محمد الدوسري
البلايستيشن فيتا (PS VITA) بالنسبة لي قصة حزينة بعالم الالعاب، لكن قبل ما أشرح ليش؛ خلوني اقولكم وش هو البلايستيشن فيتا ووضعه حالياً.
سوني بعد صمود جهاز البي اس بي (PSP) ونجاحه القوي كأول جهاز محمول من شركة سوني باع أكثر من ” 80 مليون ” جهاز حول العالم، قررت سوني تعلن عن جهازها المحمول الجديد، وطلعت اشاعات كثيرة بالبدايه وكان أسم الجهاز الأولي هو (NGP) أختصار لكلمة (Next Generation Portable). في معرض (E3) لعام 2011 أعلنت سوني عن الجهاز وأسمه الرسمي ومواصفاته، وكان هالجهاز نقلة جبّارة بعالم أجهزة المحمول، سواء من ناحية تصميم الجهاز او مواصفاته؛ بما ان الجهاز يحتوي على معالج رباعي النواة بسرعة تصل الى (2 هرتز) وذاكرة عشوائية بحجم (2 جيجا) بايت، وهذي اكبر من الذاكرة المخصصة لجهاز البلايستيشن 3 بأضعاف، وغير شاشة الجهاز بميزة اللمس وتقنية الـ “OLED”. تصميم الجهاز كان حلم أي لاعب للأجهزه المحمولة؛ لأنهم اضافوا انلوقين “Dual Analog”.
الجهاز صدر بعام 2012 للأسواق العالميه بقائمة العاب ممتازة، لكن الجهاز بشكل مفاجئ طلعت له قرارات وضعف دعمه لاسباب كثيرة راح نراجع بعضها ان شاء الله.
الجهاز بعد ما صدر ومعه قائمة العاب جدا ممتازهة ومتنوعة؛ جلس فترة بدون اي العاب جديدة، وهذي من اكبر الاغلاط اللي صارت للجهاز، بعكس شركة نينتيندو وجهازها المنافس (3DS) اللي قاعدين يوزعون العابه على فترات معينة من السنة، وهذا الشيء يخلي الجهاز دايم فعال وما تمر عليه فترة جفاف تخلي الناس تنسى الجهاز. من الاسباب ايضا ضعف الجهاز بالمبيعات، واللي ما تنلام عليه الا شركة سوني نفسها وهي الذاكرة الخارجيه للجهاز، الجهاز مافيه ذاكرة داخلية تكفي حتى لحجم لعبه وحده، والمشكله الاكبر الذاكره الخارجيه نوعها واحد؛ وهي اللي تركب لجهاز الفيتا فقط من تصنيع سوني، اسعارها كانت جدا غالية! مثال هذا ذاكرة خارجية حجمها ” 16 قيقا ” سعرها كان 60 دولار!!، و ” 32 جيجا ” كان سعرها 100 دولار!!!!!، اسعار غالية جدا لجهاز محمول ماله العاب في وقته. الجهاز نزل له موديلين، واحد يدعم الواي فاي ” WIFI ” والثري جي ” 3G “، والموديل الثاني بس يدعم واي فاي ” WIFI “، المشكله هنا سعر الموديل اللي يدعم ثري جي ” 3G ” كان غالي مقارنة بالموديل العادي و بالجهاز المنافس ” 3DS “، بعد كل هذا سوني ما دعمت الجهاز بالشكل المطلوب بتاتا،العاب الجهاز كانت جدا قليلة مقارنة بالجهاز الخصم ” 3DS “. غير ان بعض الالعاب نزلت بشكل جدا محبط وكانت تحمل اسامي العاب قوية مثل كول اوف ديوتي (Call of Duty) وريسيستنس (Resistance) حتى الدعايه للجهاز كانت ضعيفة مقارنة بجهاز سوني المنزلي البلايستيشن 4 (PS4).
الجهاز الى الان ما حصّل ربع مكتبة حصريات الجهاز السابق (PSP)، العاب مثل ميتل جير سوليد (Metal Gear Solid) وجاد اوف وار (God Of War) وثلاثية بيرسونا (Persona) والعاب كثيرة تحتاج انها ترجع بأجزاء جديدة على الفيتا.
الجهاز حاليا سعره مناسب جدا للمواصفات اللي يقدمها للمستهلك، وحتى اسعار الذاكره بعد التخفيض صارت مقبولة، والحين الجهاز يحتاج شغلتين عشان يكون مدعوم من الشركة عشان المستهلك يتحمس يشتريه، الا وهي الالعاب الحصرية، سواء العاب جديدة او اجزاء جديدة من سلاسل قديمة، واتمنى من سوني تقدر تجيب اجزاء حصرية لسلاسل قديمة مثل ميتل جير سوليد او فاينل فانتزي (Final Fantasy)، العاب مثل هذي لها قاعدة جماهيرية كبيرة ممكن تشتري الجهاز عشان هالالعاب، وغير كذا تبين لك قوة الجهاز وتحمله، ونشوف العاب وافكار جديدة زي لعبة السنه لموقعنا سعودي جيمر لعام 2013 تيراوي (Tearaway). معرض (E3) القادم لازم سوني تسوي اعلانات للجهاز وللألعاب الجديده عشان ترجعه للساحه مرة ثانية،
لو هالشيء ماصار ممكن سوني بعد الفيتا ومبيعاتها التعبانه تحول بالكامل للاجهزة المنزلية، لأن دعمها للجهاز المحمول ضعيف ودعمها للاجهزة المنزلية زي البلايستيشن 4 و البلايستيشن 3 جدا قوي من كل النواحي.
الختام
الجهاز قصة حزينة بالنسبه لي، لانه حلم كل شخص يهوى اجهزة الالعاب المحموله. الجهاز جدا ممتاز كمواصفات وتصميم ومن شركة عريقة لها حصرياتها وخبرتها بعالم الالعاب، لكن للأسف ليومنا هذا الجهاز جالس يعاني ويلات الفقر والخذلان من قبل اللاعبين. وش رأيك بالموضوع ككل؟ وهل تتوقع ان جهاز البلايستيشن فيتا هو آخر جهاز محمول من شركة سوني؟ ياليت تعطينا رأيك بالتعليقات.
احمد خالد
