محمد عبدالمحسن
في الشهور اللي فاتت صدرت أجهزة الجيل الجديد بلايستيشن 4 (Playstation 4) وإكسبوكس ون (Xbox one)، الجهازين الحين في منافسة كبيرة ومبيعات كل واحد فيهم كبيرة مرة، بس ليش أنا كتبت هالمقالة؟ السبب هو أن مايكروسوفت (Microsoft) في الفترة السابقة اتخذت قرارات غريبة جداً وخلت الملايين من الناس يكرهوها، أحد هذي القرارات اللي أثرت على العرب جداً هو إصدار الجهاز المتأخر عندنا، الإشاعات تقول إنه راح ينزل في أكتوبر 2014 يعني بعد 11 شهر من إصدار البلايستيشن 4 عندنا!
إلى جانب مواصفات الجهاز التقنية اللي خلتنا نعرف إنه البلايستيشن 4 أقوى من الإكسبوكس ون إلى حد كبير، آخر دليل موجود الآن على الساحة هي النسخة المطورة من تومب ريدر (Tomb Raider: Definitive Edition) اللي تشتغل على 60 إطار في الثانية على البلايستيشن 4 وعلى 30 إطار في الثانية على الإكسبوكس ون، لا ننسى توجه مايكروسوفت “الترفيهي” واهتمامهم بالقنوات والتلفزيون والموسيقى.
كل هذي الأشياء خلت أغلب اللاعبين يحكموا على الإكسبوكس ون بإنه جهاز فاشل، أو على الأقل زعموا بأنه البلايستيشن 4 هو اللي انتصر عليه.
في هذي المقالة راح أوضّح ليش أنا أختلف مع كل اللي يقول إنه الإكسبوكس ون جهاز سيء أو إنه ماله أمل في منافسة البلايستيشن 4 ومتأكد إنه الكثير راح يتفق معاي بإذن الله.
إيش المشكلة في توجّه مايكروسوفت؟
قبل معرض إي ثري (E3) مايكروسوفت كان عندها مؤتمر أقدر أقول إنه كان الأسوأ في تاريخها، ما تكلموا فيه عن أي لعبة بس تكلموا عن الخدمات الترفيهية اللي يقدمها الجهاز من برامج زي سكايب (Skype) ونيتفليكس (Netflix) وخدمات أخرى كثيرة
بعد ما انتهى المؤتمر كل الناس حكمت على مايكروسوفت بالإعدام، بس بعدها بأسابيع طلعت مايكروسوفت في مؤتمرها في إي ثري وأعلنت عن ألعاب حصرية كثيرة جداً من استديوهات مختلفة وأنواع مختلفة وكثير من الناس انذهلوا وغيروا نظرتهم للجهاز 100%، سؤالي هو بما إن مايكروسوفت حرصت إنها تقدّم أكبر عدد من الحصريات إيش المانع في إنها تقدّم خدمات ترفيهية؟ “بغض النظر عن كونها ماتشتغل في منطقتنا”.
إيش المشكلة في مواصفات الجهاز ؟
من قبل ماتنزل أجهزة الجيل الجديد حتى و حنى عارفين إنه البلايستيشن 4 متفوق “تقنياً فقط”، بس الغلطة التي لا تغتفر لسوني (Sony) هي السوفتوير، صح إن النظام تحسن كثير في البلايستيشن 4 عن أول، بس مازال متخلف جداً مقارنة بالإكسبوكس ون، طيب؟ صح إنه ممكن تكون بعض الألعاب أفضل عالبلايستيشن 4 بس صراحة أنا أشوف إنه الأحسن إنك تركّز على النظام أول لأنه أحد الأساسيات اللي لو كانت سيئة ممكن تخرب تجربة اللاعب بالكامل.
إيش المشكلة في السعر؟
أحد أهم الأشياء اللي خلّت الناس تنحاز لجانب سوني هو سعر جهازها مقارنة بالإكسبوكس ون اللي أغلى من البلايستيشن 4 بـ100$، بس إيش المشكلة في الموضوع ؟
كلنا نتذكر القرارات اللي أعلنت عنها مايكروسوفت في إي ثري زي مثلاً منع استخدام الألعاب المستعملة أو إلزامية الاتصال بالانترنت (DRM) وقت اللعب، كل هذي القرارات الغبية رفعت عدد الطلبات المسبقة للبلايستيشن 4، بس بعد المؤتمر بأسابيع ألغت مايكروسوفت كل قراراتها وارتفعت نسبة الطلبات المسبقة وتعدّت البلايستيشن 4 في يوم واحد!
يعني نقدر نقول إن السعر مافرق كثير مع الناس؟
إيش المشكلة في الألعاب اللي صدرت مع الجهاز ؟
طبعاً أنا متأكد إنه أكثر من نص اللي يقرأوا المقالة هذي ناويين يشتروا البلايستيشن 4 لمن تنزل عليه حصريات كويسة، و إن أغلب اللي اشتروا الجهاز حالياً ماعندهم شي ينلعب عليه، بعكس الإكسبوكس ون اللي ألعاب الإصدار الخاصة فيه أكثر.
ألعاب الإصدار الخاصة بالإكسبوكس ون:
- Dead Rising 3
- Ryse: Son of Rome
- Forza Motorsport 5
- Killer Instinct
- Peggle 2 “حصرية مؤقتة”
- Fighter Within
- Lococycle
- Zoo Tycoon
- Crimson Dragon
- Powerstar Golf
وألعاب الإصدار الخاصة بالبلايستيشن 4 هي:
- Killzone: Shadow Fall
- Knack
- Resogun
- Contrast
طبعاً بغض النظر عن كون الألعاب جيدة أو لا , بس ألعاب الإكسبوكس ون أكثر وأحسن.
هل المشكلة في المبيعات؟
نجي لأهم نقطة تحدد نجاح الأجهزة، المبيعات!
في اليوم الأول للجهازين انباع أكثر من مليون جهاز، في الأسبوع الأول سوني باعت 2.1 مليون جهاز، أما مايكروسوفت باعت 2 مليون جهاز، سوني باعت 4.2 جهاز إلى الآن ومايكروسوفت باعت أكثر من 3 ملايين جهاز.
واضح إن سوني متفوقة من هذي الناحية، بس لا ننسى إن الإكسبوكس ون أُصدر في 13 دولة فقط، أما البلايستيشن 4 موجود في كل العالم إلا اليابان، ولا ننسى فرق السعر بين الجهازين.
في النهاية…
كل اللي أحب أوصله لك ياعزيزي القارئ هو إن الحرب بين الجهازين مازالت موجودة، كلنا كرهنا مايكروسوفت بعد أفعالها اللي سوّتها، بس لو ركّزنا في الموضوع راح نحصل إن الجهازين متعادلين من نواحي كثيرة.
لسا تشوف الإكسبوكس ون جهاز فاشل؟ ليش؟ شاركنا برأيك 🙂
أحمد عصام
Saudi Gamer