منصة ستيم أكبر منصة العاب على الـ (PC)، لو حبينا نعرف عنها محتاجين موضوع كامل؛ بس بنقول لكم شي بسيط عن هالمنصة العريقة.
فكرة الموضوع عن”تجربتنا مع ستيم”.
في البداية كان من الصعب إنك تحصل لعبة أصلية، ولو حصلتها تلاقيها (CD) او (DVD) و يمكن يضيع عليك ولا ينكسر ويمكن ويمكن …الخ، بإختصار معاناة.
حاب أعطيكم معلومة قبل ما ندخل ونتعمق أكثر في الموضوع؛ ان شركة ستيم (Steam) هي في الأساس تابعة لشركة فالف (Valve) مصممة لعبة كاونتر سترايك (Counter Strike) و تيم فورتريس (team fortress 2)، وكان السبب اللي خلى (Valve) تسوي (Steam) هو صعوبة تحديث لعبة (Counter Strike) وكثرة الغش في السيرفرات. بعدها قررت (Valve) إنها تسوي منصة متكاملة تسهّل عملية التحديث للجميع بشكل تلقائي، وصار نظام الحماية قوي مع حماية اللاعب والشركة.
حماية اللاعب: انهم وفروا له جو نظيف مافيه غش.
حماية الشركة: إن الشركة تضمن حقوقها من ناحية الشراء و الدفع.
شوي شوي الشركة تطورت وتوسعت، وما صار ستيم يعرض العاب فالف فقط، حتى انه صار يبيع العاب شركات ثانية. وفي سنة (2007) كانت فيه خطوة جرئية من الشركة، إنهم استحدثوا خدمة ستيم كيميونيتي (Steam Community)، الخدمة هذي عبارة عن مجتمع للاعبين ستيم تقدر تتواصل وتنضم لجروبات و غيرها عن طريق هالبرنامج. وفي سنة (2010) عدد المستخدمين في ستيم تجاوز (25,000,000) حساب، وفي نفس السنة صُنِف موقع ستيم على إنه متصدر التوزيع الرقمي للألعاب بنسبة (75%)، يعني أغلب الألعاب الإكترونية كان (Steam) مسوقها!
أتوقع إنا لخصنا لكم بدايات موقع ستيم في سطور. وراح أنتقل الحين للميزات اللي أعجبتني في موقع ستيم.
Steam Community
زي ما ذكرنا في بداية الموضوع الخدمة عبارة عن مجتمع للاعبين اللي في ستيم وفيه طرق للتواصل و عرض الإنجازات والمقالات والجروبات زي جروبنا -سعودي جيمر- لدرجة اني صرت أعتبر حسابي في ستيم أهم من حسابي في تويتر و فيسبوك!. وتقدر تتواصل مع الشباب وتقدر تنشر وترفع الصور من حسابك مباشرة من اللعبة. وتقدر تنضم لقروبات و تنشئ قروبات ويكون فيه جو تفاعلي ممتع. وايضاً تقدر تقول إنه صار مثل الشبكات الإجتماعية بس بنكهة الألعاب.
Steam Cloud
الخدمة السحابية، تقدر تقول إنها بديل للكرت مومري -الحافظة- وتنحط عليه تخزيناتك بشكل تلقائي مع معلومات ملفك الشخصي داخل الألعاب المدعومة، وتقدر ترجع لها في أي وقت وما ياخذ مساحة في جهازك لإن الملفات تتخزن في خدمتهم السحابية. مثلاً: انا لعبت بديفل ماي كراي (DMC Devil My Cry) في جهازي القديم، ويوم حدثته وحملت اللعبة؛ جت معها كل شي سويته في اللعبة يوم كنت العبها في جهازي القديم. يعني ما اضطريت أعيد من البداية، كملت في نفس المكان اللي كنت فيه، وهذي ميزة جبارة وحلوة خصوصاً لو كنت حاب تحدّث جهازك او تغيره او بتلعب في جهاز ثاني.
Steam Achievements
نقدر نسميه (نظام المكافأت) في اللعب، كل ما تتقدم في اللعب وسويت إنجازات تحصل على أوسمة، وهالأوسمة تظهر في ملفك الشخصي وأي شخص يقدر يناظرها، وهذي خاصية تدفع اللاعب إنه يقدم أكثر وأكثر من لعب الألعاب اللي عنده وتختيمها. ومن مميزاتها إنها تزود مستواك في حسابك، وهي حركة حلوة وتقدر تعتبرها شكر من الشركة عشانك شريت هاللعبة من عندهم، وايضاً تتيح لك تتطلع على أفضل الاعبين في اللعبة اللي انت تلعبها وتتفاخر بإنجازاتك في اللعبة ويكون فيه جو حماس وتحدي للحصول على اللقب في اللعبة مابينك وبين اخوياك.
Downloadable Content
المحتويات الإضافية او زي ماهو معروف عند الجميع بإسم: (DLC)، ويختلف من لعبة للعبة ثانية، احياناً تكون هالإضافات على شكل خرائط او أسلحة أو شخصيات. زود على سهولة تثبيتها في ستيم؛ بمجرد إنك تشتريها رآح تنضاف في اللعبة بشكل تلقائي وتستمع فيها. وبعض الألعاب بمجرد إنك تضيفها ما يحتاج تسوي تحديث للعبة -بعضها-.
و فيه بعض الألعاب إذا حصّلت على لعبة السنة، تروح تنزل لعبتها مرة ثانية بسالفرق انها تحط الإضافات معها بسعر مغري وأحياناً مجاناً. ولو كنت محب للعبة تقدر تشتري السيزون باس (Season Pass) في حال وجوده وتريح راسك من سالفة التحميل اليدوي، لأنها بشكل تلقائي رآح تنضاف في حسآبك بمجرد إن الإضافة تنزل رآح توصلك، طبعا السيزون باس يوفر عليك من نآحية السعر، يعني مثلا الإضافة سعرها (19) يخليها (9).
Steam Support
الدعم في الموقع رهيب ومقسم لفريقين: فريق موقع ستيم نفسه، وفريق الألعاب. وظيفة فريق موقع ستيم: في حال عندك مشكلة في البرنامج نفسه او عمليات الشراء راح يضبّطونك ويحلون مشكلتك بشكل سريع. اما فريق الألعاب: على حسب المشكلة، احيانا يحلها لك الخبراء اللي تبع ستيم و أحيانا يتواصلوا مع الشركة المنتجة للعبة عشان يحلون المشكلة، يعني حقوقك مضمونة إن شاء الله 100%. انا كان معي مشكلة في لعبة كول اوف ديوتي بلاك اوبس 2 (Black Ops 2) شريتها و حملتها وما رضت تشتغل معاي، تواصلت مع الدعم ورد علي في نفس اليوم وعطاني حل لمشكلتي. والأن أشغل اللعبة بدون مشاكل والحمدلله.
Steam Sale
تعمدت أخلي النقطة هذي آخر شيء لإننا ما رآح نوفيها حقها. يمكن من الأسباب اللي خلتني أتعامل مع ستيم التخفيضات الرهيبة اللي تصير فيه من وقت لآخر، ستيم يعتبر الأفضل من ناحية التخفيضات الى درجة صرنا نشوف تخفيضات على العاب اسعارها (59) دولار، بعد التخفيض صارت (9) دولار! يا بلاش. غير التخفيضات الأسبوعية و التخفيضات السنوية ونظام التخفيضات من الشركات، والمقصود بتخفيضات الشركات: مثلاً لو مكتب اكتفجن (Activision) احتفل بالسنة الخامسة على افتتاح المكتب؛ راح تلاقي تخفيضات على العاب الشركة، وأحيانا تجيك مع التخفيضات الأسبوعية فرصة إنك تجرب اللعبة في الأجازة قبل ما تشتريها عشان تتأكد إن اللعبة حلوة ولا لا.
في النهاية
في السابق كان صعب إنك تشتري لعبة، اما الأن تقدر تشتريها عن طريق البطائق الإئتمانية او عن طريق وسيط في بلدك؛ تدفع له عن طريق الحوالة او كاش يو (CashU) وهو يشتريها لك. يعني نقدر نقول إن ستيم هي فاتحة هذا المجال، وايضاً بما إنك شريت اللعبة فخلاص إنت بكيفك ترسلها هدية إلى صديق، إلى حسابك، مع تنوع الخيارات وسهولة التعامل لأن أغلب اللاعبين ما عندهم بطاقة بنكية فيحتاج يشوف له وسيط عشان يقدر يشتري اللعبة.
بعد ما ذكرنا لكم بداية بسيطة عن ستيم وأهم المميزات اللي أعجبتنا فيه، ناقشنا و أعطنا رأيك في موقع ستيم. وأيش أكثر المميزات اللي أعجبتك؟ وهل فيه مميزات ثانية ما ذكرناها؟
