قبل يومين من الآن، ومع بداية العطلة الأسبوعية، تفاجأ اللاعبين -سواءً على شبكة بلايستيشن أو اكس بوكس لايف– بأن شبكتهم المفضلة ما تشتغل، وانهم ماهم قادرين يدخلون المتاجر ولا يقدرون يلعبون أونلاين مع أخوياهم.
تابعنا الموضوع وكتبنا عنه، وللأسف ما صرّحت لا سوني ولا مايكروسوفت عن سبب العطل، واكتفت الشركتين بقولهم انهم واعين المشكلة وانهم شغّالين عليها وبيصلحونها قريب.
ادّعت مجموعة ليزارد سكواد انها ورا الهجمة، وذكرت لنا أسبابها، وذكرت لنا السبب الغريب اللي خلاهم يوقفون الهجوم على الشبكتين. رجعت الشبكتين للعمل الآن، ولكن لا زال فيه مجموعة كبيرة من اللاعبين ما رجعت لهم شبكتهم المفضلة، وسألونا كثير على الشبكات الاجتماعية، فقررنا نكتب لكم موضوع كامل ونعطيكم تجربتنا، مننا حنا فريق عمل الموقع.
بالنسبة لاكس بوكس لايف، أحمد الراشد شيّك عليها أمس واشتغلت معه بكامل خدماتها بدون أي مشاكل.
أما بالنسبة لشبكة بلايستيشن، فالشبكة اشتغلت مع جلال مجهلي، وقدر يدخل المتجر ويلعب أونلاين واشتغلت كامل الخدمات معه. بعض أعضاء الفريق الى وقت كتابة هذي الكلمات لا زال ماهو قادر يدخل، لكن كأن الأمور بدأت تتحسن من عصر اليوم. نقدر نقول لكم ان الأمور بدأت ترجع لأمورها الطبيعية، وان المسألة هي مسألة وقت لا أكثر.
آخر تحديث لبلايستيشن على تويتر، يقولون فيه انهم واعين بالمشاكل اللي تواجه بعض المستخدمين، وانهم يشتغلون على حل للمشكلة.
عموماً، كثيرين منكم لا زال يسألنا على الموقع في التعليقات وفي الشبكات الاجتماعية. نقدر نقول لكم حسب تجربتنا ان كل شي بيرجع تمام، نحتاج شويّة صبر فقط، لان أشياء مثل هذي تحتاج وقت الين ما ترجع السيرفرات تشتغل بشكل طبيعي.
حسب ما شفنا في التعليقات على المواضيع اللي قبل، الغالبية كانت لا زالت تقول ان الشبكة ما تشتغل عندهم.
علّمونا وش يصير معكم، ولا تنسون ان القضيّة الآن انتهت وانها صارت مسألة وقت لا أكثر 🙂
