وش فيه ألعاب تلعبها في العيد؟

كل عام والجميع بخير مرة ثانية.

بعد معايدة الناس والزحمة والتبويس وغيره، يرجع الجيمر لبيته ويبغى يلعب. واذا أنت مثلي فأنت غالباً بتسلم على الأقرباء وتؤدي الواجب وتبدأ مهمة “صرّف نفسك” وتتسلل برا العزايم على طريقة ميتال جير. لكن وش فيه ألعاب تلعبها في العيد؟

هذي قائمة بسيطة لبعض الألعاب اللي توها نازله، او على وشك خلال اليومين الجاية بالكثير. ألاحظ الكثير من اللاعبين ما أعطاها وجه بما انه كان مشغول في بيتا ديستني.

The Last of Us Remastered

من ما يعرف ذا لاست أوف أس؟ لعبة تركّز على القصة، بالاضافة الى طريقة لعب تخفّي ممتازة. بتنزل مرة ثانية على بلاي ستيشن 4 بشكل أفضل. اللعبة بتنزل على بلاي ستيشن 4 اليوم.

المميّز في هذا الاصدار انها بتجمع كل الاضافات اللي نزلت على نسخة بلاي ستيشن 3، بالاضافة الى اضافات للأونلاين بتجي في المستقبل.

تعتبر اللعبة هذي من أهم ألعاب بلاي ستيشن 3. اذا ما قد لعبتها، فما أشوف أي سبب يخليك ما تلعبها.

Oddworld

لعبة تحميل فقط، مناقز (بلاتفورمر) من أيام الزمن القديم لألعاب الفيديو. نزلت اللعبة أساساً في عام 1997. طريقة اللعب فيها تشمل مناقز وحل الألغاز بشكل أساسي.

لعبة جميلة، ممكن تلاحظ ان الكائن اللي تلعب فيه شكله غريب وعالم اللعبة غريب، لكن راح تعرف السبب من بداية اللعبة! لعبة جيّدة وننصح فيها.

اذا تحب ألعاب مثل ليتل بيج بلانيت وألعاب ماريو القديمة، فاحتمال كبير ان هذي بتعجبك.

Valiant Hearts

لعبة مغامرة تركّز على الألغاز بشكل أساسي. تتكلم اللعبة عن الحرب العالمية الأولى وتتميّز بأنها تعطيك معلومات صحيحة عن الحرب بشكل رائع جداً، لعبتها ولاحظت ان هذي الميزة هي أكثر شي أعجبني في اللعبة.

اللعبة من يوبيسوفت، واللي يعرف يوبيسوفت يعرف تركيزهم على الرسم الفني والتصميم وغيره من النواحي المرئية. ممتازة جداً من هالناحية، بالاضافة الى الموسيقى التصويرية الممتازة.

يوبيسوفت لها فترة تنزل ألعاب “بسيطة وجميلة”، وهذي من آخر الألعاب اللي من هذا النوع.

Rogue Legacy

لعبة indie (مطوّر مستقل) مناقز تركز على عناصر كلاسيكية جداً (واضح من شكلها انها كلاسيكية) سواءً من ناحية الشكل أو حتى طريقة اللعب. تتميّز اللعبة بالمراحل العشوائية، بحيث تقابل أعداء بشكل عشوائي، وتحاول تهزم أربع رؤساء في أربع مراحل، بعدها تحارب العدو الأكبر.

اذا تحب الألعاب الكلاسيكية، فهذا اختيار مناسب لك.

اضافات Killzone Shadow Fall

اضافات كيلزون، اللعبة اللي لا زالت سوني تدعمها بكل الأشكال. نزلت اضافة Intercept قبل فترة واللي أضافوا فيها طور تعاوني بالكامل، مع حوالي أربع مراحل. أضافوا خرايط مجانية قبل فترة، وقبل أيام بسيطة أضافوا خريطتين مجانية تلقاها في متجر بلاي ستيشن.

مالي ميول كبير لألعاب التصويب، لكن كيلزون من ألعاب التصويب اللي أحبها. لا زلت ألعب اللعبة أونلاين الى الآن.

اضافات Dark Souls II

لعبة التعذيب والعقاب المعروفة، واللي تعاقب اللاعبين شر عقاب على أغلاطهم. اللعبة هذي من الألعاب اللي أخذت تقييم أسطورية عندنا، والآن المطوّر أعلن عن سلسلة اضافات للعبة. نزلت أول جزئية من الاضافات، وراح تنزل الباقيات في المستقبل.

الكثير يمدح الاضافات، وانها أضافة أشياء جديدة مثل الألغاز.

اذا تحب سلسلة سولز، فبطبيعة الحال ان هذي بتعجبك.

اضافات Titanfall

لعبة التصويب الفضائية الممتازة. تم الاعلان عن الاضافة الجديدة واللي بتنزل هذا الأسبوع.

الاضافات عبارة عن خرايط جديدة في الأونلاين. تقدر تقول شي يرجّع اللاعبين لها بما ان لها فترة نازلة.

هذي بالنسبة للألعاب اللي ننصحك تلعبها خلال العيد، فيه ألعاب زيادة لكن تقريباً هذي الألعاب الأبرز بينها.

وش ناوي تلعب في العيد؟