تحديث: بنبدا ان شاءالله نراسل المتقدمين اللي اخترناهم يوم 1 أكتوبر 2012.
جا الوقت اللي نحتاج فيه نكبّر فريق العمل أكثر، ونبحث عن شخص أو شخصين رهيبين ينضمون لنا. باب الانضمام مفتوح للجميع من الجنسين.
أهم شيئين عندنا بالنسبة للي ينضم لنا هم:
- أنه يكون ملتزم بالشغل ويسوي الشغله بوقتها (أو قبل)، مو راعي سحبات.
- أنه يكون مبادر. يعني يقترح لنا أشياء لتطوير الشغل دايم ويساعد في اشياء خارج نطاق مسؤولياته، مو يسوي المطلوب منه وبس.
الشخص المنضم بيكتسب خبرة كبيرة في عدة مجالات مع الوقت، وبيساهم مع الفريق في تطوير مشروع سعودي جيمر الى الأفضل.
مزايا الانضمام بتكون راجعة لجهد الشخص والتزامه بالعمل، ما نقدّر نحدّد شي من البداية. نحتاج في هالمرحله ناس مؤمنين بمشروع سعودي جيمر ويبون يساعدون في تطويره وتقديم الأفضل لمتابعينه، مو ناس ما يهمهم الا مصلحتهم الشخصية فقط، لكن الأكيد ان الفائدة المعنوية كبيره وتسوى التعب.
ملاحظات مهمة:
- الانضمام ماله علاقه بالبودكاست لاننا مكتفين حالياً.
- بنختار مبدئياً عدة أشخاص نجربهم لفترة معينه، ثم نختار منهم شخص أو شخصين حسب انتاجيتهم والتزامهم.
- مثل ما سوينا سابقاً يوم توسّعنا في فريق العمل، ما راح نعلن عن انضمام الاعضاء الجدد رسمياً الا بعد تجربتهم لعدة أشهر على الأقل عشان نضمن جدّيتهم.
