تحديث: أعلنت روك ستار رسمياً عن صحّة الخبر.
في الموقع المعروف Reddit، توصّل أحد الأعضاء هناك الى احتمالية أثارت النقاش بين اللاعبين، وهي احتمالية ان جراند ثيفت أوتو أونلاين راح تدعم المدفوعات داخل اللعبة (Microtransactions). المايكرو ترانز آكشنز، ومعناتها انك تشتري أشياء من داخل اللعبة بفلوس حقيقية. كيف تم اكتشاف الموضوع؟ العضو المذكور في الرابط يقول انه دخل على قائمة Store من داخل اللعبة ولقى شي اسمه Cash Cards أو بطاقات كاش. بطاقات الكاش هذي هي محتويات تجي مع اضافات، الاضافات هذي تجي بالمجان مع النسخ الخاصة للعبة. اللي لعب جراند ثيفت أوتو ٥، غالب الظن انه يعرف ان كسب الفلوس عملية صعبة. العضو اللي كشف الموضوع هذا يعتقد ان روكستار خلّت عملية كسب الفلوس صعبة بالعاني، عشان تحاول تقنع اللاعبين انهم يشترون هذي البطاقات بفلوس حقيقية. من الأشياء اللي تستحق الذكر برضو، ان العضو نفسه ذكر انه محتمل يكون الموضوع ماله علاقة بالمدفوعات داخل اللعبة، يمكنها تكون لمجرد الاختبار أو شي له علاقة بجوائز لسباقات داخل اللعبة نفسها، وغيرها من الاحتمالات. جراند ثيفت أوتو أونلاين، بتنزل في ١ أكتوبر مجاناً لأي لاعب اشترى جراند ثيفت أوتو ٥. المدفوعات داخل اللعبة، قضية كبيرة بين اللاعبين يتناقشونها في كل مكان. كثير من اللاعبين يتذمر منها ويقول انها مجرد طمع من الشركات عشان يربحون فلوس زيادة. الى الآن روكستار ما قالت شي عن الموضوع، أول ما ينزل رد لها راح نحطه كتحديث للموضوع ونكمل النقاش. لكن الين ما يوصل رد روكستار، وش رايك بموضوع الدفع داخل اللعبة؟ هل بيضر اللعبة بالنسبة لك؟ أو ان الشركة لها حق تسوي هذا الشي؟ شاركنا برأيك في التعليقات!
