قليل مننا يعرف مصطلح Easter eggs او قد سمع فيه، وانا مااقصد هنا يوم الفصح اقصد شي مختلف تماماً وما الوم احد اذا ماعرفه، لأن اصل الفكرة ومعناها مو واضح ومو منتشر ليش؟ راح اشرحها لكم في هذا المقال.
في البداية خلنا نقول ان مطوريِ الألعاب وقت تطويرهم للعبة معينة (ومع شوية طفش وقت التطوير او قرب انتهائهم لها) قررو يحطو فيها شوية خفايا ومزحات سرية حتى مايكتشفها إلا لاعبين نادرين، هذا هو مفهوم الكلمة بأختصار، مع انه نفس الكلام ممكن نشوفه على اشياء غير الألعاب مثل الخفايا في الأفلام، المسلسلات، الكتب..الخ، لكن طبعاً هذا مو موضوعنا.
الخفايا والأسرار في الألعاب مختلفة أنواعها، أشكالها، وحتى صعوباتها، مثلاً في لعبة GTA V ممكن تحصل طبق فضائي ضخم في السماء! لكن مو بالسهولة الي ممكن تتخيلها، وفي لعبة Borderlands2 ممكن تحصل كهف سري تم تصميمه على شكل لعبة Minecraft! هذي طبعاً نعتبرها مزحة من المطورين، لكن ممكن نحصل خفايا من جانب مختلف مثلاً نعي لشخص توفى مثلما صار مع مطور فيCall of Duty لما كان يحط لعبة دب في كل جزء من اللعبة تذكير في بنته المتوفية، او تلميح لجزء جديد من السلسلة او استهزاء على لعبة ثانية او ممكن حتى يكون سلاح سري.
كيف طلعت لنا الخفايا وأنتشرت؟ في عام 1979 وتحديداً في لعبةAdventure الخاصة فيAtari طلع لنا اول Easter egg ومن بعدها اكتشفوه اللاعبين وصارت الخفايا لها شعبية بين اللاعبين رغم انه فيه مطور عام 2004 ذكر ان لعبته في عام 1978 تعتبر اول لعبة فيها خفايا مااكتشفت من اللاعبين حتى اضطر يصرح بنفسه!
أنواع الخفايا كثيرة وأهدافها مختلفة منها المفيد ومنها الي بدون فائدة، ونفس الشي ينطبق على صعوبتها وطريقة اكتشافها المختلفة، فيه خفايا بسيطة وسهلة وممكن تسويها في دقائق سريعة او حتى بالصدفة وفيه اشياء ممكن تأخذ معك ايام. بأختصار تختلف الخفايا كهدف وكفكرة في كل لعبة لكنها بشكل عام موجودة في أغلب الألعاب اذا ماكان كلها!
انا في رأيي ان الخفايا شي رهيب ويعطي نكهة ممتعة في الألعاب مثل التروفيز وغيره بشرط انها ماتكون إباحية او فيها معتقدات مخالفة مثلما اكتشفت بنفسي فيAssassin Creed 2 لوح فنية غريبة ومرعبة. لو بذكر أمثلة أكثر ماراح يكفي الكلام، علشان كذا أنصحك تبحث عن اسم لعبتك الي تحبها وتكتب بجنبها Easter eggs وتتفرج على جنون المطورين الي حطوه لك بدون ماتدري.
