يوميا يتكرر نفس الشيء، يوميا نفس الأسطوانة تعاد مع مجرد تغيير مظهرها والأجهزة اللي تظهر عليها، مرة على الجوال ومرة على الكمبيوتر، حتى على أجهزة الكونسول تمر علينا، من سنين وهي تتكرر؛ والغريب إن هذي الأسطوانة يوم عن يوم تزيد بدلًا من إنها تخف وتنتهي.
الأسطوانة اللي أتكلم عنها هي السؤال المزمن للاعبين “متى ترجع سلسلة الألعاب الفلانية؟“، نعم أعمم على كل اللاعبين حتى أنت عزيزي القارئ، وقف لحظة وتفكر بالألعاب اللي اختفت وتبيها ترجع، وبما إنك لاعب من المؤكد عندك سلاسل أو على الأقل سلسلة ألعاب اختفت من فترة مب قريبة وتبيها ترجع، مثل سلسلة (CRASH)، ما أعتقد فيه شخص يقرأ هذا المقال ولا يبيها ترجع.
“متى ترجع سلسلة الألعاب الفلانية؟” سؤال محد يقدر يجاوبه غير الناشر والمطور، نقاشنا فيه مضيعة للوقت لأننا ما نملك عنه المعلومات الكافية، لكن “كيف ترجع سلاسل الألعاب؟”، أعتقد السؤال هذا هو اللي يجب أن يطرح.
أولًا وش معنى “ترجع سلاسل الألعاب“؟ الجواب ينقسم لنصفين؛ الأول: هو رجوع عنوان للسوق من زمان ما طرح فيه، مثل (HALF LIFE)، النصف الثاني: هو رجوع السلسلة لمجدها السابق وقوتها في صناعة الألعاب، مثل (Resident Evil).
ثانيا وش اللي يخلي مستوى السلسلة يتراجع وتختفي من ساحة كبار سلاسل الألعاب؟ فيه ثلاثة أسباب رئيسية تجعل العنوان يتدهور مستواه:
- المطورين الرئيسيين تركوا العنوان أو تغير استديو التطوير
- الخروج عن إطار السلسلة وجذورها بدعوى “التجديد”
- كثرة تكرار التجربة خلال فترة قصيرة، الأمر اللي يجعل اللاعب متشبع من التجربة، وبالتالي مع كل جزء جديد ينزل للسوق؛ ينزل مستوى اللعبة بنظره.
وفيه ثلاثة أسباب رئيسية كذلك لغياب سلسلة ألعاب لمدة طويلة:
- قلة مبيعات الأجزاء السابقة، وهذا اللي يجعل الناشر متردد بتمويل تطوير جزء جديد، وممكن يراها صفقة فاشلة، مع أن الأجزاء السابقة قد تكون أحد أعظم الألعاب اللي طُورت على الإطلاق.
- وجود عنوان ثاني يدر أرباح كبيرة على الشركة، فتخلي سلاسل الألعاب الثانية كخطة بديلة لو فشل هذا العنوان بتحقيق المبيعات المطلوبة، ويكون عندنا سلاسل ألعاب تضمن استمرارية عوائد المبيعات للشركة الناشرة.
- قلة المطورين بنفس الأستديو مقابل كثرة عناوينهم الأمر اللي يجعل تطوير جزء لكل سلسلة بلحالها يأخذ وقت أطول من لو كان استديو عناوينه قليلة، فلو فرضنا استديو تطوير عنده فقط أربع عناوين كل عنوان يستغرق سنتين تطوير يكون بين كل جزء وجزء لأي عنوان 8 سنوات!، ولو سلم الناشر أحد العناوين لأستديو ثاني بغرض تسريع عملية التطوير والبيع قد يقع بالسبب الأول لتدهور مستوى سلاسل الألعاب اللي ذكرته قبل.
نرجع للسؤال الأول “كيف ترجع سلاسل الألعاب؟”
شفنا بالجيل السابق رجوع قوي لسلاسل هبط مستواها، وسلاسل غابت لسنين، مثل سلسلة (GTA)، بعد غياب 5 سنوات رجعت بمستوى ممتاز، و (FAR CRY 3) بعد غياب السلسلة أربع سنوات. وأيضا شفنا كيف سكوير اينكس أرضت غالبية الجماهير بلعبة (Tomb Rider) الأخيرة وكذلك رجوع سلسلة (Battlefield) بجزئها الثالث اللي خطف أنظار كثير من الناس.
الأمثلة عديدة لكن لو نجمع القواسم المشتركة لنجاح هذي السلاسل لقينا أمرين رئيسيين لنجاحهم:
إما تجديد كلي للسلسلة، أو المحافظة على جذور السلسلة للعشاق.
التجديد الكلي سلاح ذو حدين أحيانا ينفر العشاق من السلسلة، مثل اللي حدث مع (Resident Evil) و (DmC). وأحيانا يجذب جمهور جديد ويعجب الجمهور القديم مثل (Castlevaina LOS) و (Tomb Rider). فالتجديد الكلي مهوب شرط لرجوع السلسلة لمستواها؛ لكنه أحيانا يكون السبب بالتفوق على مستواها الأصلي بعز مجدها.
لو كان المطور مب واثق من التجديد المفترض ينزل اللعبة باسم السلسلة لكن بجزء فرعي، مثل (MGS RISING) و (Castlevania LOS)، ألعاب خرجت عن إطار السلسلة الأصلية لكن بما إنها فرعية فهي غير محسوبة على السلسلة الأصلية.
شكل آخر من أشكال رجوع السلسلة ما ذكرته وهو مع وجود أجزاء جديدة للسلسلة في سوق الألعاب ومع الحفاظ على مستواها التقليدي، لكن للآن فيه مطالبات من العشاق برجوعها “للأجهزة اللي عُرفت عليها”، مثلي أنا من عشاق سلسلة (Harvest Moon)، وعرفت السلسلة عن طريق أجهزة PlayStation 1/2، لكن طوال الجيل السابق وأنا أنتظر جزء ينزل على الأجهزة اللي أمتلكها، سواء (PS3) أو (XBOX360)، لكن ولسوء الحظ الناشر ركز اهتمامه على منصات شركة نينتندو، وإلى اليوم وأنا أنتظر ينزل جزء جديد على منصة ألعبها. أبتعد عن شخصي؛ ما أزال أتذكر ردة فعل الناس القوية والمبالغ فيها بعد إعلان أن الجزء الثاني من لعبة (Bayonetta) بيكون حصري لجهاز (Wii U)، أتفهم شعور الناس بهذي الحالة لأن (Bayonetta) أُصدرت وعرفوها عن طريق منصة Xbox 360 و Ps3؛ فصعبة يتقبلون حكر السلسلة فقط على جهاز ثاني.
بالنهاية الخوف الحقيقي ما يكون من عدم وجود جزء مكمل لسلاسل ألعابنا الغائبة، الخوف الحقيقي تنزل أجزاء جديدة من هذي السلاسل وتصير أسوأ بكثير من مستويات السلاسل الأصلية، وتكون وصمة عار على سلسلة ألعابك المفضلة لدرجة تخليك تقول “يا ليتهم وقفوا بعد الأجزاء القديمة ولا شوهوا السلسلة”.
سؤالين للنقاش:
- عندك سلاسل ألعاب من زمان ما نزل لها جزء جديد وودك ينزل لكن خايف المطورين يخربونها؟
- وش هي السلاسل اللي تتمنى عودتها؟
