مشهور الدبيان
كثير منا واجه مشاكل في نسخة Grand Theft Auto 5 بعد تحميلها من البلايستيشن 3، سواءً في تثبيت اللعبة أو خلال اللعبة نفسه (وجود تقطيع أو بطء في اللعبة، وتأخر تحميل بعض العناصر خلال اللعب). اذا انت شاري دسك اللعبة (من السوق)، فلا تشيل هم لأن ماعندك مشاكل غير انك دفعت 200 ريال زياده فوق سعر اللعبة الأصلي.
لقيت مؤخراً حل ساهم في أنه يحل مشاكل اللعب بالنسبة لي بشكل كبير. ومع اني توقعت انه انتشر لأنه نازل من فترة، الا انه في ناس كثير ما زالوا يسألوني عن كيفية الحل، فقلت أكتب موضوع أحسن.
تحذير قبل ما تبدأ:
بعد ما تتم الخطوات المذكورة في الأسفل، راح تفقد التالي:
- المسجات.
- قوائم التشغيل (playlists)
- المجلّدات اللي رتّبت فيها الألعاب أو الموسيقى أو الصور حقتك. بتحتاج ترجع ترتّبها من جديد.
ما راح تفقد أي شي ثاني. حتى ما راح تحتاج تفعّل حساباتك على الجهاز بعد ما تتبع الخطوات. لكن احتياطاً سوي نسخة احتياطية لكل بياناتك، لأني أخلي مسؤوليتي من أي شي تفقده لا سمح الله.
خطوات الحل
في حال كنت محمّل اللعبة وما قدرت تثبّتها، احذفها أول.
اللي بنحتاج نسويه هو اعادة بناء قاعدة بيانات البلايستيشن 3 بحيث تحسّن أداء الجهاز، وهالشي نسويه باتباع الخطوات التالية:
- طفّي جهاز البلايستيشن 3.
- شغّله وانت معلّق على زر التشغيل، وانتظر الى ما يطلع صوت رنّه، ثم رنّه ثانيه، ثم رنّتين. أول ما تسمع الرنّتين افلت اصبعك على طول. اذا سويتها صح بتشوف الشاشه التالية:
اذا ما طلعت لك، فارجع عيد الخطوات. - اشبك يد الجهاز عن طريق الكيبل، واضغط زر البلايستيشن.
- بتطلع لك قائمة، اختار منها الخيار رقم 4 (Rebuild Database)
- بتطلع لك بعدها شاشة عن كيبل الـHDMI أو شي زي كذا، اختر Yes عموماً.
- انتظر اعادة بناء قاعدة بيانات الجهاز، وخلال الانتظار ادع ربّك ان مشكلتك تنحل.
- في حال كنت حاذف اللعبة قبل هالخطوات، ارجع حمّلها وثبّتها من جديد!
شخصياً حلّت لي المشكلة وصارت اللعبة أفضل وأسرع (وناس كثير ضبطت معهم)، بس مدري اذا هي بتضبط معك ولا لا. يمكن تضبط، يمكن ما تضبط، يمكن ينفقع البلايستيشن، يمكن تطب عليك الهيئة وانت تسويها، ماحد يدري.
علمنا اذا ضبطت معك في التعليقات!
احمد خالد
أيمن اليغشي
