبغى يسوي شي يخلي الناس تنهبل من رهابته.
قال بوريا: “احنا جلسنا سنتين ونص عشان نحدد ايش حنسوي بالمحرك اللي عندنا، وسنة ونص عشان نحدد الاشياء اللي نبغى نصنعها. تخيل لما استديو يجلس تقريبا 5 او 4 سنين وهو يصمم لعبة لجهاز الـPS4 كيف راح تكون؟ راح ناخذ فرصتنا بس لما تجهز اللعبة”.
كلام الاستديو يحمس و يخلينا ننتظر لعبة بطلة، لكن في نفس الوقت لما تشوف تاريخ لعبة كلزون تتراجع عن حماسك ويخليك تقول “ممممم ما اعتقد تكون لعبة جبارة واسطورية”، مالنا الا ننتظر ونشوف اعلانات عن اللعبة ومواصفاتها ومميزاتها وبعدها نحكم.
اش رايكم؟ تعتقدوا ان اللعبة راح تكون اسطورية ولا بس تسويق؟ شاركونا.
احمد خالد
Saudi Gamer
