انطلقت وحدة من أضخم ألعاب السنة قبل حوالي يوم أو أقل، وكل ما أفتح قائمة الأصدقاء عندي ألاحظ الغالبية الساحقة تلعب ديستني.
ديستني لعبة تعتمد على الأونلاين أو الانترنت، وغالباً الألعاب اللي كذا ممكن تتخوف منها وقت الاطلاق بسبب مشاكل الضغط على السيرفرات اللي ممكن تصير. عندنا أمثلة كثيرة صارت فيها المشكلة هذي، مثل ألعاب Battlefield و Call of Duty. بعض اللاعبين يفضل انه يلعبها متأخر شوي، بعد ما تنتهي مسألة الضغط على السيرفرات.
غير كذا، لعبة ديستني بحد ذاتها اللاعبين متوقعين منها تجربة خيالية، حسب ما شفنا من دعايات وتسويق وغيره. الآن أخيرًا صار بامكان اللاعبين انهم يلعبون اللعبة ويشوفون بنفسهم هل اللعبة تستاهل أو لا.
بالنسبة لتجربتي، فأقدر أقول اني راضي من ناحية السيرفرات. السيرفرات شبه مستقرة أكثر الأوقات، على الرغم من اتصالي بكبره غير مستقر. قدرت ألعب مع كثير من الناس بدون مشاكل لأوقات كثيرة، يمكن فقط في آخر ساعتين لعبتها جاتني أشياء غريبة مثل فصلي عن اللعبة بشكل مفاجئ، واني ما أسمع أخوياي على المايك. لكن كلها مشاكل بسيطة ولا طوّلت.
أما بالنسبة للعبة نفسها، فتجربتي معها مرضية الى حد معين، ولو اني كنت متوقع شي أكبر و”أعمق”. أقول أعمق لاني لاحظت المهمات تتكرر فيها أشياء بشكل غريب، مثل اني أروح عند أجهزة وأطلع Ghost يشيك عليها بعدها يقولون لي دافع عن المكان الين ما يخلص قوست شغله، وأجلس أدافع وأقتل أمواج من الأعداء. هذا الشي تكرر معي كثير.
فيه أشياء كثير أعجبتني في اللعبة، والأشياء اللي أعجبتني أقدر أقول انها أكثر من الأشياء اللي ما اعجبتني. فيه أشياء بالذات أعجبتني مثل دقة التصويب في اللعبة، وبعض القدرات الرهيبه اللي تفكها كل ما ارتفع مستواك في اللعبة، وفيه اختلاف جيّد بالأسلحة، بالاضافة الى المناظر الجميلة اللي في اللعبة.
هذي تجربتي الى الآن، وتوني في بداية مشواري. علمونا كيف بداية رحلتكم وتجربتكم مع وحدة من أضخم ألعاب السنة!
