محمد الشريف
حضرنا اليوم لقاء صحفي مع وحدة من أضخم الألعاب الجاية في الفترة المقبلة، لعبة The Order 1886.
من أوّل الأشياء اللي تكلم عنها المطوّر كان الجرافيكس أو الرسومات، وكيف ان الرسومات في اللعبة بتكون متقدمة جداً. شفنا لقطة فيها انسان يتحوّل الى وحش، وذكر لنا المطوّر ان الانتقال هذا يتم بطريقة سلسلة بحيث ما فيه أي “انتقال مفاجئ” بتلاحظه مثل ما يصير في ألعاب أول، بحيث لو تدقق في اللقطات هذي بتلاحظ انها غالباً يغطونها بدخان أو شي عشان يخفون هالعيوب.
برضه من الأشياء الرهيبه في ناحية الرسومات هو ان بامكانك تقرأ كل الكلام المكتوب في الجرايد الموجودة في اللعبة وبشكل واضح، عكس الألعاب من زمان ما كان بالامكان اننا نقراها، بالموت نقرأ العنوان، أما الباقي فما كنا نقدر نقراه.
من الأشياء الرهيبه اللي شفناها في اللعبة هو ان لقطات QTE (لقطات سريعة تطلب منك الضغط على أزرار معينة بشكل سريع) فيها لقطات تموت فيها، بمعنى انك لو ما ضغطت الأزرار بشكل صحيح بتشوف مشهد يموت فيه الشخصية بشكل مختلف عن اللقطات الثانية.
البيئة كلها تتفاعل معك تقريباً، بحيث كل القوارير والعلب اللي تشوفها في البيئة تقدر تكسرها أو تحركها من مكانها، عكس باقي الألعاب اللي لازم تلقى فيها أشياء ثابتة في مكانها ما تتحرك لو تطلق عليها صواريخ نووية.
أما من ناحية القصة، فاحتمال انك وأنت تلعب تمر على ناس يسولفون، السوالف هذي ممكن تعطيك معلومات مهمة عن القصة. هذا معناته ان مو كل شي مشروح في المشاهد، لكن فيه أشياء خفيّة في القصة تقدر تكتشفها من خلال استماعك للمحادثات هذي.
اللعبة ما فيها طيّب وشرّير، كل شخص في اللعبة له مصلحة معينة يمشي وراها وخلاص، وهذا اتجاه جيّد شفنا ألعاب كثيرة تمشي فيه وأبدعت فيه، مثل ذا لاست أوف أس وغيرها.
بتنزل ذا أوردر في 20-2-2015 حصرياً على بلاي ستيشن 4.
احمد خالد
