محمد الدوسري
طبعا في عالم الالعاب التنويع موجود وكبير، سواء في نوعية اللعبة او الاجهزة الموجودة بكل جيل، وهذي من اقوى عوامل عالم الالعاب الالكترونية، لكن ساعات بعض الالعاب اللي تكون منتظرها من مدة او جزء جديد من سلسلة تنحصر لمنطقة ولغة معينة لأسباب كثيرة، ممكن الناشر ما عنده السيوله انه ينشرها بأكثر من دولة او ان الناشر يلاحظ ان اغلب المعجبين اللي يشترون اللعبه او الجهاز المعين يكونون بالأغلب في الدولة اللي بينشر فيها اللعبة والدولة هذي غالبا تكون اليابان. في مقالنا لليوم بتكلم عن لعبة او جهاز اضطريت أشتريه رغم انه منحصر للأسواق اليابانيه، سواء طلبته من برا او شريته من هنا، وأيش السبب اللي خلاني اشتريه.
الألعاب اللي اضطريت اشتريها هي:
Zero: Tsukihami no Kamen – Fatal Frame 4 – Nintendo Wii
بما أني من عشاق سلسلة فيتل فريم (Fatal Frame) وأعتبرها واحدة من أفضل سلاسل الرعب، وخاصة فكرتها في التقاط الاشباح واللي تعتبر الى الأن ميزة قوية لهالسلسلة. من بعد الجزء الثالث للسلسة واللي نزل لجهاز البلايستيشن 2 (PS2) طال أنتظاري للجزء الرابع منها، طلعت الشركة الناشره المطوره للسلسلة تيكمو (Tecmo) وأعلنت عن الجزء الرابع الحصري لجهاز نينتيندو وي (Wii) والأغرب من هذا كله ان الجزء الرابع من السلسله راح يكون حصري للأسواق اليابانية! وأنتظرت فوق السنة على أمل نزول الجزء الرابع من السلسله للأسواق الغربية مثل اوروبا وامريكا الشمالية، ولكن بعدها فقدت الامل وقررت بنهاية سنة 2009 اني اطلبها من برا وأمري لله، اللعبة وصلتني ولعبت فيها حوالي اربع ساعات لكن للأسف ضعت بالقصة تماما بما انها تكمل الاجزاء الماضية وفيها معتقدات كثيرة في هاللعبة. جلست ابحث بالنت على أمل اني احصل فيديوات او مقالات تشرح لك القصة بكل مرحلة تمر فيها، والحمد لله على وقتها حصلت مقالة تشرح قصة اللعبة بكل مرحلة تعديها؛ حتى المحادثات حصلتها مترجمه للأنجليزية في المقالة، والحمد لله قدرت اخلصها وافهم قصتها بالكامل والسبب الأكبر هي المقاله اللي ترجمت لي كل احداث القصه بالتفصيل، غالبا ما احب العب ألعاب باللغه اليابانية لأني جدا اهتم بالقصه ولا احب اخلصها وأكون ما فهمت شيء، لكن الجزء الرابع من سلسلة فيتل فريم كان حالة خاصه.
الجهاز اللي أضطريت اشتريه هو:
Playstation VITA PCH-2000 – PS VITA SLIM
ذكرت قبل أسبوع مقالة كاملة عن البلايستيشن فيتا ووضعه وكيف هالجهاز اعتبره حلم وتحقق لكل عشاق الاجهزة المحمولة المخصصة للألعاب، لكن الاصدار الاول من الجهاز كنت أعاني منه كذا شغلة، ألوان الشاشه كانت جدا غامقة وتغمق اي درجة لون حتى لو كانت خفيفة، والسبب يعود لتقنية الشاشه وهي (OLED)، غير ان الشاشه كانت تعرق كثير، وأخيرا مميزات موديل السلم القوية، مثل نحف الجهاز واستخدامه مخرج مايكرو يو اس بي “Micro USB” للشحن ونقل البيانات، ورفع سعة الذاكره الداخلية للجهاز، والبطاريه صار عمرها أكبر والشاشة تعرض الالوان الطبيعيه للألعاب وهي (LCD)، لكن كان السبب الأقوى بينهم واللي خلاني أطلب الجهاز من اليابان بسعر عااالي جدا هو النسخه المحدودة من الجهاز بتصميم الجزء العاشر من السلسلة العريقه فاينل فانتزي (Final Fantasy X/X2) وخاصة ان للجزء هذا مكانة خاصة عندي. وصلني الجهاز بعد مدة طويلة من الانتظار وأضفت صور من تصويري للجهاز، ما خيب ظني الجهاز ابدا من ناحية التصميم او مواصفات الموديل الجديد، والفيتا سليم يعتبر الجهاز الرابع عندي من اجهزة البلايستيشن الفيتا (PS VITA) بما أني احب اجمع الالعاب والاجهزه بتصاميم محدودة، ومن الاشياء اللي تفاجأت فيها بعد ما وصلني الجهاز ان الجزئين من سلسلة فاينل فانتزي (Final Fantasy X/X2) موجودين مع الليمتد بشكل منفرد لكل جزء له غلاف لحاله وكرت لعبه خاص فيه، بعكس النسخه اللي صدرت للغرب الجزء الاول يجيك مع الغلاف والثاني تحمله من البلايستيشن ستور، وهذي اضافة ممتازة للنسخه المحدودة للجهاز، وكنت متأكد ان هالنسخه ماراح تصدر للغرب لأنها من عوايد شركة سكوير أينكس (Square Enix) ان أغلب الحصريات للألعاب أو الاجهزة تكون حصرية للأسواق اليابانيه.
الختام
هذي قصتي مع العاب او اجهزه انحصرت للأسواق اليابانيه أضطريت اني اشتريها من برا. علمنا وش هي الالعاب اللي لعبتها او خلصتها باللغه اليابانيه، والاجهزه اللي شريتها وكانت حصريه لليابان، نبغى نشوف ردك بالتعليقات.
أيمن اليغشي
احمد خالد
