أخيرًا انتهى معرض جيمزكوم! استمتعنا بحضوره وتغطيته والكلام عنه، والحين جا وقت اختيار أكثر لعبة اعجبتنا.
ألعاب كثيرة استمتعنا فيها، وكميّة الألعاب الرهيبه في هذي السنة كانت كبيرة بما انها أول سنة كاملة للجيل الجديد. على ان أكثر الألعاب ما راح تنزل الا في 2015، وعلى ان كثير من اللاعبين يشتكي من قلة الألعاب في هذي الفترة، الا ان المستقبل بيكون مشرق حسب ما شفنا في المعرض.
بالنسبة لأكثر لعبة استمتعنا فيها، فهي لعبة BloodBorne. قد تكلمنا عن اللعبة كثير وكثير في معرض E3 هذي السنة، وقلنا انها من احتمال تكون من أفضل الألعاب اللي بتنزل وقتها، ولكن ما كان مسموح لأحد انه يلعب اللعبة وقتها، لكن هذي المرة في جيمزكوم 2014 كانت معروضة للتجربة.
تجربة الديمو كانت ممتازة جدًا، اللعبة قريبة الى ألعاب سلسلة Souls (ديمونز سولز ودارك سولز) وهذا شي معروف، ولكن اذا لعبت اللعبة بنفسك بتلاحظ ان فيها تغييرات جريئة مرة. قليل من الألعاب تسوي أشياء مثل تشيل الدرع تماماً من اللاعب، بحيث تدفعه يهاجم أكثر. فيه برضه حركة استعادة الطاقة اللي نقصتها في حال قدرت ترجع تضرب العدو بسرعة بعد ما يضربك. هذي كلها حركات جريئة تغيّر عليك طريقة اللعب بشكل شبه كامل عن الألعاب اللي قبل. هذا كله على جنب، وان اللعبة شكلها مدفوع فيها من ناحية الانتاج، عكس ألعاب سولز اللي قبل كانت نوعاً رخيصة من ناحية الانتاج.
متحمسين مرة نشوف كيف بيطلع مستوى بلودبورن بشكلها الأخير اذا نزلت. النوع هذا من الألعاب صار منتشر بين اللاعبين ولقى له جمهور يحبه بشكل مجنون، وحسب اللي شفناه وجربناه في جيمزكوم، نقدر نقول ان اللعبة بتكون الأفضل من بين الألعاب اللي قبل!
وش أكثر لعبة أعجبتك في جيمزكوم هذي السنة؟
